សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រុមការងារជំរុញការនាំចេញរបស់ក្រសួងពាណិជ្ជកម្ម នៅដើមសប្តាហ៍នេះ បានទៅធ្វើទស្សនកិច្ចសិក្សានៅផ្សារទំនើប AEON Mall និងហាង 7-Eleven ដើម្បីស្វែងយល់ពីនិន្នាការទីផ្សារ និងការដាក់តាំងលក់គ្រាប់ស្វាយចន្ទីកម្ពុជាក្នុងទីផ្សារប្រទេសជប៉ុន។
ឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម និងជាប្រធាន ក្រុមការងារជំរុញការនាំចេញ បានឱ្យដឹងថា ៖ទស្សនកិច្ចនេះបានផ្តល់ឱកាសដ៏មានតម្លៃក្នុងការវាយតម្លៃលទ្ធភាពទីផ្សាររបស់គ្រាប់ស្វាយចន្ទីកម្ពុជាព្រមទាំងការវិភាគអំពីចំណូលចិត្តអតិថិជន និងការស្វែងរកឱកាសថ្មីសម្រាប់ការពង្រីកការនាំចេញ។
ឯកឧត្តមបញ្ជាក់ថា ៖ ក្រុមការងារជំរុញការនាំចេញបានកំពុងសហការជាមួយអ្នកផលិតនិងអ្នកនាំចេញដើម្បីលើកកម្ពស់ការអនុលោមតាមស្តង់ដារអន្តរជាតិពង្រឹងខ្សែច្រវ៉ាក់ផ្គត់ផ្គង់និងជំរុញឱ្យគ្រាប់ស្វាយចន្ទីកម្ពុជាក្លាយជាផលិតផលគុណភាពខ្ពស់និងមានសក្តានុពលលក់ក្នុងទីផ្សារសកល។
បច្ចុប្បន្ន ទីផ្សារជប៉ុនជាទីផ្សារគោលដៅដ៏សំខាន់មួយសម្រាប់កម្ពុជា ដែលកំពុងទទួលបានការចាប់អារម្មណ៍ខ្លាំង។ ក្នុងនោះដែរកម្ពុជាបានបង្ហាញពីការប្តេជ្ញាចិត្ត ក្នុងការពង្រីកវត្តមាននៅទីផ្សារដែលមានតម្លៃខ្ពស់ តាម រយៈការបង្កើន ភាពជាដៃគូពាណិជ្ជកម្ម និងការលើកកម្ពស់ផលិតផលដែលមាននិរន្តរភាព និងសមត្ថភាពប្រកួតប្រជែងដោយកម្ពុជាមានគោលបំណងជំរុញការនាំចេញនិងពង្រីកសក្តានុពលផលិតផលកម្ពុជានៅលើ ឆាកពិភពលោក។ ក្រុមការងារជំរុញការនាំចេញនៃក្រសួងពាណិជ្ជកម្មបាន ប្តេជ្ញាចិត្តក្នុងការផ្តល់ការគាំទ្រយ៉ាងសកម្ម ដើម្បីបង្កើនឱកាសពាណិជ្ជកម្ម និងការជំរុញភាពជាដៃគូឱ្យកាន់តែរឹងមាំ ដើម្បីជំរុញកំណើនសេដ្ឋកិច្ចប្រកបដោយចីរភាពសម្រាប់ផលិតផលកសិកម្មរបស់កម្ពុជា ជាពិសេសវិស័យនាំចេញគ្រាប់ស្វាយចន្ទី។
លោក អួន ស៊ីឡុត ប្រធានសមាគមស្វាយចន្ទីកម្ពុជា បានឱ្យដឹងថា៖ កម្ពុជារកប្រាក់បានជាង១,១ពាន់លានដុល្លារពីការនាំចេញគ្រាប់ស្វាយចន្ទីឆៅទៅទីផ្សារអន្តរជាតិនៅក្នុងឆ្នាំ២០២៤ដោយកើនឡើងជាង២៦ភាគរយបើធៀបនឹងឆ្នាំ២០២៣ក្នុងនោះទីផ្សារប្រទេសវៀតណាម បានទទួលទិញជាង៩៧ភាគរយ។
ឯកឧត្តមបណ្ឌិត ងិន ឆាយ ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានកសិ កម្ម បានឱ្យដឹងថា៖ក្រសួងកសិកម្ម បាននិងកំពុងបន្តផ្សព្វផ្សាយនិងជំរុញការនាំចេញគ្រាប់ស្វាយចន្ទីឱ្យបានកាន់តែច្រើនទៅប្រទេសផ្សេងៗទៀត រួមមាន ប្រទេសអារ៉ាប់ ចិន ជប៉ុន កូរ៉េ សហរដ្ឋអាមេរិក និងទៅទីផ្សារសហភាពអឺរ៉ុបជាដើម ដើម្បីពង្រីកទីផ្សារគ្រាប់ស្វាយចន្ទីដែលមានគុណភាពល្អប្រណិតរបស់ខ្មែរ។
សូមបញ្ជាក់ថា បច្ចុប្បន្ន កម្ពុជាមានផ្ទៃដីដាំដុះដំណាំស្វាយចន្ទីសរុប ៥៨០ ១១៧ ហិកតា និងអាចមានសក្ដានុពលផលិតកម្មប្រមាណ ៨១៦ ៤៥៩ តោនក្នុងមួយឆ្នាំ៕
Account
Security
Favourite Content