ភ្នំពេញ ៖ អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា ​បានលើកឡើងថា ទីផ្សារកៅស៊ូរបស់កម្ពុជាមានការកើនឡើងជាបន្តបន្ទាប់ ពោលគឺទាំងតម្រូវការទីផ្សារក្នុងស្រុក និងការនាំចេញទៅកាន់ទីផ្សារក្រៅប្រទេសសុទ្ធតែមានការកើនឡើងដូចគ្នា។

យោងតាមរបាយការណ៍អគ្គនាយកដ្ឋានកៅស៊ូ នៃក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា ក្នុង​រយៈពេល៩ខែ ឆ្នាំ២០២៥ កម្ពុជាផលិតជ័រកៅស៊ូបានចំនួន ២៦០ ៥៤៧ តោន បើធៀបនឹងរយៈពេលដូចគ្នាក្នុងឆ្នាំ២០២៤ មានការកើនឡើងប្រមាណ ៨ ១០១ តោន ​ឬស្មើនឹងប្រមាណ ៣.២១ភាគរយ និងអាចទទួលបានចំណូលចំនួន ៥៤៩ លានដុល្លារ ។ ដោយឡែក សម្រាប់តែក្នុងខែកញ្ញា ឆ្នាំ២០២៥ផលិតកម្មកៅស៊ូបានឈានដល់ ៤២ ៤២៩ តោន កើនឡើង ៣ ៥០៨ តោន ឬ ៩.០១ ភាគរយ ធៀបនឹងខែសីហា ឆ្នាំ២០២៥ និងកើនឡើង ៣ ៣១៣តោន ឬ ៨,៤៧ ភាគរយ បើធៀបនឹងខែកញ្ញា ឆ្នាំ២០២៤។

អ្នកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា ​បានកត់សម្គាល់ថា សម្រាប់តម្រូវការកៅស៊ូបច្ចុប្បន្ននេះមានការខុសប្លែកកាលពីមុន ដោយការនាំចេញកៅស៊ូរបស់កម្ពុជា ភាគច្រើន ឬស្ទើរតែ ៩០ភាគរយ ជាប្រភេទកៅស៊ូពាក់កណ្តាលសម្រេច (ជ័រក្រែប) ប៉ុន្តែឈានមកដល់សព្វថ្ងៃនេះ ការនាំចេញមានលក្ខណៈទំនើបជាងមុនបន្តិច ហើយក៏មានតម្រូវការក្នុងស្រុកច្រើនជាងផងដែរ ខណៈដែលកម្ពុជាក៏មានដំណើរការរោងចក្រផលិតសំបកកង់រថយន្តច្រើនជាង៣កន្លែង។

អ្នកឧកញ៉ា បានបន្ថែមថា​ ៖

«ទន្ទឹមនឹងការនាំចេញនេះយើងក៏មានតម្រូវការផលិតផលកៅស៊ូសម្រាប់លក់ក្នុងស្រុកដែរ បើទោះជាវានៅមានកម្រិតទាបនៅឡើយក៏ដោយ។ ចំពោះរោងចក្រផលិតសំបកកង់រថយន្តក្នុងស្រុកនាពេលបច្ចុប្បន្ននេះគឺគេត្រូវការកៅស៊ូប្រភេទ L10 លេខ៣ មកធ្វើជាវត្ថុធាតុដើមសម្រាប់ផលិតប្រមាណជា១០% ។ ដោយឡែក សម្រាប់ការនាំចេញវិញភាគច្រើនជាកៅស៊ូប្រភេទ 5 និង 5L ដែលមានកម្រិតលេខ១ និងលេខ២ ហើយតម្លៃក៏ខុសគ្នាច្រើនដែរ ដូច្នេះ ការផលិតកៅស៊ូធម្មជា​តិប្រភេទនេះ​​​​ទាមទារនូវការលក់ចេញទៅក្រៅប្រទេស»។

លោក ឃុន កក្កដា អគ្គនាយករងនៃអគ្គនាយកដ្ឋានកៅស៊ូ ក្រសួងកសិកម្ម រុក្ខាប្រមាញ់ និងនេ​សាទ បានឱ្យដឹងថា គិតត្រឹមខែកញ្ញា ឆ្នាំ២០២៥ ប្រាក់ចំណូលសរុបបានមកពីការនាំចេញកៅស៊ូ និងឈើកៅស៊ូមានចំនួនជាង ៥៤៩ លានដុល្លារ ដែលជាង ៣៩០ លានដុល្លារបានពីការនាំចេញកៅស៊ូ និងជាង ៣លានដុល្លារពីការនាំចេញឈើកៅស៊ូ ហើយជាង ១៥៦ លានដុល្លារទៀត បានពីការលក់កៅស៊ូក្នុងប្រទេស។

លោកបានមានប្រសាសន៍ថា ៖

«តម្លៃលក់កៅស៊ូជាមធ្យមក្នុងខែកញ្ញា ឆ្នាំ២០២៥ គឺ ១ ៦៩៧ ដុល្លារក្នុងមួយតោន កើនឡើង ១៧ ដុល្លារ ឬ ០.៩៩ ភាគរយ បើធៀបនឹងខែមុន និងកើនឡើងជាង ១ ដុល្លារ ឬ ០,១ ភាគរយធៀបនឹងខែកញ្ញា ឆ្នាំ២០២៤ (១,៦៩៥ ដុល្លារក្នុងមួយតោន)។ ក្នុងខែកញ្ញា កម្ពុជាបាននាំចេញកៅស៊ូចំនួន ២២០ ២៤០តោន បើធៀបរយៈពេលដូចគ្នា កាលពីឆ្នាំ២០២៤ មានការថយចុះ ២៨ ២៩៥​ តោន ឬ ១១,៤ភាគរយ។ ដោយឡែក ចំពោះការ​ប្រើ​ប្រាស់​កៅស៊ូ​ក្នុង​ស្រុក បាន​កើន​ឡើង​ ១០២​ភាគ​រយ ​បើ​ធៀប​នឹង​ឆ្នាំ​២០២៤​ ដែល​មាន​រហូត​ដល់​ ៨៥ ០០០​តោន»។

សូមបញ្ជាក់ថា បច្ចុប្បន្ននេះ កម្ពុជាមានរោងចក្រ និងសិប្បកម្មកែច្នៃជ័រ និងឈើកៅស៊ូចំនួន ១៧៩កន្លែង ក្នុងនោះរោងចក្រកែច្នៃជ័រកៅស៊ូក្រែប ៥៦កន្លែង រោងចក្រកែច្នៃទឹកជ័រខាប់ ១កន្លែង សិប្បកម្មកែច្នៃកៅស៊ូសន្លឹក ១០១កន្លែង និងរោងចក្រកែច្នៃឈើកៅស៊ូ ២១កន្លែង ជាពិសេសប្រភេទដំណាំកៅស៊ូនេះ បានផ្តល់ការងារចំនួន ១៤ម៉ឺនកន្លែង និងជួយគាំទ្រសេដ្ឋកិច្ចគ្រួសារប្រជាពលរដ្ឋចំនួន ៤២ម៉ឺននាក់។ ដោយឡែក សម្រាប់ផ្ទៃដីដាំដុះ បច្ចុប្បន្ន កម្ពុជាមានផ្ទៃដីដាំកៅស៊ូសរុបជាង ៤២ម៉ឺនហិកតា ក្នុងនោះផ្ទៃ​ដី​ចៀរជ័រមានជាង ៣៣ម៉ឺនហិកតា និងផ្ទៃដីថែទាំមានជាង ៩ម៉ឺនហិកតា។ ផ្ទៃដីកៅស៊ូកសិឧស្សាហកម្ម មានជាង ៧ម៉ឺនហិកតា ស្មើនឹង១១% និងផ្ទៃដីកៅស៊ូសម្បទានសេដ្ឋកិច្ចជាង ១៧ម៉ឺនហិកតា ស្មើនឹង៤១% និងផ្ទៃដីកៅស៊ូគ្រួសារមានជាង ២០ម៉ឺនហិកតា ស្មើនឹង៤៨%៕