បរទេស៖ យោងតាមប្រភពពី Oil Price បានរាយការណ៍ថា ក្រុមហ៊ុនចម្រាញ់ប្រេងអាស៊ីកំពុងកាត់បន្ថយការផ្គត់ផ្គង់ប្រេងនៅមជ្ឈិមបូព៌ាដោយសារតម្លៃឡើងថ្លៃ ហើយកំពុងចាប់អារម្មណ៍ប្រេងឆៅពីសហរដ្ឋអាមេរិក និងប្រេស៊ីល។

ទន្ទឹមនឹងនេះ តម្លៃប្រេងឆៅម៉ាក Brent ឡើងថ្លៃ ០,៦ ភាគរយ ឬ ៨៣,២៧ ដុល្លារក្នុងមួយបារ៉ែល ខណៈដែលតម្លៃប្រេងឆៅម៉ាក West Texas Intermediate (WTI) ឡើងថ្លៃ ០,៨ ភាគរយ ឬ ៧៩,២៣ ដុល្លារក្នុងមួយបារ៉ែល។ យ៉ាងណាក៏ដោយ ការផ្តោតលើការធ្វើពិពិធកម្មនេះគឺមានកម្រិតមធ្យម ដោយអារ៉ាប៊ីសាអូឌីតនៅតែជាអ្នកផ្គត់ផ្គង់កំពូលដល់អាស៊ីទាំងមូល ដែលនាំមុខទាំងសហរដ្ឋអាមេរិក និងប្រេស៊ីល។ ស្របពេលដែលតម្លៃប្រេងឆៅរបស់រុស្ស៊ីក៏មានតម្លៃថោកសមរម្យផងដែរនោះ គេមិនទាន់ច្បាស់ទេថា តើវានឹងក្លាយទៅជានិន្នាការមួយដែរ ឬអត់?

Clyde Russell អ្នកសរសេរអត្ថបទមកពីរ៉យទ័របានរាយការណ៍ថា ការនាំចូលប្រេងឆៅរបស់អាស៊ីពីអារ៉ាប៊ីសាអូឌីតបានធ្លាក់ចុះមកនៅត្រឹម ៤,៨៨ លានបារ៉ែលជារៀងរាល់ថ្ងៃកាលពីខែមុន ដែលធ្លាក់ចុះពី ៥,០៧ លានបារ៉ែលក្នុងខែមីនា និងធ្លាក់ចុះពី ៥,៥២ លានបារ៉ែលនៅក្នុងខែកុម្ភៈ។ ការធ្លាក់ចុះនេះបានកើតឡើងដោយសារការឡើងថ្លៃប្រេងរបស់អារ៉ាប៊ីសាអូឌីតម្តងហើយម្តងទៀត ខណៈដែលតម្រូវការប្រេងឥន្ធនៈចុះខ្សោយ ដែលជាហេតុនាំឱ្យកម្រិតនៃការចម្រាញ់របស់ក្រុមហ៊ុនចម្រាញ់ប្រេងអាស៊ីធ្លាក់ចុះផងដែរ។ ដូច្នោះហើយ ក្រុមហ៊ុនទាំងនោះងាកទៅរកប្រភពផ្សេងដែលមានតម្លៃថោកជាងនេះ។ ចាប់តាំងពីខែមីនាមក អារ៉ាប៊ីសាអូឌីតបានដំឡើងថ្លៃប្រេង ដោយតម្លៃប្រេងម៉ាក Arab Light របស់ខ្លួនឡើងថ្លៃបន្ថែមដល់ទៅ ២,៩០ ដុល្លារដែលលើសតម្លៃស្តង់ដារ។ ការឡើងថ្លៃតម្លៃប្រេងនេះធ្វើឲ្យ Arab Light មានតម្លៃ ៨៣ ដុល្លារក្នុងមួយបារ៉ែល បើធៀបនឹងប្រេងអាម៉េរិកម៉ាក WTI មានតម្លៃ ៧៩ ដុល្លារក្នុងមួយបារ៉ែល។ គេមើលឃើញថា ប្រេងសហរដ្ឋអាម៉េរិកមានតម្លៃទាបជាង ខណៈដែលប្រេងឆៅរបស់ប្រេស៊ីលជាទូទៅមានតម្លៃប្រហាក់ប្រហែនេះ បើធៀបនឹងតម្លៃគោលរបស់សហរដ្ឋអាម៉េរិក។

ទោះជាយ៉ាងណាក្តី ប្រេងពីអាមេរិកមិនមែនជាជម្រើសកំពូលរបស់អ្នកចម្រាញ់អាស៊ីទេ ដោយសារតែការដឹកជញ្ជូនដ៏វែងឆ្ងាយត្រូវចំណាយបន្ថែមពីលើថ្លៃដើម ដែលធ្វើឱ្យការផ្លាស់ប្តូរមិនមានភាពប្រែប្រួលច្រើននោះទេ។ លើសពីនេះ សមត្ថភាពចម្រាញ់ពីប្រេងឆៅរបស់សហរដ្ឋអាមេរិកអាចនៅមានកម្រិត ដោយសារការទិញនៅមានកម្រិត។ គេកំពុងព្រួយបារម្ភថា ការចម្រាញ់នៅមានកម្រិតអាចប៉ះពាល់ដល់តម្រូវការនៅប៉ុន្មានខែខាងមុខនេះ ដោយសារតម្រូវការនៅក្នុងអាស៊ីទាំងមូលមានភាពរឹងមាំ ជាពិសេសប្រទេសចិន។

យ៉ាងណាមិញ ទិន្នន័យអំពីការកើនឡើងការនាំចូលរបស់អាស៊ីនៃប្រេងឆៅសហរដ្ឋអាមេរិក និងប្រេស៊ីលបានបង្ហាញថា ការផ្លាស់ប្តូរនេះអាចសមហេតុផលសម្រាប់ក្រុមហ៊ុនចម្រាញ់ប្រេងមួយចំនួនដែលបានផ្តល់លក្ខខណ្ឌបច្ចុប្បន្ន។ Russell ព្យាករណ៍ថា ក្រុមហ៊ុនចម្រាញ់ប្រេងអាស៊ីនឹងបន្តទិញប្រេងអាមេរិក និងប្រេស៊ីលបន្ថែមទៀត រហូតដល់អារ៉ាប៊ីសាអូឌីតកាត់បន្ថយតម្លៃប្រេងរបស់ពួកគេ។ គេសង្ឃឹមថា ការធ្វើពិពិធកម្មអាចដំណើរការដោយមានប្រសិទ្ធភាព ដោយសារ OPEC+ អាចនឹងប្រកាន់ខ្ជាប់នូវគោលនយោបាយកាត់បន្ថយផលិតកម្មរបស់ខ្លួននៅក្នុងកិច្ចប្រជុំបន្ទាប់នៅថ្ងៃទី១ ខែមិថុនាខាងមុខនេះ។ ទោះបីជាអារ៉ាប៊ីសាអូឌីតមានបំណងចង់ឲ្យមាននិន្នាការតម្លៃប្រេងឡើងថ្លៃក៏ដោយ ប៉ុន្តែមិនទំនងជាកាត់បន្ថយទិន្នផលប្រេងនោះទេ ដោយសាររុស្ស៊ីដែលជាដៃគូ OPEC+ គឺជាអ្នកផ្គត់ផ្គង់ប្រេងដ៏ធំបំផុតរបស់ចិន និងឥណ្ឌា៕