កម្ពុជា និងសហភាពអឺរ៉ុប (EU) បានឯកភាពគ្នា និងប្តេជ្ញាបន្តកិច្ចសហប្រតិបត្តិការជិតស្និទ្ធរវាងទ្វេភាគី និងកិច្ចសន្ទ​នា​ដ៏ល្អ ក្នុងស្មារតីជួយបំពេញឱ្យគ្នា និងគោរពគ្នាទៅវិញទៅមក សម្រាប់កិច្ចសហប្រតិបត្តិការពាណិជ្ជកម្មក្នុងតំបន់ ផងដែរ។

ការប្តេជ្ញាចិត្តនេះ ត្រូវបានឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកម្ពុជា បានថ្លែងនៅក្នុងជំនួបពិភា​ក្សា ជាមួយលោក Valdis Dombrovskis អនុប្រធានប្រតិបត្តិ និងជាស្នងការពាណិជ្ជកម្មសហភាពអឺរ៉ុប នៅទីក្រុង   ព្រុចសែល ប្រទេសបែលហ្សិក កាលពីថ្ងៃចុងសប្ដាហ៍កន្លងទៅនេះ។

ឯកឧត្តម ប៉ាន សូរស័ក្តិ បានលើកឡើងអំពីស្ថានភាពស្តារសេដ្ឋកិច្ចរបស់កម្ពុជា ជាមួយនឹងការបន្តសកម្មភាពសេដ្ឋកិច្ចសង្គមពេញលេញ រួមជាមួយនឹងកិច្ចខិតខំប្រឹងប្រែងស្តារឡើងវិញ តាមរយៈការអនុវត្តក្របខ័ណ្ឌយុទ្ធសាស្រ្ត និងកម្មវិធីស្តារសេដ្ឋកិច្ចក្នុងបរិបទនៃការរស់នៅជាមួយជំងឺកូវីដ-១៩ ក្នុងប្រក្រតីភាពថ្មីឆ្នាំ ២០២១-២០២៣ ដែលផ្តោតលើវិស័យអាទិភាពជាច្រើន ដើម្បីឆ្លើយតបទៅនឹងការអភិវឌ្ឍន៍ពាណិជ្ជកម្ម និងការវិនិយោគ កិច្ចសហប្រតិបត្តិការ និងឆ្ពោះទៅរកការបញ្ចប់ពីស្ថានភាពប្រទេសអភិវឌ្ឍន៍តិចតួច (LDC)។

ឯកឧត្តមរដ្ឋមន្ត្រីបានឆ្លៀតឱកាសថ្លែងអំណរគុណចំពោះសហភាពអឺរ៉ុប និងប្រជាជនអឺរ៉ុបសម្រាប់ការគាំទ្រទាំងផ្នែកហិរញ្ញវត្ថុ និងបច្ចេកទេស សម្រាប់ការអភិវឌ្ឍន៍វិស័យសំខាន់ៗរបស់កម្ពុជា ដូចជា ពាណិជ្ជកម្ម កសិកម្ម សុខាភិបាល ការអភិវឌ្ឍន៍ជនបទ ការបណ្តុះបណ្តាលធនធានមនុស្សជាដើម។

ចំណែកលោក Dombrovskis បានកត់សម្គាល់ពីវឌ្ឍនភាពនៃកិច្ចសហប្រតិបត្តិការពាណិជ្ជកម្មទ្វេភាគីរវាងកម្ពុជា និងសហភាពអឺរ៉ុប ទោះបីជាមានការប្រឈមដោយសារជំងឺរាតត្បាតកូវីដ-១៩ក៏ដោយ។ លោកបានទទួលស្គាល់ការលំបាកដែលកម្ពុជាប្រឈមមុខបន្ទាប់ពីបញ្ចប់ពីប្រភេទ LDC ហើយបានបញ្ជាក់សាជាថ្មីនូវការបន្តគាំទ្ររបស់សហភាពអឺរ៉ុបសម្រាប់ LDCs ដែលនឹងបញ្ចប់ពីស្ថានភាព LDC រួមទាំងកម្ពុជា តាមរយៈគម្រោងអនុគ្រោះទូទៅបូក (GSP+)។ នៅពេលអនាគត។សហភាពអឺរ៉ុបក៏បានសន្យាបន្តផ្តល់ជំនួយបច្ចេកទេស និងកម្មវិធីពង្រឹងសមត្ថភាពដល់កម្ពុជា ដើម្បីជួយអភិវឌ្ឍសេដ្ឋកិច្ចប្រកបដោយចីរភាព បរិយាប័ន្ន និងធន់របស់ព្រះរាជាណាចក្រកម្ពុជា។

សម្រាប់កិច្ចសហប្រតិបត្តិការពាណិជ្ជកម្មក្នុងតំបន់ ភាគីសហភាពអឺរ៉ុបបានរំលឹកឡើងវិញនូវការគាំទ្ររបស់ខ្លួនដល់កម្ពុជាសម្រាប់ការធ្វើជាម្ចាស់ផ្ទះនៃកិច្ចប្រជុំរដ្ឋមន្ត្រីសេដ្ឋកិច្ចអាស៊ាន (AEM) និងបានបញ្ជាក់លើសេចក្តីព្រាងផែនការសកម្មភាពដើម្បីអនុវត្តភាពជាដៃគូយុទ្ធសាស្ត្រអាស៊ាន-សហភាពអឺរ៉ុប (២០២៣-២០២៧) និងកិច្ចពិគ្រោះយោបល់អាស៊ាន-អ៊ឺរ៉ុប ដែលជាផែនទីបង្ហាញផ្លូវសម្រាប់ការចរចារកិច្ចព្រមព្រៀងពាណិជ្ជកម្មសេរីអាស៊ាន-សហភាពអឺរ៉ុប។

យោងតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ក្នុងក្របខ័ណ្ឌកិច្ចសហប្រតិបត្តិការទ្វេភាគី ឯកឧត្តមឧបនាយករដ្ឋមន្ត្រី ប្រាក់ សុខុន ក្នុងជំនួបទ្វេភាគីថ្នាក់ដឹកនាំសហភាពអឺរ៉ុបសំខាន់ៗ រួមមាន លោកជំទាវ Jutta Urpilainen ស្នងការសហភាពអឺរ៉ុបសម្រាប់ភាពជាដៃគូអន្តរជាតិ បានជម្រាបអំពីឆន្ទៈរបស់ EU ក្នុងការពង្រឹងទំនាក់ទំនងទ្វេភាគី និងគាំទ្រកិច្ចខិតខំប្រឹងប្រែងរបស់កម្ពុជា សម្រាប់ការចាកចេញពីឋានៈជាប្រទេស LDCs នៅឆ្នាំ២០២៧ សំដៅជួយកសាងនូវការអភិវឌ្ឍប្រកបដោយភាពធន់ និងចីរភាព។  លោកជំទាវ Urpilainen បានកោតសរសើរចំពោះតួនាទីរបស់កម្ពុជាជាប្រធានអាស៊ាន ក្នុងការដឹកនាំអាស៊ាន និងដៃគូសន្ទនារបស់ខ្លួននៅក្នុងឆ្នាំដ៏លំបាកនេះ ហើយបានរំលឹកសាជាថ្មីអំពីការប្តេជ្ញាចិត្តរបស់ EU សម្រាប់ការពង្រឹងភាពជាដៃគូយុទ្ធសាស្ត្រអាស៊ាន-EU តាមរយៈការជំរុញការវិនិយោគជាមួយនឹងថវិកាប្រមាណ ១០ ប៊ីលានអឺរ៉ូ នៅក្នុងតំបន់អាស៊ានសម្រាប់ឆ្នាំ២០២១ ដល់ឆ្នាំ២០២៧ ស្ថិតក្រោមគំនិតផ្តួចផ្តើមច្រកទ្វារសកល (The Global Gateway) របស់ EU ដោយផ្តោតលើការផ្លាស់ប្តូរឌីជីថល ការវិនិយោគ ហេដ្ឋារចនាសម្ព័ន្ធគុណភាព និងការតភ្ជាប់ប្រកបដោយនិរន្តរភាព៕