ទំពាំងផ្អែម ជាដំណាំមួយប្រភេទដែលមានភាពពេញនិយមទាំងការដាំដុះ និងការទទួលទាន ដោយសារតែវាមានរសជាតិឆ្ងាញ់ អាចច្នៃបានម្ហូបច្រើនមុខ និងមានទីផ្សារល្អ ហើយងាយស្រួលដាំ អាចធន់នឹងអាកាសធាតុគ្រប់រដូវ។ យ៉ាងណាក៏ដោយ អ្នកជំនាញកសិកម្មបានណែនាំថា បើទោះវាជាប្រភេទដំណាំងាយស្រួលដាំ និងមិនពិបាកថែទាំក្ដី ប៉ុន្តែកសិករក៏គួរតែចេះពីបច្ចេកទេសដាំឱ្យបានត្រឹមត្រូវទើបអាចទទួលបានផលច្រើន។

ការដាំទំពាំងផ្អែម ចំណុចចាប់ផ្តើមដំបូងដែលកសិករត្រូវគិតគូរមុនគេគឺការជ្រើសរើសពូជឱ្យបានត្រឹមត្រូវ ដូចជា ពូជណាដែលធន់នឹងការប្រែប្រួលអាកាសធាតុ ធន់សត្វល្អិត និងធន់នឹងជំងឺផងដែរ។ បន្ទាប់ពូរើសពូជរួចហើយ គេត្រូវរៀបចំដីសម្រាប់ដាំដុះ ដោយគេត្រូវភ្ជួរដី ១-២ដងដើម្បីបន្ធូរដី និងត្រឡប់កាកសំណល់ដំណាំ និងស្មៅចូលក្នុងដី រួចហាលដីពី ៧-១០ថ្ងៃ។

បន្ទាប់ពីភ្ជួរដីហើយ អ្នកដាំត្រូវជីករណ្ដៅទំហំកន្លះម៉ែត្រ បួនជ្រុង ជម្រៅកន្លះម៉ែត្រ រួចដាក់ជីកំប៉ុស្តិ៍ ឬជីលាមកសត្វមួយបង្គី។ លុះពេលដាំ គេត្រូវដាក់កំប្លោក ឬចំបើងដើម្បីរក្សាសំណើមដី ហើយកូនឫស្សីត្រូវដាំក្នុងខែប្រាំង ទើបឫស្សីអាចដុះលូតលាស់ល្អ និងធន់នឹងទឹកភ្លៀងនៅរដូវវស្សា។

ចំពោះការថែទាំ កសិករត្រូវជម្រះស្មៅឱ្យបាម្ដងក្នុងមួយឆ្នាំ ហើយនៅពេលកូនឫស្សីបានអាយុពី ៦ខែត្រូវចាប់ផ្ដើមកាត់ដើមខ្លះចេញពីគុម្ពដើម្បីកុំឱ្យណែនពេក ពោលគឺត្រូវទុកតែ ៣-៥ដើមប៉ុណ្ណោះ។ បន្ថែមលើនេះ ដើម្បីឱ្យឫស្សីដុះលូតលាស់ល្អ គេត្រូវបន្ថែមជី តែមុនដាក់ជី គេត្រូវជីករណ្ដៅជុំវិញគល់រួចដាក់ជីលាមកសត្វ ឬជីកំប៉ុស្តិ៍ ហើយយកដីលប់។

សម្រាប់ការដាក់ជីនេះទៀតសោត គេត្រូវធ្វើទន្ទឹមនឹងពេលធ្វើស្មៅ ដែលគេអាចប្រើជីលាមកសត្វដូចជា លាមកគោ លាមកចៀម លាមកជ្រូក និងលាមកមាន់ ដើម្បីជួយបង្កើនជីជាតិដី ធ្វើឱ្យដីធូរ បង្កើតសត្វល្អិតក្នុងដី ជំរុញការលូតលាស់ទំពាំង កាត់បន្ថយសត្វល្អិតចង្រៃ ជំងឺទំពាំង និងរក្សាសំណើមដីបានល្អសម្រាប់បន្សាំទៅនឹងភាពរាំងស្ងួតដែលជាឥទ្ធិពលនៃការប្រែប្រួលអាកាសធាតុ។ មួយវិញទៀត ការគ្រប់គ្រងគម្របដីក៏មានសារៈសំខាន់ផងដែរ ដែលអ្នកដាំអាចប្រើកំប្លោក ឬស្លឹករុក្ខជាតិគ្របលើគល់ទំពាំងបន្ទាប់ពីដាំ ដើម្បីរក្សាសំណើមដី ការពារការហូរច្រោះ ការពារកុំឱ្យស្មៅដុះ និងផ្ដល់ជីជាតិឱ្យទៅដីវិញ។ ក្រៅពីនេះ ទំពាំងផ្អែមជាដំណាំអាចទ្រាំនឹងអាកាសធាតុរាំងស្ងួតបាន តែវាមិនអាចធន់នឹងការជាំទឹកបានទេ ដែលគេត្រូវការស្រោចទឹកវាប្រមាណ ១៥ដងក្នុងមួយខែនារដូវប្រាំង។

បន្ទាប់ដាំហើយប្រមាណ ១០-១២ខែ ចំពោះពូជស្រាលគឺអាចប្រមូលផលបានហើយ តែសម្រាប់ពូជធ្ងន់គឺអាចយូរជាងនេះ ហើយក្នុងមួយគុម្ពអាចប្រមូលបាន ២០គីឡូក្រាម ហើយអាចប្រមូលបានមិនតិចជាង ២០ឆ្នាំនោះទេ។ 

គួរបញ្ជាក់ដែរថា ទំពាំងផ្អែមត្រូវបានគេប្រើប្រាស់ជាម្ហូបអាហារដែលមានសារៈប្រយោជន៍ច្រើនសម្រាប់សុខភាពដូចជា ជួយសម្រកទម្ងន់ កាត់បន្ថយហានិភ័យជម្ងឺមហារីក ពង្រឹងប្រព័ន្ធភាពស៊ាំ ជួយពង្រឹងសុខភាពបេះដូង ទប់ទល់នឹងជំងឺផ្លូវដង្ហើម ហើយអាចព្យាបាលនៅពេលពស់ចឹក ឬសត្វទិចផងដែរ៕