រដ្ឋមន្ត្រីក្រសួងពាណិជ្ជកម្មកម្ពុជា បានលើកទឹកចិត្តសមាគមអាជីវកម្មសំបុក​ត្រចៀកកាំកម្ពុជា រួមទាំងអ្នកផលិត និងអ្នកនាំចេញ បន្តកិច្ចសហប្រតិបត្តិការជាមួយអ្នកផ្គត់ផ្គង់សំបុកបក្សីធំៗអន្តរជាតិ ដើម្បីពង្រឹងគុណភាព និងបង្កើនផលិតកម្ម ធានាស្ថិរភាពនៃការផ្គត់ផ្គង់ ដែលជាតម្រូវការសម្រាប់ទីផ្សារជាតិ និងអន្តរជាតិ ។

លោកជំទាវ ចម និមល រដ្ឋមន្ត្រីក្រសួងពាណិជ្ជកម្មបាន​លើក​ឡើងថា សមាគមអ្នកផលិត និងអ្នកនាំចេញសំបុកត្រចៀកកាំកម្ពុជា បានលើកឡើងអំពីគំនិតផ្តួចផ្តើមរបស់ខ្លួនក្នុងការរៀបចំវេទិកាខាងលើ ជាការផ្តល់ឱកាសដល់ពាណិជ្ជករជាតិ និងអន្តរជាតិក្នុងការកសាងទំនាក់ទំនង និងពង្រីកពាណិជ្ជកម្មលើវិស័យសំបុក​ត្រចៀកកាំប្រកបដោយទំនុកចិត្ត ក៏​ដូច​ជា​ផ្តល់​ឱកាស​ក្នុង​ការ​ផ្លាស់​ប្តូរ​គំនិត ​ដើម្បី​ជំរុញ​វិស័យ​អាជីវកម្ម​សំបុក​ត្រចៀកកាំ​ឱ្យ​កាន់តែប្រសើរបន្ថែម​ទៀត។

សូមបញ្ជាក់ថា វេទិកាធុរកិច្ចសំបុកត្រចៀកកាំកម្ពុជា ត្រូវបានរៀបចំឡើងក្នុងគោលបំណងលើកកម្ពស់ និងជំរុញការនាំចេញសំបុកត្រចៀកកាំកម្ពុជា ដោយផ្តល់ឱកាសដល់ពាណិជ្ជករជាតិ និងអន្តរជាតិក្នុងវិស័យពង្រឹង និងពង្រីកកិច្ចសហប្រតិបត្តិការពាណិជ្ជកម្ម ស្វែងរកដៃគូពាណិជ្ជកម្ម និងបង្កើនការនាំចេញសំបុក​ត្រចៀកកាំកម្ពុជាទៅកាន់ទីផ្សារអន្តរជាតិ។

វេទិកានេះមានការចូលរួមពីសមាគមត្រចៀកកាំកម្ពុជា ប្រទេសថៃ វៀតណាម ម៉ាឡេស៊ី និងចិន ក្នុង​គោល​បំណង​ជំរុញ​ការ​នាំ​ចេញ​សំបុកត្រចៀក​កាំ​កម្ពុជា ដោយ​ផ្តល់ឱកាសជូនអាជីវករ ពាណិជ្ជករជាតិ និងអន្តរជាតិក្នុងវិស័យសំបុកត្រចៀកកាំ ដើម្បីពង្រឹង និងពង្រីកិច្ច​សហប្រតិបត្តិការ​ពាណិជ្ជកម្ម ស្វែងរកដៃគូអាជីវកម្ម បង្កើន​ការ​នាំ​ចេញ​សំបុក​ត្រចៀក​កាំ​កម្ពុជា​ទៅ​កាន់​ទីផ្សារ​អន្តរជាតិ ​តាមរយៈវេទិកា​ធុរកិច្ចដ៏​សំខាន់​​នេះ​។

នៅក្នុងព្រឹត្តិការណ៍នេះ ក៏មានអនុស្សរណៈនៃការយោគយល់គ្នា រវាងសមាគមអ្នកផលិត និងអ្នកនាំចេញសំបុកត្រចៀកកាំកម្ពុជា និងសមាគមសំបុកត្រចៀកកាំមកពីប្រទេសចិន ម៉ាឡេស៊ី ថៃ និងវៀតណាម ស្តីពីការជំរុញ ការនាំចេញសំបុកត្រចៀកកាំកម្ពុជា ទៅកាន់​ទីផ្សារប្រទេសចិន ម៉ាឡេស៊ី ថៃ និងវៀតណាម។

សូមបញ្ជាក់ថា កាលពីឆ្នាំ២០២២ ក្រសួងកសិកម្ម បានរៀបចំក្រុមការងារបច្ចេកទេសសម្រាប់ចរចាបើកទីផ្សារនាំចេញផលិតផលសំបុកត្រចៀកកាំទៅកាន់ប្រទេសចិនក្រោយក្រសួងពិនិត្យឃើញថា កំណើនអ្នកចិញ្ចឹមសត្វត្រចៀកកាំកើនឡើង និងជាផលិតផលដែលមានតម្លៃល្អនៅលើទីផ្សារ។

ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កាលពីពេលថ្មីៗ  ធ្លាប់បានសម្តែងការស្វាគមន៍ និងគាំទ្រលើការវិនិយោគសំបុកត្រចៀកកាំ ដើម្បីនាំចេញទៅទីផ្សារប្រទេសចិន ខណៈឯកឧត្តមបានទទួលជួបសម្តែងការគួរសមជាមួយគណៈប្រតិភូក្រុមហ៊ុន យ៊ានអានជូ គ្រុប ដោយឯកឧត្តមរដ្ឋមន្ត្រីបានផ្តល់ការគាំទ្រ និងពិនិត្យតាមដាន វាយតម្លៃឱ្យបានត្រឹមត្រូវ តាមយន្តការទីផ្សារ និងបានលើកឡើងអំពីការយកចិត្តទុកដាក់ពីប្រមុខរដ្ឋាភិបាល ដោយផ្តល់តម្លៃអគ្គិសនីសម្រាប់វិស័យកសិកម្មទាប ដែលជាសញ្ញាល្អសម្រាប់ការវិនិយោគ។

សូមជម្រាបថា តម្លៃទីផ្សារសំបុកត្រចៀកកាំស្រស់មិនទាន់សម្អាតមានចាប់ពីតម្លៃ ៧០០ ដុល្លារដល់ ៩០០ដុល្លារអាមេរិកក្នុងមួយគីឡូក្រាម ហើយតម្លៃនៃផលិតផលកែច្នៃមានចន្លោះពី ១ ៥០០ ទៅ ២ ០០០ ដុល្លារអាមេរិកក្នុងមួយគីឡូក្រាម។ នេះបើយោងតាមសមាគមអ្នកផលិត និងនាំចេញសំបុកសត្វត្រចៀកកាំកម្ពុជា​។

យោងលើរបាយការណ៍របស់អគ្គនាយកដ្ឋានកិសកម្ម ក្នុងឆ្នាំ២០២០ កម្ពុជាមាន​ផ្ទះសត្វត្រចៀកកាំចំនួន ​៨៧២​ផ្ទះ ដែលអាចផ្តល់ផលចន្លោះពី១តោន ទៅ១តោនកន្លះក្នុងមួយខែ។ ដោយឡែក បច្ចុប្បន្ននេះ កម្ពុជាមានផ្ទះសត្វត្រចៀកកាំប្រមាណជាង ៥០០០ផ្ទះ ដោយមានកំណើនក្នុងរង្វង់១៥% ជារៀងរាល់ឆ្នាំ។ កំណើននៃសំណង់ផ្ទះសត្វត្រចៀកកាំនេះ បានធ្វើឱ្យមានកំណើនបរិមាណផលិតផលសំបុកត្រចៀកកាំជារៀងរាល់ឆ្នាំ ដោយជាមធ្យមមានប្រមាណ ១០០តោន ក្នុងមួយឆ្នាំសម្រាប់ផ្គត់ផ្គង់នៅលើទីផ្សារ៕