សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ក្នុងរយៈពេល៣ឆ្នាំមកនេះ ធនាគារសហគ្រាសធុនតូច និងមធ្យមកម្ពុជា (SME BANK) បានផ្ដល់ឥណទានសរុបប្រមាណ៥០០លានដុល្លារអាមេរិក ដល់សហគ្រាសក្នុងក្របខណ្ឌទូទាំងប្រទេស។ នេះបើតាមលោកបណ្ឌិត លឹម អូន អគ្គនាយកធនាគារសហគ្រាសធុនតូច និងមធ្យមកម្ពុជា។
លោកបណ្ឌិត លឹម អូន បានឱ្យដឹងថា៖ ការផ្ដល់ឥណទានប្រមាណ៥០០លានដុល្លារនេះមានសហគ្រាសប្រមាណ ៣ពាន់សហគ្រាស ទទួលបានអត្ថប្រយោជន៍ពីសកម្មភាពរបស់ធនាគារសហគ្រាសធុនតូច និងមធ្យមកម្ពុជា។
លោកបានបញ្ជាក់ថា៖ គិតមកដល់ពេលនេះ ទំហំឥណទានសរុបដែលធនាគារទាំងអស់នៅក្នុងប្រទេសកម្ពុជា ផ្ដល់ជូនអតិថិជនមានប្រមាណជិត៦០ពាន់លានដុល្លារ ក្នុងនោះក្រុមអាជីវកម្មនៅក្នុងវិស័យលក់ដុំ-លក់រាយ ទទួលបានច្រើនជាងគេ។
លោកបណ្ឌិត លឹម អូន បានឲ្យដឹងថា កម្ពុជាមានធនាគារ និងស្ថាប័នហិរញ្ញវត្ថុស្របច្បាប់សរុបជាង២០០ ដែលធ្វើការទាក់ទងនឹងការផ្ដល់ឥណទាន ជូនដល់អតិថិជន ហើយសាខាធនាគារមានរាប់ពាន់សាខានៅគ្រប់ទិសទីគ្រប់តំបន់ទាំងអស់នៅក្នុងប្រទេសកម្ពុជា។
ធនាគារសហគ្រាសធុនតូច និងមធ្យមកម្ពុជា ត្រូវបានបង្កើតឡើងក្នុងគោលបំណងអនុវត្ដគោលនយោបាយហិរញ្ញប្បទានរបស់រាជរដ្ឋាភិបាល ដើម្បីគាំទ្រដល់សហគ្រាសធុនតូច និងមធ្យមនៅកម្ពុជា។ ធនាគារសហគ្រាសធុនតូច និងមធ្យម កម្ពុជា ចូលរួមយ៉ាងសកម្មក្នុងការជួយសហគ្រាសធុនតូច និងមធ្យម ដើម្បីជំរុញដល់ផលិតភាព និងប្រសិទ្ធភាព។ គម្រោងនេះជួយសម្រួលដល់ការទទួលបានសេវាហិរញ្ញវត្ថុ ក្នុងគោលបំណងដើម្បីជួយដល់សហគ្រាសធុនតូច និងមធ្យម ដើម្បីបង្កើនចំណែកទីផ្សារ និងចំណូល ហើយនិងផ្តល់ជាឱកាសក្នុងការពង្រីកសក្តានុពលចែកចាយក្រៅប្រទេសផងដែរ។ គិតមកដល់ពេលនេះ SME BANK បានប្រតិបត្ដិការអស់រយៈពេល៣ឆ្នាំហើយ។
Account
Security
Favourite Content