សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី CNN បានរាយការណ៍ថា ការដំឡើងពន្ធដោយរដ្ឋបាល Trump លើធ្យូងក្រាភីតនាំចូលដល់ទៅ ៩៣,៥% នឹងបង្កើនថ្លៃដើមនៃការផលិតរថយន្តអគ្គិសនី EV នៅអាម៉េរិក។
កាលពីថ្ងៃព្រហស្បតិ៍ នាយកដ្ឋានពាណិជ្ជកម្មអាម៉េរិកបានប្រកាសដំឡើងពន្ធ ៩៣,៥% លើធ្យូងក្រាភីតដែលនាំចូលពីចិន ដោយចោទប្រកាន់ថា ប្រទេសនេះលក់ធ្យូងក្រាភីតក្នុងតម្លៃក្រោមទីផ្សារនៅអាម៉េរិក។ ការសម្រេចចិត្តនេះត្រូវបានសាទរដោយអ្នកផលិតក្រាភីតក្នុងស្រុក ដោយសារពួកគេត្អូញត្អែរថា អ្នកផលិតចិនគ្របដណ្ដប់លើទីផ្សារអាម៉េរិក ដោយធ្យូងក្រាភីតឆៅមានតម្លៃតិចជាង ២ ដុល្លារប៉ុណ្ណោះក្នុងមួយផោន។ ការនាំចូលធ្យូងក្រាភីតរបស់ចិនទៅកាន់អាម៉េរិកបានកើនឡើងទ្វេដងក្នុងរយៈពេលពីរឆ្នាំ ដោយឈានដល់ ៣៤៧ លានដុល្លារក្នុងឆ្នាំ ២០២៣។ យ៉ាងណាមិញ អ្នកផលិតក្នុងស្រុករបស់អាម៉េរិកមិនបានផលិតក្រាភីតសុទ្ធ ដែលជាតម្រូវការសម្រាប់ផលិតអាគុយ EV នោះទេ។
លោក Mike O’Kronley នាយកប្រតិបត្តិនៃក្រុមហ៊ុនផលិតធ្យូងក្រាភីតអាម៉េរិក Novonix បានលើកឡើងថា ពន្ធគយនឹងជួយបង្កើនការវិនិយោគ និងផលិតកម្មនៅក្នុងស្រុក ដែលនឹងជួយកែប្រែឧស្សាហកម្មធ្យូងក្រាភីតនៅក្នុងអាម៉េរិក។ ការវិនិយោគរបស់ក្រុមហ៊ុនចិនលើផលិតកម្មធ្យូងក្រាភីត បានធ្វើឲ្យពួកគេមានសមត្ថភាពផលិតច្រើន និងជំរុញដល់ការនាំចេញក្នុងបរិមាណច្រើនដូចគ្នា ប៉ុន្តែវាបានរារាំងដល់ការអភិវឌ្ឍន៍រ៉ែសំខាន់ៗរបស់អាម៉េរិក។
កាលពីឆ្នាំមុន រដ្ឋបាល Biden បានដាក់ពន្ធ ២៥% លើធ្យូងក្រាភីតនាំចូលពីចិន ប៉ុន្តែពន្ធនេះបានកើនឡើងបន្ថែម ៩៣,៥% ដែលប្រកាសដោយរដ្ឋបាល Trump កាលពីថ្ងៃព្រហស្បតិ៍។ ជាលទ្ធផល ធ្យូងក្រាភីតរបស់ចិនអាចនឹងប្រឈមនឹងពន្ធជិត ១៦០% ពីលើការយកពន្ធស្រាប់ផ្សេងៗទៀតដែលរដ្ឋបាល Trump បានដាក់លើប្រទេសនេះ។ យ៉ាងណាមិញ វិធានការនេះមិនត្រឹមតែបង្កើនភាពតានតឹងពាណិជ្ជកម្មរវាងអាម៉េរិក និងចិនប៉ុណ្ណោះទេ ប៉ុន្តែថែមទាំងប៉ះពាល់ដល់ការផលិតរថយន្ត EV របស់អាម៉េរិកទៀតផង។ ជាក់ស្តែង រដ្ឋបាល Trump បានកាត់បន្ថយការគាំទ្ររបស់សហព័ន្ធសម្រាប់រថយន្តអគ្គិសនី ហើយពួកគេកំពុងស្វែងរកការលុបបំបាត់ប្រាក់កម្ចីរបស់រដ្ឋាភិបាលសម្រាប់ជួយជាមូលនិធិដល់ការសាងសង់រោងចក្រ EV និងរោងចក្រអាគុយ។ មិនត្រឹមតែប៉ុណ្ណោះ កាលពីដើមខែ Trump បានចុះហត្ថលេខាលើច្បាប់លុបចោលឥណទានពន្ធចំនួន ៧ ៥០០ ដុល្លារសម្រាប់អ្នកទិញរថយន្ត EV ។
មិនត្រឺមតែប៉ុណ្ណោះ ឧស្សាហកម្មធ្យូងក្រាភីតអាម៉េរិកដែលជាវត្ថុធាតុដើមមួយនេះមិនគ្រប់គ្រាន់សម្រាប់បំពេញតម្រូវការនោះទេ ហើយពួកគេមិនផលិតក្រាភីតដែលមានគុណភាពខ្ពស់ស្របទៅនឹងតម្រូវការសម្រាប់អាគុយ EV នោះទេ។ ដូច្នោះហើយ អ្នកផលិត EV របស់អាម៉េរិកនឹងប្រឈមលើការចំណាយខ្ពស់សម្រាប់ធ្យូងក្រាភីតនាំចូលពីចិន។ សូម្បីតែ O’Kronley ក៏ទទួលស្គាល់ដែរថា អាម៉េរិកត្រូវការពេលវេលាសម្រាប់ទីផ្សារក្នុងស្រុកដើម្បីតាមឱ្យទាន់សម័យកាល ខណៈដែលធ្យូងក្រាភីតត្រូវចំណាយពេលយូរក្នុងការអភិវឌ្ឍ ដើម្បីឲ្យវាមានលក្ខណៈសម្បត្តិគ្រប់គ្រាន់ក្នុងការផលិតថ្មអគ្គិសនី EV៕
Account
Security
Favourite Content