សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ប្រធានសមាគមគ្រាប់ស្វាយចន្ទីកម្ពុជា (CAC) បានឱ្យដឹងថា ក្នុងរយៈពេល ៧ខែ ឆ្នាំ២០២៤ នេះ កម្ពុជាបានក្លាយជាប្រទេសដែលផលិតគ្រាប់ស្វាយចន្ទីច្រើនជាងគេលំដាប់ទី២នៅលើពិភពលោកបន្ទាប់ពីប្រទេស កូតឌឺវ័រ ជាមួយនឹងការប្រមូលបានទិន្នផលសរុបកើនដល់ជាង ៨៣ម៉ឺនតោន និងបាននាំចេញទៅប្រទេសវៀតណាមជាង ៧៨ម៉ឺនតោន ទំហំទឹកប្រាក់ជាង ១ពាន់លានដុល្លារ ដោយ ១ គីឡូក្រាមនៃគ្រាប់ស្វាយចន្ទីស្ងួតមានតម្លៃ ៧៣០០រៀល។
លោក អួន ស៊ីឡុត ប្រធានសមាគមស្វាយចន្ទីកម្ពុជាប្រាប់ឱ្យដឹងថា កំណើននេះមិនមែនចៃដន្យនោះទេ ពីព្រោះតាំងពីខែឧសភា សមាគមបានរកឃើញថា ទិន្នផលគ្រាប់ស្វាយចន្ទីនៅកម្ពុជាមានកំណើនខ្ពស់ ដែលអាចសម្របខ្លួនជាមួយបាតុភូតអេលនីណូ (El Nino) ខណៈផ្ទៃដីដាំដុះក៏បានកើនឡើងផងដែរ។ ដោយឡែក ចំពោះប្រទេសផលិតគ្រាប់ស្វាយចន្ទីឆៅធំជាងគេទី ១ របស់ពិភពលោក គឺប្រទេសកូតឌីវ័រ ខណៈកម្ពុជានាំមុខប្រទេសឥណ្ឌាជាប្រទេសលំដាប់ទី២ ហើយប្រទេសឥណ្ឌាធ្លាក់មកនៅលេខរៀងទី៣ ។
ប្រធានសមាគម CAC រូបនេះបានឱ្យដឹងទៀតថា ឧស្សាហកម្មគ្រាប់ស្វាយចន្ទីកម្ពុជានាពេលបច្ចុប្បន្ននេះ ទាមទារឱ្យមានការវិនិយោគបន្ថែមប្រមាណ ៣២៩ លានដុល្លារ ដើម្បីអនុវត្តតាមគោលនយោបាយជាតិគ្រាប់ស្វាយចន្ទីឆ្នាំ២០២២-២០២៧ ដើម្បីអភិវឌ្ឍហេដ្ឋារចនាសម្ព័ន្ធដែលពាក់ព័ន្ធបន្ថែម រួមជាមួយនឹងការជំរុញឱ្យមានការវិនិយោគលើកាកែច្នៃក្នុងស្រុកផងដែរ ព្រោះនៅពេលការកែច្នៃក្នុងស្រុកច្រើន អាចផ្តល់ឱកាសការងារដល់ពលរដ្ឋ ជាពិសេសអាចរក្សាបានតម្លៃសមរម្យ និងកាត់បន្ថយចំនួនឈ្មួញកណ្តាល។
ឯកឧត្តម កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB) កាលពីពេលថ្មីៗនេះ បានជំរុញឱ្យកសិករដាំស្វាយចន្ទី ចូលរួមជាមួយសមាគមស្វាយចន្ទីកម្ពុជា និងសហគមន៍កសិកម្មផ្សេងទៀត ដើម្បីស្វែងយល់ពីការអភិវឌ្ឍន៍ផលិតកម្ម ពង្រឹងគុណភាព និងមានអំណាចក្នុងការលក់ផលិតផលរបស់របស់ខ្លួន។
គួរជម្រាបដែរថា នៅក្នុងខែកញ្ញា ខាងមុខនេះ សម្រាប់ដំណាំចន្ទី មានសហគមន៍កសិកម្មទំនើបចំនួន៣ ស្ថិតក្នុងខេត្តកំពង់ធំ នឹងត្រូវបង្កើតឡើងជាផ្លូវការ រួមមានដូចជា កំពង់ធំសាលាវិស័យ មានសមាជិកចំនួន៨៨ នាក់ និងផ្ទៃដីដាំស្វាយចន្ទីចំនួន២០៤ ហិកតា។ សហគមន៍កសិកម្មទំនើបប្រាសាទសំបូរ មានសមាជិកចំនួន ៩៧ នាក់ មានផ្ទៃដីដាំដុះស្វាយចន្ទីចំនួន ៥០៩ ហិកតា និងសហគមន៍ទំរីងកំពង់ធំ មានសមាជិកចំនួន ៧៦ នាក់ និងមានផ្ទៃដីដាំដុះចំនួន ៤៦០ ហិកតា៕
Account
Security
Favourite Content