សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ពូជស្រូវសែនក្រអូប០១ ជាប្រភេទពូជស្រូវដែលត្រូវបានបញ្ចេញ និងផ្សព្វផ្សាយជូនកសិករប្រើប្រាស់នៅឆ្នាំ២០១៩ ហើយពូជស្រូវប្រភេទនេះកំពុងរីកសាយភាយនៅប្រទេសកម្ពុជា ដោយសារពូជនេះផ្ដល់នូវទិន្នផលខ្ពស់ មានក្លិនក្រអូប គុណភាពអង្ករល្អ វែងរលូន និងបាយទន់ឆ្ងាញ់ពិសារ ជាពិសេសវាជាពូជដែលមានតម្លៃខ្ពស់នៅលើទីផ្សារជាតិ និងអន្តរជាតិ។
ពូជស្រូវសែនក្រអូប០១ ជាពូជស្រូវស្រាលមិនប្រកាន់រដូវ ដែលធ្វើឱ្យពូជនេះអាចចេញផ្កាបានគ្រប់ពេលវេលានៅពេលដែលលក្ខខណ្ឌដាំដុះអំណោយផល។ ហេតុនេះហើយ ពូជស្រូវនេះអាចដាំដុះបានទាំងនៅដើមរដូវវស្សា ក្នុងរដូវស្សា ចុងរដូវវស្សា ស្រូវប្រដេញទឹក និងលក្ខខណ្ឌប្រាំងស្រោចស្រពក៏បាន។
ពូជស្រូវខាងលើមានអាយុកាលចាប់ពីថ្ងៃសាបព្រោះដល់ថ្ងៃប្រមូលផលពី ១១០-១១៥ថ្ងៃ ហើយមានកម្ពស់ដើមពី ១០៧-១១៤សង់ទីម៉ែត្រ ហើយចំនួនដើមផ្ដល់ផលពី ៥-១០ដើមក្នុងមួយគុម្ព។ ចំណែកចំនួនគ្រាប់ក្នុងមួយគួរមានចាប់ពី ១០០-១៤០គ្រាប់ និងមានប្រវែងកួរពី ២០-៣០សង់ទីម៉ែត្រ ហើយជារួមអាចផ្ដល់ផលពី ៣.៩-៤.៩តោនក្នុងមួយហិកតា។
សម្រាប់ស្រូវសន្ទូង គេត្រូវការបរិមាណគ្រាប់ពូជដែលចាំបាច់ពី ៣០-៤០គីឡូក្រាមក្នុងមួយហិកតា តែករណីគ្រាប់ពូជសុទ្ធ និងមានសុខភាពល្អ គេត្រូវការប្រមាណ ១៥-២០គីឡូក្រាមប៉ុណ្ណោះសម្រាប់ផ្ទៃដីមួយហិកតា។ សម្រាប់ស្រូវពង្រោះ គេត្រូវការបរិមាណគ្រាប់ពូជប្រមាណ ៦០គីឡូក្រាមក្នុងមួយហិកតា ដែលកសិករត្រូវរៀបចំដីឱ្យបានល្អ និងរាបស្មើមុនស្ទូងឬព្រោះ។
ពាក់ព័ន្ធនឹងការភ្ជួររាស់ កសិករគួរតែធ្វើឱ្យបាន ២-៣សារទើបល្អប្រសើរ ប្រសិនបើអាចបញ្ចេញបញ្ចូលទឹកបាន បន្ទាប់ពីស្ទូង ឬព្រោះបាន ២០ថ្ងៃ យើងអាចបញ្ចេញទឹកឱ្យអស់ពីក្នុងស្រែ ២-៤ថ្ងៃរួចបញ្ចូលទឹកថ្មីវិញ ដោយសារការធ្វើបែបនេះនឹងធ្វើឱ្យស្រូវកាន់តែបែកគុម្ពល្អ។
ចំពោះការប្រមូលផល គេត្រូវប្រមូលនៅពេលគ្រាប់ទុំល្អដែលកួរស្រួវមានគ្រាប់ចាប់ពីពាក់កណ្ដាលកួរឡើងទៅ មានពណ៌លឿងទុំចាស់ និងគ្រាប់ពេញពាក់កណ្ដាលកួរចុះក្រោមមានពណ៌លឿងទុំស្រាល ហើយគ្រាប់ស្កកវិញមានពណ៌ស្លាបសេកចាស់ ឬប្រមូលផលរយៈពេល ៣០ថ្ងៃក្រោយស្រូវចេញផ្កាបាន ៥០ភាគរយក្នុងស្រែទាំងមូល៕
Account
Security
Favourite Content