ភ្នំពេញ៖ បើទោះជាមានភាពមិនប្រាកដប្រជាលើបញ្ហាពន្ធគយ និងវិបត្តិសាកលក៏ដោយ ការនាំចេញរបស់កម្ពុជានៅឆ្នាំ២០២៥ បានកើនឡើងរហូតដល់ជាង១៥ភាគរយ។ នេះបើយោងតាមសភាពាណិជ្ជកម្មអន្តរជាតិ(International Business Chamber-IBC)។

សភាពាណិជ្ជកម្មអន្តរជាតិ IBC បានឱ្យដឹងថា ៖ រយៈពេល ៦ឆ្នាំចុងក្រោយ ចាប់ពីឆ្នាំ២០២០ ដល់ឆ្នាំ២០២៥ ការនាំចេញរបស់កម្ពុជាបន្តមានកំណើនរហូត ដោយក្នុងនោះ ឆ្នាំ២០២០ មានទំហំជាង ១៥ពាន់លាន, ឆ្នាំ២០២១ ជាង ១៩ពាន់លាន, ឆ្នាំ២០២២ ជាង ២២ពាន់លាន, ឆ្នាំ២០២៣ ជិត ២៣ពាន់លាន ចំណែកនៅឆ្នាំ២០២៥ មានទំហំជាង ៣០ពាន់លានដុល្លារ ធៀបនឹងឆ្នាំ២០២៤ ដែលមានជាង ២៦ពាន់លានដុល្លារ កើនប្រមាណជាង ១៥ភាគរយ។

ប្រភពដដែលនេះបានឱ្យដឹងថា៖ ការនាំចេញរបស់កម្ពុជាទៅអាម៉េរិកកើនឡើង២៨ភាគរយ ទៅអឺរ៉ុបកើន១២ភាគរយ តែការនាំចេញទៅចិនថយចុះ ៤ភាគរយ និងទៅអាស៊ី កើន១% ដែលក្នុងនោះរួមមានដូចជា ការនាំចេញគ្រឿងតុក្កតា(Toys) គ្រឿងហ្គេម(Games) និងសម្ភារកីឡា (Sports) បានកើនឡើងរហូងដល់១១៦ភាគរយ, យានជំនិះកើន ៥០% ផលិតផលកៅស៊ូ កើន៣៤% គ្រឿងសង្ហារឹមកើន ៣៤% គ្រឿងអគ្គិសនី កើន ២៤%  ប៉ុន្តែផលិតផលកសិកម្ម បានថយចុះ ៦%។

លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យកម្ពុជាបានប្រាប់ AMS Economy ថា ៖ កម្ពុជា ជាប្រទេសឧស្សាហកម្មនាំចេញ ហើយការនាំចេញរបស់កម្ពុជា មានការកើនឡើងជាលំដាប់ ។ មុនពេលកូវីដ១៩ ការនាំចេញបានធ្លាក់ចុះ តែក្រោយពីកូវីដ តម្រូវការប្រើប្រាស់បានងើបឡើងមកវិញ ហើយវិស័យកាត់ដេរដើរតួនាទីសំខាន់ផងដែរនៅក្នុងការនាំចេញ។

លោកបញ្ជាក់ថា ៖

«មានតែកម្ពុជាទេ ដែលបាននាំចេញសម្លៀកបំពាក់កាត់ដេរច្រើនជាងគេ ខណៈនៅបណ្តាប្រទេសផ្សេងៗជួបវិបត្តិ ដូចជា ប្រទេសបង់ក្លាដេស ជាដើម។ ចំណែកការនាំចេញវិស័យកសិកម្មមានការថមថយ​ដោយសារជម្លោះព្រំដែនកម្ពុជា-ថៃ ព្រោះការនាំចេញទៅប្រទេសថៃថយចុះ ហើយការនាំចេញទៅប្រទេសវៀតណាមក៏ថយដែរ ដោយសារទំនិញកសិកម្មបានធ្លាក់ថ្លៃ។ មួយទៀត កំណើនតម្រូវការ និងការកែច្នៃក្នុងស្រុកបានធ្វើឱ្យការនាំចេញធ្លាក់ចុះលើវិស័យកសិកម្មផងដែរ»។

ក្នុងពិធីប្រកាសដាក់ឲ្យអនុវត្តជាផ្លូវការនូវ «កម្មវិធីលើកកម្ពស់ភាពប្រកួតប្រជែង បង្កើនពិពិធកម្ម និងពង្រឹងភាពធន់ ដើម្បីជំរុញកំណើនសេដ្ឋកិច្ចក្នុងបរិការណ៍សកល ដែលមានភាពមិនប្រាកដប្រជាខ្ពស់របស់រាជរដ្ឋាភិបាល នីតិកាលទី៧ នៃរដ្ឋសភា» កាលពីថ្ងៃទី២០ ខែមករា ឆ្នាំ២០២៦ ឯកឧត្តម អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី​ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានថ្លែងថា៖សេដ្ឋកិច្ចកម្ពុជា បានស្ទុះងើបឡើងវិញយ៉ាងរហ័ស និងបន្តឈរលើមាគ៌ានៃកំណើនដ៏រឹងមាំបន្ទាប់ពីវិបត្តិនៃជំងឺកូវីដ-១៩ ជាសកល។ យ៉ាងណាក៏ដោយ កម្ពុជាត្រូវបន្តពុះពារជម្នះនូវ​បញ្ហាប្រឈម និងភាពមិនប្រាកដប្រជាខ្ពស់នៃស្ថានភាពតំបន់ ក៏ដូចជាសកល ដោយសារការបន្តប្រឈមមុខខាងភូមិសាស្តនយោបាយកាន់តែស្រួចស្រាល់, ការបែកខ្ញែកនៃសេដ្ឋកិច្ច​សកល ដែលប៉ះពាល់ដល់កិច្ចសហប្រតិបត្តិការ និង ពាណិជ្ជកម្មអន្ដរជាតិ, ការងើបមកវិញនៃនិន្នាការឯកតោភាគីនិយម, ភាពមិនច្បាស់លាស់នៃទស្សនវិស័យកំណើនសេដ្ឋកិច្ចនៃបណ្ដាប្រទេស និងតំបន់ដែលជាដៃគូពាណិជ្ជកម្មសំខាន់ៗរបស់កម្ពុជា និងការប្រែប្រួលអាកាសធាតុ។ល។

ឯកឧត្តមអគ្គបណ្ឌិតសភាចារ្យបានគូសបញ្ជាក់ថា ទោះបីត្រូវប្រឈមនឹងភាពមិនប្រាកដប្រជាកាន់តែស្រួចស្រាល់ក្នុងបរិការណ៍សកល ក៏ដូចជាត្រូវប្រឈមនឹងការរំលោភលើអធិបតេយ្យជាតិ និងបូរណភាពទឹកដីយ៉ាងណាក្ដី​ ក៏សេដ្ឋកិច្ចកម្ពុជា ត្រូវបានរំពឹងថា អាចនឹងសម្រេចបានកំណើនក្នុងរង្វង់ប្រមាណ ៥,២% ក្នុងឆ្នាំ២០២៥ និងប្រមាណ៥% សម្រាប់ឆ្នាំ២០២៦ នេះ ។

ផ្អែកតាមទិន្នន័យរបស់ក្រុមប្រឹក្សាអភិវឌ្ឍន៍កម្ពុជា​ ការចុះបញ្ជីគម្រោងវិនិយោគពីបរទេសក្នុងឆ្នាំ២០២៥ កន្លងទៅ មានទំហំទុនសរុបប្រមាណ ១០ ប៊ីលានដុល្លារអាម៉េរិក​ មានកំណើន ៤៥% បើធៀបនឹងឆ្នាំ ២០២៤ ។ ជាមួយគ្នា​នេះ ក្នុងវិស័យពាណិជ្ជកម្មក្រៅប្រទេស​ ការនាំចេញរបស់កម្ពុជាក្នុងឆ្នាំ២០២៥ ក៏បន្តរក្សាបាននូវចលនការកំណើនល្អគួរឲ្យកត់សម្គាល់។ តួយ៉ាងការនាំចេញសរុបក្នុងឆ្នាំ២០២៥ បានកើនប្រមាណជាង ១៥%, បើធៀបនឹងឆ្នាំ២០២៤ ។ ចំពោះរំហូរភ្ញៀវទេសចរ, ការធ្វើដំណើរ និងកញ្ចប់ទេសចរណ៍របស់ទេសចរបរទេសមកកាន់កម្ពុជា ក៏នៅដំណើរការជាធម្មតា និងមាននិន្នាការកើនផងដែរ តួយ៉ាងដូចជា ទេសចរមកពីអឺរ៉ុប, អូស្ត្រាលី និង ឥណ្ឌា ៕