ភ្នំពេញ៖ មជ្ឈមណ្ឌលបណ្តុះធុរកិច្ចថ្មី “តេជោ” ក្នុងនាមជាប្រតិបត្តិករនៃថ្នាលផ្លាស់ប្តូរទិន្នន័យកម្ពុជា (CamDX) នៃក្រសួងសេដ្ឋកិច្ច និងហិរញ្ញវត្ថុ និងអគ្គនាយកដ្ឋានអត្តសញ្ញាណកម្មនៃក្រសួងមហាផ្ទៃ បានរៀបចំសិក្ខាសាលាផ្សព្វផ្សាយស្តីពី”ការយកកម្រៃសេវាលើការផ្ទៀងផ្ទាត់ទិន្នន័យអត្តសញ្ញាណបុគ្គលតាមរយៈថ្នាលផ្លាស់ប្តូរទិន្នន័យកម្ពុជា(CamDX)”។

សិក្ខាសាលានេះទទួលបានអ្នកចូលរួមប្រមាណជាង ២០០នាក់ មកពីក្រសួង ស្ថាប័ននៃរាជរដ្ឋាភិបាល ដែលជាថ្នាក់ដឹកនាំបច្ចេកទេស, មន្ត្រីរាជការ និងពីវិស័យឯកជន ជាតំណាងគ្រឹះស្ថានហិរញ្ញវត្ថុ ធនាគារ ក្រុមហ៊ុនធានារ៉ាប់រង ក្រុមហ៊ុនផ្តល់សេវាទូរគមនាគមន៍ និងសមាគមធុរកិច្ច ។

បណ្ឌិត តាំង ងួនលី នាយកប្រតិបត្តិមជ្ឈមណ្ឌលបណ្តុះធុរកិច្ចថ្មី “តេជោ” បានមានប្រសាសន៍ថា៖ សិក្ខាសាលានាព្រឹកថ្ងៃ ទី០៥ ខែធ្នូ ឆ្នាំ២០២៤ នៅសណ្ឋាគារសូហ្វីតែលភ្នំពេញភូគីត្រានេះ មានគោលបំណងផ្សព្វផ្សាយប្រកាសអន្តរក្រសួងស្តីពីការផ្តល់សេវារដ្ឋបាលលើការផ្ទៀងផ្ទាត់ទិន្នន័យអត្តសញ្ញាណបុគ្គល បញ្ជាក់អត្តសញ្ញាណបុគ្គល និងបញ្ជាក់ភាពត្រឹមត្រូវនៃទិន្នន័យអត្តសញ្ញាណបុគ្គល ដែលសេវាចំនួន៤ក្នុងប្រកាសអន្តរក្រសួងនេះ កំពុងត្រូវបានប្រើប្រាស់សាកល្បងដោយស្ថាប័នរដ្ឋ និងវិស័យឯកជនជាសមាជិកនៃថ្នាល CamDX ។

លោកបណ្ឌិតបានបន្តថា៖ សិក្ខាសាលាថ្ងៃនេះបានឆ្លុះបញ្ជាំងពីការធ្វើការជាតួអង្គតែមួយនៃស្ថាប័នរដ្ឋាភិបាល ក្នុងការផ្តល់សេវាផ្ទៀងផ្ទាត់ទិន្នន័យអត្តសញ្ញាណបុគ្គលដល់សេវាសាធារណៈរបស់រដ្ឋ និងប្រព័ន្ធឌីជីថលរបស់វិស័យឯកជនតាមថ្នាល CamDX សំដៅធ្វើឲ្យប្រសើរនូវការផ្តល់សេវាសាធារណៈរបស់រដ្ឋ និងបង្កើនប្រសិទ្ធភាពនៃប្រតិបត្តិការអាជីវកម្មរបស់វិស័យឯកជន តាមទម្រង់ឌីជីថល ស្របតាមមុំទី ៥ នៃយុទ្ធសាស្ត្របញ្ជកោណ-ដំណាក់ទី ១ របស់រាជរដ្ឋាភិបាល។ បន្ថែមពីនេះ សមិទ្ធផលនេះក៏ជាគំរូដល់ក្រសួងស្ថាប័នដែលកំពុងគ្រប់គ្រងទិន្នន័យគោល ពិចារណាផ្តល់លទ្ធភាពបើកផ្ទៀងផ្ទាត់ទិន្នន័យ ក្នុងប្រព័ន្ធអេកូឡូស៊ីរួមតែមួយ។

ក្នុងឱកាសនោះបទបង្ហាញចំនួន ៤ ត្រូវបានធ្វើឡើងដោយក្រុមការងារប្រតិបត្តិករនៃថ្នាល CamDX និងអគ្គនាយកដ្ឋានអត្តសញ្ញាណកម្មនៃក្រសួងមហាផ្ទៃ រួមមាន៖ (១)អំពីថ្នាលផ្លាស់ប្តូរទិន្នន័យកម្ពុជា (CamDX), (២) ការស្នើសុំចូលជាសមាជិកថ្នាល CamDX និងស្នើសុំប្រើប្រាស់សេវា ដែលមាននៅលើថ្នាល CamDX, (៣) ការងារបច្ចេកទេសនៃការធ្វើសន្ធានកម្មជាមួយថ្នាល CamDX និង (៤) យន្តការនៃការយកកម្រៃសេវាលើការផ្ទៀងផ្ទាត់ទិន្នន័យអត្តសញ្ញាណបុគ្គល, បញ្ជាក់អត្តសញ្ញាណបុគ្គល និង បញ្ជាក់ភាពត្រឹមត្រូវនៃទិន្នន័យអត្តសញ្ញាណបុគ្គល។

ឧត្តមសេនីយ៍ឯក តុប នេត អគ្គនាយកនៃអគ្គនាយកដ្ឋានអត្តសញ្ញាណកម្មនៃក្រសួងមហា​ផ្ទៃ​ បានមានប្រសាសន៍ថា៖ សេវាផ្ទៀងផ្ទាត់ទិន្នន័យអត្តសញ្ញាណបុគ្គលត្រូវបានដាក់ឱ្យប្រើប្រាស់ដោយមិនគិតកម្រៃសេវាពីសមាជិក និងវិស័យឯកជននៃថ្នាល CamDX  រហូតមកដល់ពេលបច្ចុប្បន្ននេះមានរយៈពេលជាង ២ ឆ្នាំមកហើយ ដោយកិច្ចការនេះត្រូវបានចាត់ទុកថាជាការជួយសម្រួលដល់ការអនុវត្តការងារ និងធ្វើធុរកិច្ចទាំងក្នុងវិស័យសាធារណៈ និងវិស័យឯកជន។

ឯកឧត្តមបានបន្ថែមថា៖ ទោះជាយ៉ាងណា មកដល់ពេលបច្ចុប្បន្ន រាជរដ្ឋាភិបាលបានពិនិត្យឃើញពីភាពចាំបាច់ក្នុងការយកកម្រៃសេវាលើការប្រើប្រាស់ APIs សម្រាប់ការផ្ទៀងផ្ទាត់ទិន្នន័យអត្តសញ្ញាណបុគ្គលតាមរយៈថ្នាល CamDX ដើម្បីផ្តល់លទ្ធភាពឱ្យរាជរដ្ឋាភិបាល ក៏ដូចជាស្ថាប័នដែលជាម្ចាស់ APIs បន្តនិរន្តរភាពនៃការគ្រប់គ្រង ធ្វើបច្ចុប្បន្នភាព និងថែទាំប្រព័ន្ធឱ្យកាន់តែប្រសើរ។ ជាស្ថិតិ ក្នុងរយៈពេលជាង ២ឆ្នាំកន្លងទៅនេះ ប្រតិបត្តិការនៃការផ្ទៀងផ្ទាត់ទិន្នន័យអត្តសញ្ញាណបុគ្គលមានចំនួនជិត ២០ លានប្រតិបត្តិការ ដោយក្នុង១ខែជាមធ្យមមានប្រតិបត្តិការប្រហែល ១ លាន កំពុងស្នើសុំផ្ទៀងផ្ទាត់ជាមួយទិន្នន័យអត្តសញ្ញាណបុគ្គលរបស់ក្រសួងមហាផ្ទៃ ដោយសមាជិកពីវិស័យឯកជនចំនួន ៣៥ ៕