ភ្នំពេញ ៖ បច្ចុប្បន្ន នៅកម្ពុជាមានរោងចក្រធុនធំសរុបចំនួន ២១២៥រោងចក្រ ដែលមានទុនវិនិយោគសរុបចំនួន ១៨ ៥៦៦.៣លានដុល្លារ។ នេះបើតាមការឱ្យដឹងរបស់ឯកឧត្តមបណ្ឌិត ហេង សុខគង់ រដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍។

ឯកឧត្តមបណ្ឌិត ហេង សុខគង់ បានឱ្យដឹងថា នៅឆ្នាំ២០២៣កន្លងទៅនេះ កម្ពុជាមានរោងចក្របង្កើតថ្មីចំនួន ២៤១រោងចក្រ និងមានដើមទុនវិនិយោគប្រមាណ ១ ៨៧៥.៨លានដុល្លារ ហើយក្នុងនោះមានរោងចក្រចំនួន៨ ដែលបានសុំអាជ្ញាបណ្ណពីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ក្នុងការផ្គុំ និងដំឡើងយានយន្តនៅកម្ពុជា ដែលក្នុងនោះមានក្រុមហ៊ុនចំនួន៥ហើយដែលបានដំណើរការជាផ្លូវការ។

ឯកឧត្តមបានបញ្ជាក់ថា ក្រុមហ៊ុនខ្មែរទី១ ដែលបានដំឡើងឡានខ្មែរមុនគេគឺក្រុមហ៊ុន GTV Motor ហើយនៅខែឧសភាខាងមុខនេះ ក្រុមហ៊ុនតូយ៉ាតា ក៏នឹងសម្ពោធជាផ្លូវការក្នុងការផលិតរថយន្ត Pick up និង SUV នៅកម្ពុជាផងដែរ ។

ជាមួយគ្នានេះឯកឧត្តមបណ្ឌិត ហេង សុខគង់ បានស្នើដល់ក្រុមហ៊ុនរថយន្តជួយពិនិត្យលទ្ធភាពប្រើប្រាស់វត្ថុធាតុដើមក្នុងស្រុក ដូចជា សំបកកង់រថយន្តរបស់រោងចក្រ Sailun នៅតំបន់សេដ្ឋកិច្ចពិសេសស្វាយរៀង ដែលអាចផលិតសំបកកង់ឡានមួយថ្ងៃបានរហូតដល់ ៣៥ ០០០គ្រាប់។

ទាក់ទងវិស័យយានយន្តវិស័យនេះ ឯកឧត្តមបានឱ្យថឹងថា ៖ នៅឆ្នាំ២០១៩ កម្ពុជាបាននាំចេញគ្រឿងបង្គុំយានយន្តបានប្រមាណជាង២០០លានដុល្លារអាម៉េរិក និងគ្រឿងបរិក្ខារអេឡិចត្រូនិកបានប្រមាណជាង៩០០លានដុល្លារ។

យោងតាមលោក សឿន ដារ៉ា នាយកប្រតិបត្ដិសហព័ន្ធឧស្សាហកម្មយានយន្ដកម្ពុជា (CAIF) គិតមកដល់ពេលនេះ កម្ពុជាមានគម្រោងរោងចក្រដំឡើងរថយន្ដថ្មីសរុបចំនួន៩ក្រុមហ៊ុន។

ក្រុមហ៊ុនដែលបានតំឡើងរោងចក្ររថយន្ដថ្មីបានរួចរាល់ មានចំនួន៥ក្រុមហ៊ុន រួមមាន៖ ក្រុមហ៊ុន Hyundai Camko Motor, ក្រុមហ៊ុន Daehan Auto ក្រុមហ៊ុន RMA Cambodia (Ford) ក្រុមហ៊ុន K Cambodia (Isuzu) ក្រុមហ៊ុនGTV Motor។ក្រុមហ៊ុនទាំងនេះ គឺនាំចូលគ្រឿងបង្គំ ដើម្បីតំឡើងជារថយន្ដថ្មី សម្រាប់ផ្គត់ផ្គង់ក្នុងស្រុក ។

លោកបន្ដទៀតថា៖ សម្រាប់ក្រុមហ៊ុនផ្សេងទៀតដែលកំពុងរៀបចំនិងត្រៀមបើកដំណើរការ រួមមាន៖ ក្រុមហ៊ុន HGB Motors Assembly, ក្រុមហ៊ុន EM Automotive, , ក្រុមហ៊ុន Toyata Tsusho Manufacturing, ក្រុមហ៊ុន China Matrix Technology Group-Horche។

កត្ដាដែលធ្វើឲ្យមានការកើនឡើងនូវរោងចក្រដំឡើងរថយន្ដថ្មីនៅកម្ពុជា ដោយសារតែកំណើនសេដ្ឋកិច្ចកម្ពុជា មានភាពល្អប្រសើរ និងកំណើននៃការប្រើប្រាស់រថយន្ដថ្មី ក៏មានការកើនឡើង និងមានការលើកទឹកចិត្ដដល់អ្នកវិនិយោគនៅក្នុងប្រទេសកម្ពុជាពីរាជរដ្ឋាភិបាល។ ការដំឡើងរោងចក្ររថយន្ដថ្មីនៅកម្ពុជា ជួយបង្កើនចំណូលជូនប្រជាពលរដ្ឋ ដោយបានបង្កើតការងារ និងជំនួសឲ្យការនាំចូលរថយន្ដថ្មី ទាំងស្រុងពីក្រៅប្រទេស និងចូលរួមចំណែកក្នុងសេដ្ឋកិច្ចជាតិ ជាមួយនឹងចំណូលពន្ធផ្សេងៗ។ លើសពីនោះទៀត ក៏បានបង្កើនសមត្ថភាពរបស់ប្រជាពលរដ្ឋនៅក្នុងស្រុកឲ្យកាន់តែមានជំនាញ៕