ភ្នំពេញ៖ គិតត្រឹមខែមេសា ឆ្នាំ២០២៥ សមាជិក បេឡាជាតិរបបសន្តិសុខសង្គម (ប.ស.ស.) បានកើនឡើងដល់ប្រមាណ ៣,១លាននាក់ (ស្រី ១,៧លាននាក់) ដែលក្នុងនោះបុគ្គលដែលស្ថិតក្នុងវិស័យសាធារណៈមានប្រមាណ ៥១ម៉ឺននាក់ (ស្រី ១៥ម៉ឺននាក់), កម្មករនិយោជិតមានប្រមាណ ១,៩លាននាក់ (ស្រី ១,១លាននាក់), បុគ្គលស្វ័យនិយោជន៍មានប្រមាណ ៥០ម៉ឺននាក់ (ស្រី ៣១ម៉ឺននាក់) និងអ្នកក្នុងបន្ទុកសមាជិក ប.ស.ស. មានប្រមាណ ១៩ម៉ឺននាក់ (ស្រី១១ម៉ឺននាក់)។

នេះបើតាមការឱ្យដឹងរបស់ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាល វិជ្ជាជីវៈ ថ្លែងក្នុងវេទិកាផ្សព្វផ្សាយស្តីពី «ប្រព័ន្ធគាំពារសង្គមនៅប្រទេសកម្ពុជា» នាថ្ងៃទី១៩ ខែឧសភា ឆ្នាំ២០២៥ នៅវិមានរដ្ឋសភា។

ឯកឧត្តមរដ្ឋមន្ត្រីបានលើកឡើងទៀតថា៖ សម្រាប់អាណត្តិរាជរដ្ឋាភិបាលនីតិកាលទី៧ នៃរដ្ឋសភា បើគិតត្រឹមថ្ងៃទី៣០ ខែមេសា ឆ្នាំ២០២៥ នេះ ប.ស.ស. បានបើកផ្តល់ប្រាក់ឧបត្ថម្ភរបស់រាជរដ្ឋាភិបាលសម្រាប់សមាជិក ប.ស.ស. ជាស្ត្រីមានផ្ទៃពោះ ចំនួន ១៧៤ ៥៣៨នាក់ និងកុមារអាយុក្រោម ២ឆ្នាំ ចំនួន ១៥៣ ៤៤៧នាក់ ដោយបានចំណាយថវិកាសរុបចំនួន ១៧៨ ៣៧៥លានរៀល សម្រាប់ពេលពិនិត្យផ្ទៃពោះមុនសម្រាល ពេលសម្រាលកូននៅមូលដ្ឋានសុខាភិបាលសាធារណៈ និងពេលពិនិត្យសុខភាពក្រោយសម្រាល និងយកកូនទៅចាក់ថ្នាំបង្ការរហូតដល់អាយុ ២ឆ្នាំ ក្នុងគោលបំណងលើកកម្ពស់សុខភាព និងអាហារូបត្ថម្ភមាតាទារកនិងកុមារ។ បើគិតចាប់តាំងពីការចាប់ផ្ដើមអនុវត្ត (១ មករា ២០១៨) រហូតមកដល់ថ្ងៃទី៣០ ខែមេសា ឆ្នាំ២០២៥ ប.ស.ស. បានបើកផ្តល់ប្រាក់ឧបត្ថម្ភរបស់រាជរដ្ឋាភិបាលសម្រាប់សមាជិក ប.ស.ស. ជាស្ត្រីមានផ្ទៃពោះ ចំនួន ៦៤២ ៥០២ នាក់ និងកុមារអាយុក្រោម ២ឆ្នាំ ចំនួន ៦៦៣ ៦៣៥នាក់ ដោយបានចំណាយថវិកាសរុបចំនួន ៣៣១ ៦៧១លានរៀល។

ថ្លែងក្នុងវេទិកាផ្សព្វផ្សាយ ស្តីពីប្រព័ន្ធគាំពារសង្គមនៅប្រទេសកម្ពុជា ដែរនោះ ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានឱ្យដឹងថា៖ គិតត្រឹមថ្ងៃទី២៦ ខែមេសា ឆ្នាំ២០២៥ កម្មវិធីជាតិជំនួយសង្គមក្នុងកញ្ចប់គ្រួសារ បាន និងកំពុងបើកផ្តល់ប្រាក់ឧបត្ថម្ភគោលជូនគ្រួសារមានបណ្ណសមធម៌សរុបចំនួន ៧១៥,៣៤៧ គ្រួសារ និងបានផ្តល់ប្រាក់ឧបត្ថម្ភបន្ថែមសម្រាប់សមាជិកគ្រួសារដែលមានភាពងាយរងគ្រោះដូចជា ស្រ្តីមានផ្ទៃពោះ កុមារអាយុក្រោម២ឆ្នាំ ជនមានពិការភាព មនុស្សចាស់អាយុ ៦០ឆ្នាំឡើង អាហារូបករណ៍សិស្សក្រីក្រនៅបឋមសិក្សានិងមធ្យមសិក្សាចំណេះទូទៅសាធារណៈ និងអ្នកផ្ទុកមេរោគអេដស៍ ជំងឺអេដស៍ ដោយរដ្ឋបានចំណាយថវិកាសរុប ៤៣២ ប៊ីលាន ៩០៩លាន ៤៤២ពាន់រៀល ស្មើនឹងប្រមាណជាង ១០៨,២២លានដុល្លារអាមេរិក។

ឯកឧត្តមរដ្ឋមន្រ្តី បានបន្តថា៖

«កម្មវិធីជាតិជំនួយសង្គម មូលនិធិជាតិជំនួយសង្គមនៃក្រសួងសង្គមកិច្ច អតីតយុទ្ធជន និងយុវនិតិសម្បទា ក៏ទទួលអនុវត្តរបបសន្តិសុខសង្គមផងដែរ រួមមាន របបសន្តិសុខសង្គមសម្រាប់អតីតមន្រ្តីរាជការស៊ីវិល និងរបបសន្តិសុខសង្គមសម្រាប់អតីតយុទ្ធជន។ ការដាក់ឱ្យអនុវត្តនូវរបបសន្តិសុខសង្គមនេះ គឺជាការគិតគូរ និងឆ្លើយតបពីសំណាក់រាជរដ្ឋាភិបាលចំពោះគុណូបការៈរបស់អតីតមន្រ្តីរាជការស៊ីវិល និងអតីតយុទ្ធជន ដែលបានខិតខំប្រឹងប្រែងបំពេញការងារកន្លងមក ក៏ដូចជាការធ្វើពលិកម្ម បូជាសាច់ស្រស់ឈាមស្រស់សម្រាប់បុព្វហេតុសង្គមជាតិ ក្នុងស្មារតីរួមចំណែកកសាងនិងអភិវឌ្ឍប្រទេសជាតិ ឱ្យមានភាពរីកចម្រើន និងមានសុខសន្តិភាពដូចសព្វថ្ងៃនេះ»។

បច្ចុប្បន្ននេះ មូលនិធិជាតិជំនួយសង្គមបាន និងកំពុងបើកផ្តល់ប្រាក់របបសន្តិសុខសង្គម ជូនអតីតមន្រ្តីរាជការស៊ីវិលសរុបចំនួន ៥៦,៤៧៥នាក់ និងអតីតយុទ្ធជនសរុបចំនួន ១១៥,២៩៦នាក់ ដោយការបើកផ្តល់នេះធ្វើឡើងចំនួន ០២លើកក្នុងមួយខែតាមរយៈប្រព័ន្ធធនាគារកាណាឌីយ៉ា និងធនាគារអេស៊ីលីដា។ ទន្ទឹមនឹងរបបសន្តិសុខសង្គមប្រចាំខែ ក៏មានការផ្តល់នូវប្រាក់ធានារ៉ាប់រងសង្គម ប្រាក់បូជាសពក្នុងពេលដែលទទួលមរណភាពផងដែរ។

ជារៀងរាល់ឆ្នាំ រាជរដ្ឋាភិបាលតែងតែគិតគូរតម្លើងប្រាក់របបសោធន ជូនអតីតមន្រ្តីរាជការស៊ីវិល និងអតីតយុទ្ធជន។ គិតត្រឹមខែមេសាឆ្នាំ២០២៥នេះ ប្រាក់សោធននិវត្តន៍ទាបបំផុតចំនួន ៨៤៥,០០០រៀល និងបន្ថែម ២០,០០០រៀល សម្រាប់និវត្តជនដែលបានចូលនិវត្តមុនឆ្នាំ២០២៤។ ទាំងនេះ គឺសុទ្ធតែជាការគិតគូរ និងយកចិត្តទុកដាក់ពីសំណាក់រាជរដ្ឋាភិបាល ពិសេស សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា៕