ភ្នំពេញ ៖ ដើមកៅស៊ូចាស់ជាងគេឈានចូលដល់អាយុ១០០ឆ្នាំ នៅកម្ពុជា ចំនួន៤៤០ដើម នៅលើផ្ទៃដី១៤ហិកតា ក្នុងចម្ការកៅស៊ូជប់ ឃុំជប់ ស្រុកត្បូងឃ្មុំ ខេត្តត្បូងឃ្មុំ។

បើតាមក្រុមហ៊ុន សុភក្តិនីកា អ៊ិនវេសមេន គ្រុប ខូអិលធីឌី  ចម្ការកៅស៊ូជាប្រវត្តិសាស្រ្តដែលមានអាយុ១០០ឆ្នាំនេះ គឺជាចម្ការកៅស៊ូចាស់ជាងគេនៅកម្ពុជា និងជាចំនួនដើមកៅស៊ូចាស់នៅរស់ច្រើនជាងគេបំផុតនៅក្នុងពិភពលោករហូតដល់ ៤៤៨ដើម លើផ្ទៃដីប្រមាណ១៤ហិកតា ។

ក្រុមហ៊ុន និងក្រសួងកសិកម្ម រុក្ខាប្រមាញ់ និងនេសាទ នឹងរៀបចំកម្មវិធីប្រឡងចៀរជ័រកៅស៊ូ និងប្រារព្ធខួប១០០ឆ្នាំ ដើមកៅស៊ូចាស់ជាងគេនៅកម្ពុជានៅចុងឆ្នាំ២០២៤នេះ។

ផ្តើមចេញពីការជ្រើសរើសគ្រាប់កៅស៊ូចំនួន ២៥៦៣គ្រាប់ ចេញពីចម្ការកៅស៊ូចាស់នេះ វិទ្យាស្ថានស្រាវជ្រាវកៅស៊ូកម្ពុជានៃអគ្គនាយកដ្ឋានកៅស៊ូ បានបណ្តុះ និងដាំ ពិសោធន៍ តាមដានការលូតលាស់ ទិន្នផល ជំងឺ និងលក្ខណៈសរីរៈទឹកជ័រ ចាប់តាំងពីឆ្នាំ២០១១ រហូតរកឃើញសេណូទីប (ពូជ) កៅស៊ូចំនួនពីរ គឺ G12 និង G19 ដែលមានលក្ខខណ្ឌដុះ និងលូតលាស់ស្របតាមក្សេត្របរិស្ថានកម្ពុជា។

បច្ចុប្បន្ននេះ ក្រសួងកសិកម្ម បានដាក់ស្នើសុំទៅគណៈកម្មការបញ្ចេញពូជដំណាំ ដើម្បីបញ្ចេញឱ្យប្រើប្រាស់ជាផ្លូវការ ដោយដាក់ឈ្មោះថា « CRRI 12 និង CRRI 19 »។

សូមជម្រាបថា ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី១២ ខែកញ្ញា ឆ្នាំ២០២៤ បានជួបពិភាក្សាជាមួយក្រុមហ៊ុន សុភក្តិនីកា អំពីការងាររៀបចំកម្មវិធីប្រឡងចៀរជ័រ និងពិធីប្រារព្ធខួប១០០ឆ្នាំ ដើមកៅស៊ូចាស់ជាងគេនៅកម្ពុជា ដែលមានទីតាំងស្ថិតនៅចម្ការកៅស៊ូជប់ ឃុំជប់ ស្រុកត្បូងឃ្មុំ ខេត្តត្បូងឃ្មុំ។ ជំនួបនេះធ្វើឡើងដើម្បីត្រួតពិនិត្យឡើងវិញលើការងារដែលបានអនុវត្តកន្លងមក និងដាក់ទិសដៅការងារអនុវត្តបន្តសម្រាប់ប្រារព្ធកម្មវិធីទាំង ២ នោះ ក្នុងខែវិច្ឆិកា ឆ្នាំ២០២៤។

កម្ពុជាមានផ្ទៃដីដាំកៅស៊ូជាង៤សែនហិកតា លាតសន្ធឹងលើខេត្តចំនួន១១ រួមមាន ខេត្តកំពង់ចាម ត្បូងឃ្មុំ ក្រចេះ ស្ទឹងត្រែង រតនគិរី មណ្ឌលគិរី ព្រះវិហារ បាត់ដំបង ប៉ៃលិន ឧត្តរមានជ័យនិងកំពត។ ចំពោះផ្ទៃដីដាំដុះវិញមានចំនួន ៤០៧ ១៧២ ហិកតា ហើយ​ក្នុងនោះ ៣២០ ១៨៨(ស្មើនឹង ៧៨,៦%) ជាដើមកៅស៊ូចាស់សម្រាប់ការចៀរយកជ័រ និងទទួលផលបាន។ នេះបើយោងតាមរបាយការណ៍របស់ក្រសួងកសិកម្ម រុក្ខាប្រមាញ់និងនេសាទ។

ផលិតផល​កៅស៊ូ​កម្ពុជា ក្នុង​ឆ្នាំ ​២០២៣ មានតម្លៃ​ប្រមាណ ៥៣៦​ លាន​ដុល្លារ ក្នុងនោះ​ការនាំ​ចេញទៅ​ទីផ្សារ​អន្តរ​ជាតិ​មាន​ចំនួន​ជាង ៩០ ​ភាគរយ​ទឹកប្រាក់​សរុប និង​សល់​ពី​នោះ​គឺជា​ការប្រើប្រាស់​នៅក្នុង​ស្រុក​។​

យោងទិន្នន័យ​អគ្គនាយកដ្ឋាន​កៅស៊ូ នៃ​ក្រសួងកសិកម្ម រុក្ខាប្រមាញ់ និង​នេសាទ ក្នុង​ឆ្នាំ ២០២៣ ប្រាក់ចំណូល​ដែល​កម្ពុជា​ទទួល​បាន​ពី​ផលិតផល​កៅស៊ូ មាន​សរុប ៥៣៦​ លាន​ដុល្លារ ក្នុងនោះ​ចំណូល​ពី​ការនាំ​ជ័រ​​កៅស៊ូ ទៅ​ទីផ្សារ​អន្តរជាតិ ៤៩០,៦​ លាន​ដុល្លារ​,ចំណូល​ពី​ការនាំចេញ​ឈើ​កៅស៊ូ ១,៦ ​លាន​ដុល្លារ​,និង​ការប្រើប្រាស់​ជ័រ​​កៅស៊ូ​ក្នុងស្រុក ៤៣,៨ ​លាន​ដុល្លារ​។​

សម្រាប់​បរិមាណ​ជ័រកៅស៊ូ​ដែល​បាន​នាំ​​ចេញ​ក្នុង​ឆ្នាំ​ ២០២៣ គឺ​សម្រេចបាន​ចំនួន ៣៦៨ ០៤៨​ តោន ថយចុះ ៤ ៨៥៥​ តោន​ធៀប​ឆ្នាំ​ ២០២២និង​ឈើ​កៅស៊ូ​មាន​ចំនួន ​(​ឈើ​ចាស់ៗ​អស់​ប្រសិទ្ធភាព​សេដ្ឋកិច្ច​)៩ ៤១១​ ម៉ែត្រគុប ថយ ១៧ ០៧៨ ​ម៉ែត្រ​គុប​។ ចំណែក​ផលិតផល​កៅស៊ូ​ប្រើប្រាស់​ក្នុងស្រុក​មាន​ចំនួន ៣០ ៤៥២​ តោន​៕​