កម្ពុជាបច្ចុប្បន្ន មានសម្បូរទៅដោយកសិផលយ៉ាងសន្ធឹកសន្ធាប់ មិនថាជាពពួកបន្លែ ឬផ្លែឈើនោះទេ ខណៈដែលរដ្ឋាភិបាលកំពុងយកចិត្តទុកដាក់ធ្វើពិពិធកម្មឱ្យកាន់តែល្អប្រសើរ ទាំងការដាំដុះ ការប្រមូលផល ការកែច្នៃ ជាពិសេសការពង្រីកទីផ្សាររឱ្យកាន់តែទូលំទូលាយ ដើម្បីជាប្រយោជន៍ដល់កសិករជាអ្នកដាំដុះ សហគ្រិនដែលជាអ្នកកែច្នៃ ក៏ដូចជាសេដ្ឋកិច្ចសង្គមជាតិទាំងមូល។ ជាលទ្ធផល ក្រោយកិច្ចចូលរួមយ៉ាងសកម្មពីវិស័យឯកជនយ៉ាងសកម្ម ផលិតផលកសិផលជាច្រើនត្រូវបានដាក់លក់ និងផ្គត់ផ្គង់នៅលើទីផ្សារក្នុងស្រុក និងឈានដល់ការនាំចេញទៅក្រៅប្រទេស។

លោក ឈាន ឆៃឌី អ្នកគ្រប់គ្រងទូទៅរបស់សិប្បកម្ម​កែច្នៃផ្លែឈើ សិរិហ្វាម មានទីតាំងនៅភូមិវាលហាត់ ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ បានរៀបរាប់ឱ្យដឹងថា៖ បច្ចុប្បន្ននេះ សិរិហ្វាម ជាកន្លែងកែច្នៃផលិតផលក្នុងស្រុក ផលិតចេញពីស្នាដៃកូនខ្មែរពិតៗ និងបានចុះបញ្ជីរត្រឹមត្រូវជាមួយគ្រប់ស្ថាប័ន – ក្រសួងដែលពា់ព័ន្ធ ខណៈដែលផលិតផលដែលឆ្លងកាត់ការកែច្នៃពីសិបបកម្មនេះ បាន និងកំពុងដាក់លក់នៅលើទីផ្សារយ៉ាងទូលាយ និងមានច្រើនប្រភេទ។

លោកបានបន្តថា ៖

«ជាមួយនឹងកិច្ចដំណើរនៃសង្វាក់ផលិតកម្មរបស់សិប្បកម្ម ដែលជាអាជីវកម្មស្វែងរកប្រាក់ចំណេញនោះ យើងមានគោលបំណងចម្បងជួយទិញរាល់កសិផលពីកសិករដែលដាំដុះក្នុងស្រុក ជាពិសេសនៅក្នុងតំបន់ដើម្បីជួយដោះស្រាយបញ្ហាទីផ្សារ បង្កើនប្រាក់ចំណូលដល់ពួកគាត់ដែលជាអ្នកដាំដុះ ក៏ដូចជាផ្តល់ចំណូលប្រជាសហគមន៍​តាមរយៈផ្តល់់ឱកាសការងារ និងជួយកាត់បន្ថយការធ្វើចំណាកស្រុករបស់ប្រជាពលរដ្ឋដែលប្រឈមនឹងហានិភ័យ»។

លោកបានបញ្ជាក់បន្ថែមថា ៖

«ផលិតផលរបស់យើងត្រូវបានកែច្នៃពីផ្លែឈើក្នុងស្រុក ដូចជា ផ្លែមៀន ស្វាយ និងម្នាស់ គឺយើងទិញផ្ទាល់ពីកសិករក្នុងតំបន់ ពោលគឺនៅក្នុងសហគមន៍ដែលមានសមាជិក ១៥៤នាក់។ តាមរយៈសក្ដានុពុលនៃផ្លែឈើទាំងនេះ យើងអាចផលិតបានជា ទឹកមៀន​ ទឹកស្វាយ មៀនទឹកឃ្មុំ ក្រៅពីនេះមានដំណាប់មៀន ដំណាប់ម្នាស់ ដំណាប់ស្វាយ និងស្រាមៀន។ ក្រៅពីការជួយទិញវត្ថធាតុដើមដែលជាកសិផលនៅក្នុងសហគមន៍ យើងក៏បានជួយបង្ហាត់បង្រៀនបច្ចេកទេសកសិកម្មដល់កសិករ ជួយស្វែងរកដៃគូបន្ថែម និងបង្ហាត់បង្ហាញនូវការគ្រប់គ្រងផ្សេងៗទៀតនៅក្នុងដំណើរការដាំដុះ»។

ឆ្លៀតនៅក្នុងឱកាសនេះ លោក ឆៃឌី បានប្រាប់ឱ្យដឹងដែរថា គ្រប់ផលិតផលដែលបានកែច្នៃ និងដាក់លក់នៅលើទីផ្សារគឺសុទ្ធតែទទួលបានការគាំទ្រពីអតិថិជនក្នុងស្រុក ក៏ដូចអតិថិជនដែលជាជនបរទេស ដោយសារតែគ្រប់ផលិតផលទាំងអស់សុទ្ធតែត្រូវបានយកចិត្តទុកដាក់ក្នុងការផលិត និងកែច្នៃយ៉ាងសម្រិតសម្រាំង ផ្តោតទៅលើរសជាតិ និងគុណភាព គ្មានសារធាតុគីមី ប៉ុន្តែជាការកត់សម្គាល់ ផលិតផលដែលលក់ដាច់ជាងគេគឺមៀនកំប៉ុង ឬមៀនទឹកឃ្មុំ ដែលអាចផ្តល់អត្ថប្រយោជន៍ចំពោះសុខភាព និងសម្រស់ ហើយមានតម្លៃសមរម្យ។

អ្នកគ្រប់គ្រង់សិប្បកម្មក្នុងស្រុករូបនេះបញ្ជាក់ថា ៖

«សម្រាប់ការផ្គត់ផ្គង់ទីផ្សារក្នុងស្រុកនាពេលបច្ចុប្បន្ន ក្នុងមួយខែយ៉ាងហោចណាស់បានប្រមាណ ១៥០០-២០០០កែវ ដែលភាគច្រើនយើងលក់នៅលើបណ្ដាញសង្គម និងបោះទៅតាមម៉ាតផ្សេងៗផងដែរ ដោយតម្លៃមៀនទឹកឃ្មុំមួយកែវត្រឹម ១២០០០រៀល ប៉ុណ្ណោះ »។

គួរបញ្ជាក់ថា សិប្បកម្ម សិរិហ្វាម បានចាប់ផ្ដើមបង្កើតឡើងនៅឆ្នាំ២០២១ ដោយដំបូងឡើយផ្តើមពីការផលិតទឹកស្វាយ និងដំណាប់ស្វាយកែវមៀត ដែលបងប្អូនយើងនិយមចូលចិត្តរហូតតមក ដោយឡែកមុនពេលរៀបចំសម្ភារៈ និងកែច្នៃ ត្រូវចំណាយពេលសិក្សាប្រមាណ ២ឆ្នាំ ដោយចំណាយដើមទុនច្រើនគួរសមទៅលើការរៀបចំទីតាំងកែច្នៃ ទិញឧបករណ៍កែច្នៃផ្សេងៗ ដើម្បីឱ្យការផលិតមានគុណភាព សុវត្ថិភាពស្របតាមស្តង់ដារចំណីអាហារ។

នៅក្នុងឱកាសនៃការផ្តល់កិច្ចសម្ភាសន៍ជាមួយ AMS Economy លោក ឆៃឌី ក៏បានថ្លែងអំណរគុណដល់អតិថិជនទាំងក្នុង និងក្រៅស្រុក ដែលតែងតែនិយមគាំទ្រផលិតផលរបស់ សិប្បកម្ម សិរិហ្វាម ហើយ សិរិហ្វា ក៏កំពុងរៀបចំផែនការក្នុងពង្រីកការផ្គត់ផ្គង់នៅតាមបណ្តាផ្សារទំនើប ដើម្បីចូលរួមលើកកម្ពស់ការកែច្នៃក្នុងស្រុក ជាពិសេសអាចចូលរួមជួយដល់ជីវភាពប្រជាកសិករបានកាន់តែច្រើន៕