ភ្នំពេញ ៖ ប្រទេសកម្ពុជាក្នុងនាមជាម្ចាស់ផ្ទះរៀបចំព្រឹត្តិការណ៍ស៊ីហ្គេម (SEA Game) និងអាស៊ាន ប៉ារ៉ាហ្គេម នាពេលឆាប់ៗខាងមុខ បានត្រៀមថវិកា ១០០លានដុល្លារសម្រាប់ដំណើរការប្រារព្ធព្រឹត្តិការណ៍កីឡាដ៏ធំមួយនេះ ខណៈដែលការចំណាយប្រាក់ដ៏ច្រើនលើសលប់នេះ ក៏ដោយសារតែកម្ពុជាមានបំណងរៀបចំព្រឹត្តិការណ៍កីឡានេះឱ្យបានដិតដល់ និងគ្រប់ជ្រុងជ្រោយ។
នាពិធីប្រគល់សញ្ញាបត្រដល់និស្សិតសាកលវិទ្យាល័យឯកទេសនៃកម្ពុជា (CUS) សម្ដេចតេជោ ហ៊ុន សែន នាយករដ្ឋមន្ត្រីនៃប្រទេសកម្ពុជា បានមានប្រសាសន៍ថា ៖
“ពីមុនខ្ញុំនិយាយ តែ៤០លានទេ ៤០លានក្នុងមួយឆ្នាំ យើងបង្កក៣ឆ្នាំ ឥឡូវថវិកាដែលសម្រាប់ការប្រកួតនេះ នឹងបម្រើការប្រកួត និងការកសាងនានានេះ ឡើងជាង១០០លាន សម្រាប់ការប្រកួតមួយនេះ”
សម្ដេចតេជោ បានបន្តថាទៀតថា ៖
“យើងនឹងធ្វើជាម្ចាស់ផ្ទះប្រកបដោយភាពទទួលខុសត្រូវ ផ្ដល់នូវសុវត្ថិភាពដល់កីឡាករ កីឡាការិនី និងអ្នកដឹកនាំមកពីបណ្ដាប្រទេសនានា ផ្ដល់នូវការសប្បាយរីករាយដល់ពួកគេទាំងអស់គ្នា នៅក្នុងទឹកដីនៃព្រះរាជាណាចក្រកម្ពុជា។”
ទាក់ទិននឹងការពន្យារពេលធ្វើជាម្ចាស់រៀបចំព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេម រហូតមកទល់ពេលនេះ គឺដោយសារតែកម្ពុជាត្រូវកសាងហេដ្ឋារចនាសម្ព័ន្ធខាងក្នុងជាមុនសិន ដើម្បីឱ្យខ្លួនអាចមានលទ្ធភាពទទួលភ្ញៀវបានដិតដល់។ ម្យ៉ាងទៀត សម្ដេចបានបញ្ជាក់ថា កន្លងមកកម្ពុជាត្រូវការផ្ដល់អាទិភាពលើតម្រូវការប្រជាជនសិន ទើបគិតគូរពីកីឡាតាមក្រោយ ហើយដែលពេលនេះគឺស័ក្ដិសមហើយសម្រាប់កម្ពុជាក្នុងការក្លាយខ្លួនជាម្ចាស់ផ្ទះរៀបចំកីឡាស៊ីហ្គេម លើកទី១។
ជាមួយគ្នានេះ ដើម្បីញុំាងឱ្យព្រឹត្តិការណ៍កាន់តែមានការចូលរួមច្រើនពីសំណាក់ប្រជាជនកម្ពុជា ចាប់ពីថ្ងៃទី២៥ ខែមករា ខាងមុខនេះ កម្ពុជានឹងចាប់ផ្ដើមធ្វើឱ្យមានចលនាជាតិមួយ តាមរយៈការរាប់ថយក្រោយ ១០០ថ្ងៃ ទៅដល់ការរៀបចំកីឡាស៊ីហ្គេមនៅដើមខែឧសភាខាងមុខ។
គួររំលឹកថា កម្ពុជានឹងក្លាយខ្លួនជាម្ចាស់ផ្ទះរៀបចំព្រឹត្តិការណ៍កីឡាស៊ីហ្គេមលើកទី៣២ និងអាស៊ានប៉ា រ៉ាហ្គេមលើកទី១២ នៅថ្ងៃទី៥ ដល់ទី១៧ ខែឧសភា ឆ្នាំ ២០២៣ខាងមុខ ដែលរាប់ត្រឹមថ្ងៃទី ២៥មករា កម្ពុជានឹងសល់ពេលចំនួន ១០០ថ្ងៃទៀត៕