សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពី The Guardian បានរាយការណ៍ថា សេដ្ឋកិច្ចរបស់ចិនបានកើនឡើង ៥ ភាគរយកាលពីឆ្នាំ២០២៤ ស្របតាមគោលដៅដែលបានកំណត់ដោយរដ្ឋាភិបាល ប៉ុន្តែវាគឺជាអត្រាទាបបំផុតចាប់តាំងពីឆ្នាំ១៩៩០ ដោយមិនរាប់បញ្ចូលឆ្នាំមានការរាតត្បាតជំងឺកូវីដ-១៩នោះឡើយ។
យោងតាមការិយាល័យស្ថិតិជាតិរបស់ទីក្រុងប៉េកាំងបានឱ្យដឹងថា កំណើនសេដ្ឋកិច្ចបានកើនឡើងលឿនពេញមួយឆ្នាំ ដោយកើនឡើងពី ៤,៦ ភាគរយក្នុងត្រីមាសទី៣ ដល់ ៥,៤ ភាគរយ ក្នុងត្រីមាសចុងក្រោយ។ ជាលទ្ធផល កំណើនសេដ្ឋកិច្ចចិនសម្រេចបានក្នុងអត្រាប្រចាំឆ្នាំ ៥ ភាគរយក្នុងឆ្នាំ២០២៤។ លើសពីនេះ សេដ្ឋកិច្ចបានងើបឡើងវិញគួរឱ្យកត់សម្គាល់នៅរយៈពេលចុងក្រោយនៃឆ្នាំ២០២៤ បន្ទាប់ពីរដ្ឋាភិបាលបានប្រកាសពីវិធានការជំរុញជាបន្តបន្ទាប់រួមមាន ការកាត់បន្ថយអត្រាការប្រាក់ គម្រោងពាណិជ្ជកម្មសម្រាប់ទំនិញប្រើប្រាស់ និងការលើកទឹកចិត្តពន្ធសម្រាប់ការទិញអចលនទ្រព្យ។ នៅក្នុងពេញមួយឆ្នាំ២០២៤ ទិន្នផលឧស្សាហកម្មបានកើនឡើង ៥,៨ ភាគរយពីឆ្នាំ២០២៣ ជំរុញដោយដំណើរការក្នុងការផលិតដ៏រឹងមាំ ប៉ុន្តែការលក់រាយបានកើនឡើងត្រឹមតែ ៣,៥ ភាគរយប៉ុណ្ណោះ បើទោះបីជាគោលនយោបាយមានគោលបំណងជំរុញតម្រូវការក្នុងស្រុកក៏ដោយ។
លោក Sam Jochim សេដ្ឋវិទូនៅក្រុមហ៊ុន EFG Asset Management បានលើកឡើងថា កំណើនការនាំចេញមានភាពរឹងមាំនៅក្នុងត្រីមាសទី ៤ ជំរុញដោយការបញ្ជាទិញពីសហរដ្ឋអាម៉េរិក មុនពេល Trump អនុម័តពន្ធ។
ទីក្រុងប៉េកាំងបានខិតខំព្យាយាមធ្វើឱ្យមានតុល្យភាពកំណើនឡើងវិញ ដោយកាត់បន្ថយការពឹងផ្អែកយ៉ាងខ្លាំងលើការនាំចេញ ហើយងាកមកជំរុញការប្រើប្រាស់ក្នុងស្រុកវិញ។ យ៉ាងណាមិញ បរិយាកាសសេដ្ឋកិច្ចនៅតែមានភាពស្មុគស្មាញ និងធ្ងន់ធ្ងរ ជាមួយនឹងការកើនឡើងសម្ពាធពីខាងក្រៅ និងការលំបាកខាងក្នុង។ ការធ្លាក់ចុះនៃអចលនទ្រព្យ និងផលប៉ះពាល់ក្រោយការរាតត្បាតនៅតែមានឥទ្ធិពលលើសេដ្ឋកិច្ចចិន ជាពិសេសការប្រើប្រាស់ក្នុងស្រុកកាន់តែធ្លាក់ចុះ។ មិនត្រឹមតែប៉ុណ្ណោះ មានការសង្ស័យមួយចំនួនលើកឡើង ទិន្នន័យសេដ្ឋកិច្ចរបស់ចិនមានភាពមិនពិតប្រាកដ។ គេព្យាករណ៍ថា ចិននឹងទទួលរងផលប៉ះពាល់ខ្លាំងបំផុតពីពន្ធដែលគំរាមកំហែងដោយ លោក Donald Trump ដែលមានបំណងដំឡើងពន្ធ ៦០ ភាគរយលើការនាំចូលរបស់ចិនទាំងអស់។
ក្នុងរយៈពេលប៉ុន្មានខែថ្មីៗនេះ ក្រុមហ៊ុនអាម៉េរិកមួយចំនួនកំពុងបង្កើនការនាំចូលពីចិនអោយបានច្រើនមុនពេលមានការអនុម័តលើពន្ធ ទោះបីជាមិនច្បាស់ថា តើផែនការរបស់លោក Trump នឹងត្រូវបានដាក់ឱ្យអនុវត្តពេលណាក៏ដោយ។ លើសពីនេះ រដ្ឋបាល Biden បានដាក់ការរឹតបន្តឹងបន្ថែមទៀតលើការនាំចេញឧបករណ៍អេឡិចត្រូនិក និងបច្ចេកវិទ្យាទំនើបទៅកាន់ចិន ដើម្បីរារាំងចិនពីការចូលប្រើប្រាស់បច្ចេកវិទ្យាកម្រិតខ្ពស់ទាំងនោះ៕
Account
Security
Favourite Content