សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ត្រប់ស្រួយ ជាប្រភេទត្រប់ម្យ៉ាងដែលមានផ្លែមូល តូចល្មម និងមានសភាពស្រួយដែលគេនិយមទទួលទានស្រស់ ជាបន្លែសម្រាប់ផ្ទាប់ និងសម្រាប់ស្លរផងដែរ ហើយវាក៏ជាដំណាំដែលគេនិយមដាំ ព្រោះវាងាយស្រួលដាំ ងាយថែទាំ ប្រមូលផលលឿន និងអាចលក់បានក្នុងតម្លៃថ្លៃលើទីផ្សារ។
បើតាម លោក សុខខេង ជាកសិករដាំត្រប់ស្រួយអស់រយៈពេលជាច្រើនឆ្នាំនៅខេត្តកំពង់ចាម បានប្រាប់ឱ្យដឹងថា លោកបានចាប់ផ្ដើមដាំត្រប់ស្រួយជាច្រើនឆ្នាំមកហើយ នៅលើដីប្រមាណ ២ហិកតា ដែលអាចប្រមូលផលបានចន្លោះពី ៣០០-៤០០គីឡូក្រាមក្នុងមួយខែ លក់ឱ្យឈ្មួញយកទៅលក់បន្តក្នុងតម្លៃប្រមាណ ៦០០០ពាន់រៀលក្នុងមួយគីឡូក្រាម បើគិតជាប្រាក់គឺអាចលក់បានជាង ៧លានក្នុងមួយរដូវ។
លោកបន្តថា ៖
«ត្រប់ស្រួយមិនពិបាកដាំដូចជាដំណាំមួយចំនួននោះទេ ហើយយើងអាចប្រមូលផលវាបានរហូតដល់ទៅ ៣ខែ ដោយរយៈពេលមួយសប្ដាហ៍យើងអាចបេះវាបាន ២-៣ដង ទៅតាមស្ថានភាពដើមនីមួយៗដែលមានផ្លែតិច ឬច្រើន»។
ដោយឡែក ពាក់ព័ន្ធទៅនឹងបច្ចេកទេសក្នុងការដាំ កសិករខាងលើរៀបរាប់ថា ដំបូងឡើយត្រូវសម្រាំងយកគ្រាប់ពូជណាដែលសុទ្ធល្អដើម្បីដាំ ព្រោះកាលណាពូជសុទ្ធល្អ នឹងទទួលបានផលល្អ ហើយក៏ងាយលក់ទៅទីផ្សារដែរ។ បន្ទាប់មកទៀតត្រូវយកគ្រាប់នោះមកត្រាំទឹកប្រហែលជា ២ម៉ោង ទើបចងវេចខ្ចប់ដើម្បីយកមកត្រាំផ្អាប់ក្នុងទឹកត្រជាក់ ឬទឹកកករយៈពេល ៣-៤ថ្ងៃបន្ថែមទៀត ដើម្បីតាមដានឱ្យដឹងថាគ្រាប់ណាខ្លះដុះ និងគ្រាប់ណាខ្លះមិនដុះ។
បន្ទាប់ពីរៀបចំតាមលំដាប់លំដោយរួចរាល់ហើយ ត្រូវជ្រើសរើសយកគ្រាប់ដែលមានពន្លកមកដាំលើដីដែលបានរៀបចំតាមបច្ចេកទេស ដោយដីត្រូវឆូតជារងទាបៗដែលមានទទឹងប្រហែលជាងកន្លះម៉ែត្រ និងគ្របកៅស៊ូដែលចោះប្រហោងរួចជាស្រេចដើម្បីការពារមេរោគពីខាងក្រៅ។
ចំពោះការដាំគឺត្រូវដាក់កូនត្រប់ឃ្លាតពីគ្នាប្រវែង ១ម៉ែត្រពីគ្នា ដើម្បីឱ្យវាមានទីធ្លាដើម្បីលូតលាស់មិនប៉ះគ្នា។ បន្ទាប់មកទៀត គ្រាន់តែមើលថែទាំស្រោចទឹក និងដាក់ជីធម្មជាតិវានឹងរីកលូតលាស់រហូតចេញផ្លែ។ ក្រៅពីនេះ សម្រាប់អ្នកនៅរស់ទីក្រុង ក៏អាចសាកល្បងដាំក្នុងផើង ឬនៅទីតាំងសមរម្យណាមួយមុខផ្ទះក៏អាចទទួលបានផលគួរសមសម្រាប់ទទួលទានដោយសុវត្ថិភាព និងកាត់បន្ថយការចំណាយបានមួយផ្នែកផងដែរ៕
Account
Security
Favourite Content