ភ្នំពេញ ៖ រយៈពេលនៃជម្លោះរវាងកម្ពុជា និងថៃ ចាប់ពីចុងខែឧសភា រហូតដល់ខែសីហានេះ បានធ្វើឱ្យ​ទំនាក់​ទំនងរវាងប្រទេសទាំងពីរធ្លាក់ដាំក្បាលចុះយ៉ាងខ្លាំង។ ជាមួយគ្នានោះ ប្រជាពល​រដ្ឋកម្ពុជាដែលជាពលករបម្រើការងារនៅប្រទេសថៃ​ជាច្រើននាក់ក៏បានសម្រេចចិត្តវិលត្រឡប់មកកាន់ប្រទេសកំណើតវិញ។

យោងតាមការឱ្យដឹងពីក្រសួងការងារ បណ្ដុះបណ្ដាល និងវិជ្ជាជីវៈ បានឱ្យដឹងថា គិតមកត្រឹម​ខែសីហានេះ ពលករកម្ពុជាដែលធ្លាប់បម្រើការងារនៅប្រទេសថៃ បានត្រឡប់ចូលមកក្នុងប្រទេសកម្ពុជាវិញ មានចំនួនប្រមាណជិត ១លាន​នាក់ហើយ។ ការវិលត្រឡប់យ៉ាងគំហុករបស់ពលករនាពេលនេះ ត្រូវបានអ្នកជំនាញមើលឃើញថា នឹងជួយជំរុញ​កំណើនសេដ្ឋកិច្ចកម្ពុជាបានក្នុងទំហំដ៏ច្រើន ប្រសិនបើរដ្ឋាភិបាល​អាច​ដោះស្រាយការងារជូនពួក​គេទាន់ពេលវេលា។

មានប្រសាសន៍នៅក្នុងកិច្ចសម្ភាសន៍កម្មវិធី «អប្សារាយប់នេះ» លោក ច័ន្ទ សុផល នាយក​នៃមជ្ឈមណ្ឌល​សិក្សា​គោលនយោបាយបានឱ្យដឹងថា បើមើលទៅលើផលចំណេញ គឺ​ចំណេញផ្នែក​សេដ្ឋកិច្ច ក្នុងករណីដែលពួកគាត់មកដល់ស្រុកកំណើត ហើយទទួលបានការងារធ្វើ។ ជាក់ស្ដែងនៅក្នុងស្រុក សង្កេតឃើញថា នៅមានកង្វះខាតពលកម្មតាមរោងចក្រ សហគ្រាសមួយចំនួន ហើយអាចមានការវិនិយោគថ្មីៗ ដែលត្រូវការកម្លាំងពលកម្មថែម។ ដូច្នេះ ការវិលត្រឡប់មកវិញរបស់​ពលករនេះ អាចធ្វើឱ្យធូរស្រាលចំពោះតម្រូវការការងារបន្ថែមនៅតាមសហ​គ្រាស រោងចក្រ តា​ម​វិស័យកសិកម្មជាដើម ហើយក៏អាចជាផលចំណេញដល់សង្គមផងដែរ ដោយសារតែពួកគេបានជួបជុំ​គ្រួសារ​របស់គេវិញ។

អ្នកជំនាញដដែលបានបន្តគូសបញ្ជាក់ថា ៖

«ជាការគន់គូរងាយៗ ឧទាហរណ៍ថា ពលករ១លាននាក់ កម្រៃពលកម្មស្រុកយើងជាមធ្យមប្រហែលជា ២៥០ដុល្លារក្នុងមួយខែ ដោយមិនគិតពីប្រាក់​ថែមម៉ោង អីចឹងទៅក្នុងមួយឆ្នាំគឺអាចដល់ទៅ ៣ពាន់លាន​ដុល្លារ។ តួលេខនេះ បើគិតជាភាគរយ គឺប្រហែលជា ៦% នៃចំណូលក្នុងស្រុកសរុបរបស់យើង ខណៈដែលនៅក្នុងរយៈពេលប៉ុន្មានឆ្នាំចុងក្រោយនេះ កំណើនសេដ្ឋកិច្ចកម្ពុជាមានចំនួនប្រមាណ ៥% ទៅ  ៦%។ ដូច្នេះ ប្រសិនបើអាចដោះស្រាយរឿងការងារជូនពលករបាន វានឹងជំរុញឱ្យសេដ្ឋកិច្ច​កម្ពុជារីកលូតលាស់កាន់តែលឿនថែមទៀត»។

យ៉ាងណាក៏ដោយ គិតមកទល់ពេលនេះ រាជរដ្ឋាភិបាល ដែលមាន​ក្រសួង​ការងារជាសេនាធិការ ក៏កំពុងតែខិតខំផ្សារភ្ជាប់ពលករជាមួយនឹងរោងចក្រ ​សហគ្រាសនាន ដែលមានស្រាប់ ហើយទន្ទឹមនឹងនោះ ក្រសួងក៏កំពុងបង្កើតការងារថ្មីៗបន្ថែមទៀត ដើម្បីបង្គ្រប់តម្រូវការការងារ​របស់ពលករដែលនៅសេសសល់ផងដែរ។

ចំពោះដំណោះស្រាយទៅលើរឿងនេះ លោក ច័ន្ទ សុផល បានបង្ហាញការយល់ឃើញថា ៖

«បើសិន​រដ្ឋ​អាចមានលទ្ធភាព បើសិនជាអាចរកធនធានថវិកាពីប្រភពណាបាន ជួយបង្កើត​ជាគម្រោងរដ្ឋ ឬក៏គាំទ្រគម្រោងឯកជនបន្ថែមដែលយើងចាត់ទុកថាជាការដោះស្រាយ​វិបត្តិ គឺរដ្ឋ​ត្រូវតែហ៊ាន​ចំណាយ​…ដូចកាលកូវីដជាដើម ក៏រដ្ឋចំណាយប្រាក់ដើម្បីទិញវាក់សាំងដែរ។ ឥឡូវយើងគិតថាវាជា​វិបត្តិធំដែរ​ ដែលរដ្ឋត្រូវហ៊ានចំណាយធ្វើការលឿនៗដែរ ហើយបង្កើតការងារ​តាមវិស័យ»។

យោងតាមការចុះផ្សាយរបស់ក្រសួងព័ត៌មានបានឱ្យដឹងថា រហូតមកដល់ពេលនេះ ពលករដែល​ទទួលបានឱកាសការងាររួចរាល់ ​តាមរយៈយន្តការក្រសួងការងារផ្ទាល់ គឺមានចំនួន​ជាង៦ម៉ឺននាក់​ហើយ។ 

ទន្ទឹមនេះ ឱកាសការងារប្រមាណ២១ម៉ឺនកន្លែងទៀតកំពុងរង់ចាំកម្លាំងពលកម្ម ដែលពលករ​អាច​ស្វែង​រកឱកាសការងារនេះ តាមរយៈទូរសព្ទមកលេខ ១២៩៧ ដែលមានមន្ត្រីធ្វើការងារប្រចាំការ​៧ថ្ងៃក្នុង១សប្តាហ៍ ឬស្កេនកូដដើម្បីស្វែងរកឱកាសការងារ៕