សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងឱកាសអញ្ជើញផ្ដល់សញ្ញាបត្រជូននិស្សិតកសិកម្មនៅថ្ងៃដើមសប្ដាហ៍នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជាបានលើកឡើងអំពីបច្ចុប្បន្នភាពរបស់វិស័យកសិកម្មកម្ពុជាដែលមានការរួមតូចជាងពេលកន្លងទៅ ប៉ុន្តែការរួមតូចនេះគឺជាចំណុចល្អទៅវិញទេសម្រាប់វិស័យកសិកម្មនៅក្នុងប្រទេសទាំងមូល។
បើគេមើលពីទិដ្ឋភាពទូទៅនៅលើពិភពលោក ប្រទេសដែលកាន់តែមានសេដ្ឋកិច្ចជឿនលឿន គឺកាន់តែមានចំណែកចូលរួមពីវិស័យកសិកម្មតូច។ ជាស្ដែង សហរដ្ឋអាមេរិក ប្រទេសអាល្លឺម៉ង់ ប្រទេសបារាំង ប្រទេសជប៉ុន អាត្រានៃការចូលរួមរបស់វិស័យកសិកម្មក្នុងសេដ្ឋកិច្ចជាតិ គឺមានត្រឹមតែ១%ប៉ុណ្ណោះ។ នេះបើតាមប្រសាសន៍របស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា។
សម្ដេចតេជោបានបន្តមានប្រសាសន៍ថា ៖
“ត្បិតតែការចូលរបស់វិស័យកសិកម្មនៅក្នុងប្រទេសជឿនលឿនមានទំហំតូច ក៏ប៉ុន្តែចំនួនដ៏តូចស្ដួចស្ដើងនោះអាចមានលទ្ធភាពចិញ្ចឹមប្រជាជនបានទូទាំងប្រទេស ហើយថែមទាំងអាចនាំចេញថែមទៀតផង។ ពេលមុននេះ វិស័យកសិកម្មយើងគ្របដណ្ដប់មានរហូតទៅដល់ជាង ៨០% ក៏ប៉ុន្តែពេលនោះជាង ៨០%នៃចំណែកផលិតផលសរុបរបស់យើង ប្រជាពលរដ្ឋយើងនៅតែខ្វះខាតស្បៀង។”
សម្ដេចបន្តថា ៖
“យ៉ាងណាមិញ បើគិតពីអាត្រានៃផលិតផលសរុបរបស់យើងគឺចំនួនកសិកម្មយើងថយចុះ តែមិនមែនបានសេចក្ដីថាផលិតកម្មថយចុះទេ ដោយសារចំណែកក្នុងវិស័យសេវាកម្ម និងឧស្សាហកម្ម វាមានការលូតលាស់របស់វា…អីចឹងវិស័យកសិកម្មមានចំណែកថយចុះ ប៉ុន្តែប្រជាជនរបស់យើង កសិកម្មរបស់យើងមានចំនួនច្រើនជាង។”
នៅក្នុងឱកាសជាមួយគ្នានេះ សម្ដេចតេជោក៏បានបន្តគូសបញ្ជាក់ដែរថា វិស័យកសិកម្មរបស់កម្ពុជាកាលពីមុនគឺមានភាពខ្វះខាតអង្ករសម្រាប់ ប្រជាពលរដ្ឋទទួលទាន ដែលតម្រូវឲ្យរដ្ឋត្រូវទិញចូល ឬសុំជំនួយពីប្រទេសផ្សេងៗ ប៉ុន្តែពេលបច្ចុប្បន្ននេះ ត្បិតថាវិស័យកសិក្មកម្ពុជាបានរួញតូច តែមិនមានការខ្វះខាតទៀតទេ ផ្ទុយទៅវិញកម្ពុជាថែមទាំងមានលទ្ធភាពនាំចេញស្បៀងទៅកាន់ទីផ្សារក្រៅប្រទេសទៀតផង៕
Account
Security
Favourite Content