សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ Nestlé ដែលជាក្រុមហ៊ុនអាហារដ៏ធំបំផុតរបស់ពិភពលោក គ្រោងនឹងកាត់បន្ថយកម្លាំងការងារប្រហែល ១៦ ០០០ កន្លែងក្នុងរយៈពេល ២ឆ្នាំខាងមុខ ដើម្បីបន្ថយខ្ទង់ចំណាយ និងងាកមកជំរុញកម្លាំងពលកម្មតាមរយៈស្វ័យប្រវត្តិកម្មវិញ។ នេះបើយោងទៅតាមប្រភពព័ត៌មានពី CNN។
តាមប្រភពដដែលបានឱ្យដឹងថា ក្រុមហ៊ុនបុត្រសម្ព័ន្ធ ដូចជា KitKat និង Nesquik និយាយនៅក្នុងសេចក្តីថ្លែងការណ៍មួយថា ការបញ្ឈប់កម្លាំងការងារប្រហែល ១២ ០០០ កន្លែង ភាគច្រើនអាចនឹងប៉ះពាល់ដល់អ្នកជំនាញនៅក្នុងប្រតិបត្តិការ ដោយសារក្រុមហ៊ុន Nestlé កំណត់គោលដៅប្រតិបត្តិការប្រកបដោយប្រសិទ្ធភាពជាងមុន ដូចជា ដំណើរការស្វ័យប្រវត្តិកម្ម និងការប្រើប្រាស់សេវាកម្មរួមគ្នា។ តួនាទី ៤ ០០០ កន្លែងផ្សេងទៀតនឹងត្រូវបានកាត់បន្ថយពីខាងផលិត និងខ្សែសង្វាក់ផ្គត់ផ្គង់ ដែលជាផ្នែកមួយនៃវិធានការកែលម្អផលិតភាព។ សរុបជារួម ការកាត់បន្ថយកម្លាំងពលកម្មនេះនឹងមានចំណែកជិត ៦% នៃកម្លាំងការងារសរុបរបស់ Nestlé។
លោក Philipp Navratil នាយកប្រតិបត្តិក្រុមហ៊ុន Nestlé បានលើកឡើងថា ពិភពលោកកំពុងផ្លាស់ប្តូរ ហើយ Nestlé គួរតែផ្លាស់ប្តូរលឿនជាងមុនដូចគ្នា។ វាគឺជាការសម្រេចចិត្តដ៏លំបាក ប៉ុន្តែចាំបាច់ក្នុងការកាត់បន្ថយចំនួនមនុស្ស។ ការប្រកាសនេះធ្វើឡើងចំពេលដែលពិភពលោកកំពុងមានការកើនឡើងនៃបញ្ញាសិប្បនិម្មិត (AI) ដែលធ្វើឱ្យមានការភ័យខ្លាចចំពោះការបាត់បង់កម្លាំងការងារមនុស្សនៅក្នុងឧស្សាហកម្មផ្សេងៗ។
នាយកប្រតិបត្តិរបស់ Anthropic ដែលជាមន្ទីរពិសោធន៍ AI ឈានមុខគេធ្លាប់បានព្រមានដែរថា AI អាចបណ្តាលឱ្យអត្រានៃភាពអត់ការងារធ្វើកើនឡើងកាន់តែខ្លាំង។ Nestlé និយាយនៅលើគេហទំព័ររបស់ខ្លួនថា ពួកគេប្រើប្រាស់ AI ក្នុងមុខងារមួយចំនួនរួមមាន ការស្រាវជ្រាវ និងការអភិវឌ្ឍន៍ជាដើម។ នៅក្នុងរបាយការណ៍ប្រចាំឆ្នាំចុងក្រោយរបស់ Nestlé ក៏បានបញ្ជាក់ដែរថា ពួកគេប្រើស្វ័យប្រវត្តិកម្ម និងការវិភាគកម្រិតខ្ពស់នៅក្នុងសកម្មភាពផ្សព្វផ្សាយ ដូចជា ការបញ្ចុះតម្លៃ និងការបង្ហាញផលិតផលនៅក្នុងហាង។
គួរឲ្យបញ្ជាក់ដែរថា ទីផ្សារធំបំផុតរបស់ Nestlé គឺអាម៉េរិកខាងជើង។ យ៉ាងណាក៏ដោយ បើទោះបីជាអ្នកប្រើប្រាស់មានក្ដីព្រួយបារម្ភអំពីអតិផរណាដោយសារតែពន្ធគយរបស់អាម៉េរិកក៏ដោយ ប៉ុន្តែការចំណាយរបស់អ្នកប្រើប្រាស់បានកើនឡើង ដែលធ្វើឲ្យការលក់របស់ Nestlé កើនឡើង ៤,៣% នៅត្រីមាសទី ៣ ។ លើសពីនេះ ភាគហ៊ុនរបស់ក្រុមហ៊ុនបានកើនឡើង និងត្រូវបានជួញដូរខ្ពស់ជាង ៧,៦ %៕
Account
Security
Favourite Content