សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បាត់ដំបង ៖ ស្ថិតនៅក្នុងភូមិខ្សាច់ពោយ សង្កាត់វត្តគរ ក្រុងបាត់ដំបង នៃខេត្តបាត់ដំបង វិចិត្រសាលមួយដែលមាន ឈ្មោះថា «វិចិត្រសាលពិរព័ណ៌សន្តិភាពកម្ពុជា» ជាវិចិត្រសាលឯករាជ្យ ដែលបង្កើតឡើងដោយជនបរទេសមួយរូប។
រូបភាព វត្ថុតាង និងផែនទីនានា ត្រូវបានយកមករក្សាទុកនៅក្នុងបរិវេនរបស់វិចិត្រសាល សម្រាប់ឲ្យប្រជាជនកម្ពុជាផ្ទាល់ ក៏ដូចជាភ្ញៀវអន្តរជាតិបានស្វែងយល់ពីអតីតកាលរបស់កម្ពុជា។ មិនត្រឹមតែជាការដើរមើលហើយស្វែងយល់ប៉ុណ្ណោះទេ គោលបំណងសំខាន់ក្នុងការបង្កើតវិចិត្រសាលនេះឡើង គឺដើម្បីផ្សះផ្សារនូវការឈឺចាប់ដែលបង្កឡើងដោយសង្គ្រាម និងបង្កើតឡើងវិញនូវសន្តិភាពក្នុងស្រទាប់យុវជនជំនាន់ថ្មី។
វិចិត្រសាលនេះបានបង្កើតឡើងក្នុងឆ្នាំ ២០១៨ ដោយបែងចែកជាតំបន់ដាក់តាំងផ្សេងៗគ្នា។ បរិវេននៃវិចិត្រសាលទៀតសោត ត្រូវបានរៀបចំឡើង ដោយប្រើប្រាស់រចនាបថបែបខ្មែរ រីឯបរិស្ថានជុំវិញបានហុំព័ទ្ធទៅដោយដើមឈើខៀវស្រងាត់។
បើតាមលោក Casper Gils ដែលជានាយកវិចិត្រសាល ភ្ញៀវដែលចូលទស្សនាវិចិត្រសាលមិនត្រឹមតែ បានស្វែងយល់ពីប្រវត្តិសាស្ត្រសង្គ្រាមនោះទេ ពួកគេក៏អាចទទួលបានកម្មវិធីអប់រំមួយចំនួនទៀតពីសំណាក់វិចិត្រសាល។ ក្រៅពីនោះ ក៏មានផងដែរនូវដំណើរទេសចរណ៍ជុំវិញវិចិត្រសាលដើម្បីពន្យល់ឱ្យកាន់តែស៊ីជម្រៅ។
លោក Casper Gils បានរៀបរាប់ថា ៖
“យើងមានពិព័រណ៍ចំនួន ៩ ដែលបែងចែកជាអគារសំខាន់ៗចំនួន ៣ ដែលបង្ហាញពីប្រភេទផ្សេងគ្នានៃការងារសន្តិភាពនៅកម្ពុជា៖ ការបញ្ចប់សង្រ្គាមនៅកម្ពុជា (ការចរចាសន្តិភាព និងការបញ្ចប់សង្រ្គាម) ក្រោយជម្លោះងើបឡើងវិញ (ការដោះស្រាយអាវុធ និងគ្រាប់មីន កសាងប្រទេសឡើងវិញ) ការផ្សះផ្សា និងការព្យាបាល (ជួសជុលការខូចខាតសង្គម និងខាងវិញ្ញាណនៃសង្គ្រាម)។”
វិចិត្រសាលនេះផងដែរ បានបើកឱ្យមានការចូលទស្សនាដោយសេរី ស្វាគមន៍យ៉ាងកក់ក្ដៅចំពោះអ្នក ដែលមានបំណងចង់សិក្សាស្វែងយល់។ ប៉ុន្តែយ៉ាងណា យុវជន យុវវ័យ កាន់តែទទួលបានការលើក ទឹកចិត្ត ដោយហេតុថាពួកគេជាធនធានដ៏សំខាន់ក្នុងការរក្សាសន្តិភាពដល់មនុស្សជំនាន់ក្រោយ៕
Account
Security
Favourite Content