សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា បានថ្លែងឱ្យដឹងថា សហគ្រាសធុនតូច និងមធ្យមជាង៩៨% នៃអង្គភាពសេដ្ឋកិច្ចទាំងអស់នៅក្នុងប្រទេសកម្ពុជា បានចូលរួមចំណែកយ៉ាងសកម្មនៅក្នុងការជ្រោមជ្រែងកំណើនសេដ្ឋកិច្ច ជាពិសេសចូលរួមចំណែករហូតដល់ប្រមាណ ៩៣ភាគរយនៃផលិតផលសរុបក្នុងស្រុក។
សម្ដេចតេជោ បានថ្លែងដូច្នេះនៅក្នុងឱកាសអនុញ្ញាតឱ្យប្រតិភូសម្ព័ន្ធសមាគមមូលនិធិសម្ដេចតេជោ ដើម្បីអភិវឌ្ឍន៍សហគ្រាសធុនតូច និងមធ្យមកម្ពុជា ដឹកនាំដោយឧកញ៉ា តែ តាំងប៉ ប្រធានក្រុមប្រឹក្សាភិបាលសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) ចូលជួបសម្ដែងការគួរសម និងពិភាក្សាការងារកាលពីថ្ងៃដើមសប្ដាហ៍កន្លងទៅនេះ។
សម្ដេចតេជោ ហ៊ុន សែន បានរំលេចថា សហគ្រាធុនតូច និងមធ្យម តាំងពីសម្ដេចនៅជានាយករដ្ឋមន្ត្រី គឺរដ្ឋាភិបាលបានយកចិត្តទុកដាក់យ៉ាងខ្លាំងក្នុងការអភិវឌ្ឍន៍ ក៏ដូចជាជ្រោមជ្រែងដល់សហគ្រាសធុនតូច និងមធ្យម ហើយបន្តដោយសម្ដេចមហាបវរធិបតី ហ៊ុន ម៉ាណែត ក្នុងអាណត្តិទី៧នេះ នៅតែជួយជ្រោមជ្រែងដដែល។ សហគ្រាសធុនតូច និងមធ្យមកម្ពុជាមានជាង៩៨% នៃអង្គភាពសេដ្ឋកិច្ចទាំងអស់នៅក្នុងប្រទេសកម្ពុជា ដោយក្នុងនោះមានប្រមាណ ៧៥៣,៦៧០ សហគ្រាស ដែលផ្ដល់ការងារប្រមាណ ៧០% នៃកម្លាំងពលកម្មសរុប ស្មើនឹងប្រមាណ ២លាន ៩សែននាក់ ដែលបានការងារធ្វើដោយកើតចេញពីសហគ្រាសធុនតូច និងមធ្យមទាំងនេះ ។
សម្ដេចតេជោ ហ៊ុន សែន បានគូសបញ្ជាក់ថា៖
« គ្រឹះដ៏រឹងមាំនៃសន្តិភាព ស្ថិរភាពនយោបាយ និងម៉ាក្រូសេដ្ឋកិច្ច ជាលក្ខខណ្ឌចាំបាច់សម្រាប់ការអភិវឌ្ឍលើគ្រប់វិស័យ រួមទាំងសហគ្រាសធុនតូច និងមធ្យម ហើយរដ្ឋាភិបាលកំពុងតែបន្តភាពជាដៃគូជាមួយនឹងវិស័យឯកជនដើម្បីធានាកំណើនសេដ្ឋកិច្ច និងធ្វើឱ្យជីវភាពប្រជាជនកាន់តែល្អប្រសើរឡើង»។
សម្ដេចតេជោ បានជំរុញឱ្យសហគ្រាសធុនតូច និងមធ្យម បន្តអនុវត្តនូវអ្វីដែលជាគោលនយោបាយរបស់រាជរដ្ឋាភិបាល ជាពិសេស គឺយុទ្ធសាស្ត្របញ្ចកោណដែលរាជរដ្ឋាភិបាលកំពុងធ្វើ ក្នុងដូចជាគោលនយោបាយអភិវឌ្ឍន៍វិស័យឧស្សាហកម្ម ២០១៥-២០២៥ យុទ្ធសាស្ត្រជាស្ដីពីការអភិវឌ្ឍសេដ្ឋកិច្ចក្រៅប្រព័ន្ធ ២០២៣-២០២៨ ផែនការសកម្មភាពយុទ្ធសាស្ត្រអាស៊ានសម្រាប់ការអភិវឌ្ឍសហគ្រាសធុនតូច និងមធ្យម ២០១៦-២០២៥ គោលនយោបាយជាតិស្ដីអំពីស្វាយចន្ទី ២០២២-២០២៧ និងគោលនយោបាយជាតិស្ដីអំពីដំឡូងមីជាដើម។
សម្ដេចតេជោ ក៏បានរំលេចផងដែរ អំពីការលើកកម្ពស់វិស័យនេះ តាមរយៈការរៀបចំទិវាជាតិសហគ្រាសធុនតូច និងមធ្យម ដែលបានធ្វើកន្លងមក ជាផ្នែកមួយជួយដល់ការលើកកម្ពស់វិស័យសហគ្រាសធុនតូច និងមធ្យមនៅក្នុងប្រទេសកម្ពុជា។
ឧកញ៉ា តែ តាំងប៉ បានជម្រាបជូនសម្ដេចតេជោថា កន្លងមកសមាគមមូលនិធិសម្ដេចតេជោ ដើម្បីអភិវឌ្ឍន៍សហគ្រាសធុនតូច និងមធ្យមនៅកម្ពុជា បានចូលរួមចំណែកយ៉ាងសកម្មជាមួយរាជរដ្ឋាភិបាលក្នុងការចូលរួមរៀបចំនូវពិធីបុណ្យសំខាន់ៗ ដូចជាបុណ្យសមុទ្រ និងបុណ្យទន្លេជាដើម ដែលមានការតាំងពិព័រណ៍នូវផលិតផលរបស់សហគ្រាសធុនតូច និងមធ្យម។ ក្នុងឱកាសនោះ ក៏មានសកម្មភាពសំខាន់ៗដែលសមាគមបានធ្វើ ដូចជាការបណ្ដុះបណ្ដាលនៅទូទាំង២០ខេត្តក្រុង គឺការបណ្ដុះបណ្ដាលដល់សហគ្រាសខ្នាតតូច និងមធ្យមអំពីការគ្រប់គ្រងធនធានមនុស្ស និងការគ្រប់គ្រងអាជីវកម្ម ជាពិសេសគឺការបណ្ដុះបណ្ដាលឱ្យមានលទ្ធភាពទទួលបានកម្ចីសម្រាប់អភិវឌ្ឍន៍បន្ថែមនៅក្នុងសហគ្រាសក៏ដូចជាអាជីវកម្មរបស់ខ្លួនផងដែរ។
ក្នុងឱកាសបានចូលជួបសម្ដែងការគួរសមជាមួយសម្ដេចតេជោខាងលើនេះ លោកឧកញ៉ា តែ តាំងប៉ ក៏បានថ្លែងអំណរគុណយ៉ាងជ្រាលជ្រៅដល់រាជរដ្ឋាភិបាលដែលបានជួយ និងបន្តជ្រោមជ្រែងវិស័យឱ្យមានភាពរីកចម្រើនដើម្បីជាប្រយោជន៍ដល់សេដ្ឋកិច្ចជាតិ ជាពិសេសលើកកម្ពស់កម្រិតជីវភាពប្រជាជនបានកាន់តែប្រសើរ៕
Account
Security
Favourite Content