ភ្នំពេញ ៖ មន្រ្តីជាន់ខ្ពស់នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានអះអាងថា ក្នុងមួយឆ្នាំៗ កម្ពុជាមានតម្រូវការអំបិល​ចន្លោះពី ៨ម៉ឺន ទៅ ១០ម៉ឺនតោនប៉ុណ្ណោះ ខណៈឆ្នាំ២០២៤កន្លងទៅនេះកម្ពុជាអាចមានលទ្ធភាពផលិត​បានរហូតដល់ប្រមាណជាង ១៦ម៉ឺនតោន ​​លើសពីតម្រូវការចាំបាច់ប្រើប្រាស់ប្រចាំថ្ងៃរបស់ប្រជាពលរដ្ឋក្នុងប្រទេសជិតពាក់កណ្តាល ។

ឯកឧត្តម ហេង សុខគង់ រដ្ឋលេខាធិការ និងជាអ្នកនាំពាក្យក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានមានប្រសាសន៍ឱ្យដឹងថា ក្នុងមួយឆ្នាំៗកម្ពុជាមានតម្រូវការអំបិល​ចន្លោះពី ៨ម៉ឺនតោនទៅ ១០ម៉ឺនតោនប៉ុណ្ណោះ​ ទាំង​អំបិលសម្រាប់បរិភោគ អំបិលកសិកម្ម និងសម្រាប់ឧស្សាហកម្ម ដូច្នេះហើយ​ កាលពីឆ្នាំ២០២៤ ពុំមានការនាំចូលអំបិលពីបរទេសនោះទេ។

យោងតាមរបាយការណ៍របស់ក្រសួងឧស្សាហកម្ម វិទ្យាសាស្រ្តបច្ចេកវិទ្យា និងនវានុវត្តន៍ បានឱ្យដឹងថា ក្នុងឆ្នាំ២០២៤ ទិន្នផលអំបិលនៅកម្ពុជាសរុបមានចំនួន ១៦៨​ ៨៨២ តោន ដែលបានផលិតលើផ្ទៃដីស្រែអំបិលចំនួន ៣​ ៩៨៧.៣៥ហិកតា​ ។  ក្នុងនោះ ខេត្តកំពត មានផ្ទៃដីស្រែអំបិល ៣,៤៨៩.៤៨ហិកតា និងខេត្តកែបមាន ៤៩៧.៨៧ហិកតា ដោយខេត្តកំពតផលិតបាន១២៨,៤៧៤តោន ហើយបាននាំចេញទៅកាន់ទីផ្សារក្រៅប្រទេសចំនួន ៧៤,១៨៥តោន ។

 ឯកឧត្តម ហេង សុខគង់ បានប្រាប់ថា ការផលិតអំបិលលើសពីតម្រូវការនេះ គឺដោយសារកាលពីឆ្នាំ២០២៤ អាកាសធាតុក្តៅ និងអំណោយផលល្អ ដែលធ្វើឱ្យកសិករអាចផលិតអំបិលបានច្រើន។ ជាការកត់សម្គាល់ គ្រាន់តែក្នុងខែមិថុនា និងខែកក្កដា កសិករអាចផលិតបានរហូតដល់ ៤៤ ២៨៣តោន ខណៈ​ជាធម្មតាការផលិតអំបិល គឺស្ថិតនៅចន្លោះខែមករា និងខែកុម្ភៈ។

ឯកឧត្តម បានបញ្ជាក់ថា៖

«ការផលិតអំបិលនេះ គឺកសិកររបស់យើងអាស្រ័យទាំងស្រុងទៅលើអាកាសធាតុផ្ទាល់តែម្តង យើងឃើញថា នៅតាមបណ្តាឆ្នាំនីមួយៗ ការផលិតមានការឡើងចុះ ហើយនៅក្នុងឆ្នាំខ្លះក៏យើងមានការខ្វះខាតអំបិល ត្រូវធ្វើការនាំចូលពីក្រៅប្រទេសផងដែរ ដូចជា នាំចូលប្រទេសឥណ្ឌា ថៃ វៀត​ណាម ជាដើម។ ប៉ុន្តែនៅក្នុងឆ្នាំ២០២៤ គឺយើងផលិតបានលើសតម្រូវការ ហើយពុំមានការនាំចូលនោះទេ»។

ឯកឧត្តម ហេង សុខគង់ បានឱ្យដឹងផងដែរថា អំបិលកម្ពុជា​ បានក្លាយជាទំនិញមានម៉ាកសម្គាល់ភូមិសាស្រ្តទំនិញ (GI) កាលពីឆ្នាំ២០២៣ ​និងទទួលបានការវាយតម្លៃខ្ពស់ពីសំណាក់បណ្តាប្រទេសនៅសហគមន៍អឺរ៉ុបថាជាអំបិលមានគុណភាពល្អ និងសំបូរទៅដោយសារធាតុរ៉ែ ជំនួយទៅដល់សុខភាពអ្នកប្រើប្រាស់ ហើយក៏កំពុងទទួលបានការចាប់អារម្មណ៍ពីទីផ្សារប្រទេសមួយចំនួនក្នុងការនាំចូលទៅប្រទេសគេផងដែរ។

ឯកឧត្តម បានបញ្ជាក់ថា៖

«តាមការពិនិត្យ និងវាយតម្លៃរបស់អ្នកជំនាញនៅសហគមន៍អឺរ៉ុប គឺអំបិលយើងមានសារធាតុរ៉ែរហូតជាង ៨០ប្រភេទ អាចជំនួយទៅដល់សុខភាពអ្នកប្រើប្រាស់​ ហើយអំបិលនោះមានលក្ខណៈផ្អែម មិនប្រៃពេក ហើយក៏មិនរឹងពេកដែរ ​នេះជាលក្ខណៈពិសេសរបស់អំបិលកម្ពុជាយើង។ បច្ចុប្បន្នអំបិល GI របស់យើងមានទីផ្សារធំនៅសហគមន៍អឺរ៉ុប ហើយជប៉ុន សហរដ្ឋអាមេរិក អូស្រ្តាលី និងកូរ៉េខាងត្បូង ក៏កំពុងចាប់អារម្មណ៍លើអំបិលរបស់កម្ពុជាដែរ»។

សូមជម្រាបផងដែរថា បច្ចុប្បន្ននេះ ​ក្រុមផលិតអំបិលមានចំនួន ១៩១ក្រុម ​និងមានសិប្បកម្មចំនួន ៥៤មូលដ្ឋាន ក្នុងនោះ ៣២មូលដ្ឋានទទួលបានអាជ្ញាបណ្ណប្រើប្រាស់ស្លាកសញ្ញាជាតិសម្គាល់អំបិលដែលបានបញ្ចូលអ៊ីយ៉ូដ​។ ឆ្នាំ២០២៤ គឺជាឆ្នាំដែលកម្ពុជា​ផលិតអំបិលបានច្រើនជាងគេ ធៀបនឹងឆ្នាំកន្លងទៅ។ ពោល នៅក្នុងឆ្នាំ២០២៣ កម្ពុជាផលិតបាន ៨១,៩០៤តោន, ឆ្នាំ២០២២ ផលិតបាន៣២,៩០០តោន, ឆ្នាំ២០២១ ផលិតបាន៧៥,៣៤៥តោន។  ឆ្នាំ២០២០ ផលិតបាន៩៦,៥៤៤តោន, ឆ្នាំ២០១៩ ផលិតបាន ២៨,៣០០តោន និងឆ្នាំ២០១៨ កម្ពុជាផលិតបាន៣០០០តោន ៕