សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
សហគមន៍អេកូទេសចរណ៍ផាត់សណ្ដាយ មានមូលដ្ឋានស្ថិតនៅក្នុងខេត្តកំពង់ធំ និងស្ថិតនៅលើផ្ទៃនៃបឹងទន្លេសាប។ សហគមន៍នេះចែកចេញជាភូមិចំនួន ៥ និងមានប្រជាពលរដ្ឋរស់នៅចំនួនជាង ១ពាន់គ្រួសារ ក្នុងនោះ ពលរដ្ឋ ៩០% ជាអ្នកប្រកបរបរនេសាទត្រី។
តាំងពីដើមមក ប្រជាជនក្នុងសហគមន៍នេះមានរបរនេសាទត្រី ជាមុខរបរគោលតែម្ដង។ ប៉ុន្តែ ដោយសារតែការនេសាទកាន់តែមានការកើនឡើងពីមួយឆ្នាំ ធនធានត្រីក៏ប្រឈមនឹងការខ្សត់ខ្សោយផងដែរ។
ដើម្បីស្រោចស្រង់ធនធានត្រីក្នុងបឹងទន្លេសាបឡើងវិញ ក្រសួង ស្ថាប័ន និងអង្គការនានាបានព្យាយាមបង្កើតជម្រើសមុខរបរឱ្យកាន់តែទូលំទូលាយដល់ប្រជាជនក្នុងសហគមន៍ឡើងវិញ។ ការធ្វើបែបនេះ មិនត្រឹមតែជួយបង្កើនសេដ្ឋកិច្ចមូលដ្ឋានប៉ុណ្ណោះទេ ប៉ុន្តែក៏ជួយលើសុខមាលភាពរបស់ពួកគេ ជាពិសេសកាត់បន្ថយនូវការបាត់បង់ការសិក្សារបស់កូនៗ ដែលតាមឪពុកម្ដាយទៅនេសាទ។
បើតាមលោក ហ៊ួត ស៊ីណាត ប្រធានកម្មវិធីសម្របសម្រួលជីវភាព FACT’s Livelihood Program Coordinator បានឱ្យដឹងថា៖
“ឥឡូវនេះសហគមន៍អាចរកចំណូលបានពីទេសចរណ៍ ដោយមួយថ្ងៃទទួលបានភ្ញៀវជាមធ្យម ១០នាក់…តាមរយៈភ្ញៀវដែលចូលមកទស្សនានេះ ពួកគាត់អាចបើកទូក ដឹកភ្ញៀវ ធ្វើម្ហូបអាហារ និងបង្កើតផ្ទះស្នាក់ជាដើម”
លោកប្រធានកម្មវិធីសម្របសម្រួលជីវភាពដដែលនេះ បានបន្តឱ្យដឹងទៀតថា ភ្ញៀវដែលចូលទៅកម្សាន្ដនៅក្នុងសហគមន៍គឺមានទាំងភ្ញៀវខ្មែរ មានទាំងបរទេស ហើយមួយរយៈចុងក្រោយនេះ លោកសង្កេតឃើញថា ភ្ញៀវបរទេសហាក់មានចំនួនច្រើនគួរសម ដោយពួកគេមានការចាប់អារម្មណ៍ ទៅលើទីតាំងទេសចរណ៍ធម្មជាតិមួយនេះ។
យ៉ាងណាមិញ អ្វីដែលនៅជាបញ្ហា គឺភាគច្រើនភ្ញៀវទេសចរមិនសូវទទួលយកសេវាកម្មស្នាក់នៅនោះទេ ដោយហេតុថា មានការភ័យខ្លាចជាមួយនឹងរឿងអាកាសធាតុ ម្យ៉ាងទៀតវាមានភាពលំបាកក្នុងការបន្ទោរបង់ជាដើម។ ប៉ុន្តែនេះក៏មិនមែនមានន័យថា មិនមានអ្នកស្នាក់នៅសោះនោះទេ គឺមានដែរ គ្រាន់តែក្នុងចំនួនតិចតួច។
គួររំលឹកថា សហគមន៍នេះបានបង្កើតឡើងក្នុងឆ្នាំ ២០១៩ ហើយមកដល់ពេលនេះ វាបានក្លាយទៅជាផ្នែកមួយដ៏សំខាន់សម្រាប់ប្រជាជនក្នុងការរកចំណូល។ ហើយដោយសារតែមុខរបរថ្មីនេះ បាននាំឱ្យការនេសាទមានការថយចុះប្រមាណជាពាក់កណ្ដាលហើយ ដោយពួកគេយកពេលមកបម្រើការក្នុងវិស័យទេសចរណ៍វិញ។
ក្រៅពីការបម្រើសេវាកម្មទេសចរណ៍ដោយផ្ទាល់ទៅ ប្រជាជនមួយចំនួនទៀតក៏បានបង្កើតផលិតផល ធ្វើពីដៃ ដោយប្រើប្រាស់វត្ថុធាតុដើមនៅក្នុងតំបន់ផ្ទាល់ដូចជា កាបូបធ្វើពីកំប្លោក វត្ថុអនុស្សាវរីយ៍ និងកែច្នៃត្រីដែលនេសាទបានធ្វើជា ត្រីងៀត ត្រីឆ្អើ ប្រហុក ផ្អកជាដើម៕
Account
Security
Favourite Content