បរទេស ៖ យោងតាមប្រភពព័ត៌មានពី CNN បានរាយការណ៍ថា ខណៈពេលដែលធនាគារកណ្តាលជាច្រើននៅជុំវិញពិភពលោកព្យាយាមធ្វើឱ្យអតិផរណាចុះ​ត្រជាក់នោះ ប្រទេសចិនកំពុងប្រឈមនឹងបរិត្តផរណា ដែលជាការធ្លាក់ចុះនៃតម្លៃទំនិញ។

យោងតាមទិន្នន័យដែលចេញផ្សាយដោយការិយាល័យស្ថិតិជាតិរបស់ចិនកាលពីថ្ងៃសៅរ៍ចុងសប្ដាហ៍កន្លងទៅនេះបានបង្ហាញថា សន្ទស្សន៍តម្លៃទំនិញប្រើប្រាស់ (CPI) បានធ្លាក់ចុះ ០,៥ ភាគរយនៅក្នុងខែវិច្ឆិកាលើមូលដ្ឋានប្រចាំឆ្នាំ ដែលជាការធ្លាក់ចុះដ៏ធំបំផុតចាប់តាំងពីការរាតត្បាតកាលពី ៣ ឆ្នាំមុន។ ការធ្លាក់ចុះនេះបានបង្ហាញពីការបង្កើនល្បឿននៃអត្រាបរិត្តផរណាពីខែតុលា និងជំរុញឱ្យមានវិធានការបន្ទាន់ពីទីក្រុងប៉េកាំង ដើម្បីជំរុញតម្រូវការ និងទប់ស្កាត់ការធ្លាក់ចុះនៃតម្លៃ។

ទិន្នន័យនេះចេញផ្សាយប៉ុន្មានថ្ងៃបន្ទាប់ពីអ្នកបង្កើតគោលនយោបាយចិនបានប្តេជ្ញាពង្រឹងការគាំទ្រផ្នែកសារពើពន្ធ និងរូបិយវត្ថុ ដើម្បីជំរុញសេដ្ឋកិច្ចធំបំផុតទីពីររបស់ពិភពលោកដែលកំពុងតស៊ូជាមួយវិបត្តិអចលនទ្រព្យ អត្រាខ្ពស់នៃភាពអត់ការងារធ្វើរបស់យុវជន និងការថយចុះទំនុកចិត្តអ្នកប្រើប្រាស់។

នៅឆ្នាំនេះ​ ​ចិន​បាន​ប្រយុទ្ធ​ប្រឆាំងនឹង​តម្លៃ​ទាប​ភាគ​ច្រើន​ ដោយសារ​ទីផ្សារ​អចលនទ្រព្យ​ធ្លាក់​ចុះ និង​ការ​ចំណាយ​ទាប។ ទន្ទឹមនឹងនេះ បរិត្តផរណាគឺអាក្រក់សម្រាប់សេដ្ឋកិច្ច ពីព្រោះអ្នកប្រើប្រាស់ និងក្រុមហ៊ុនអាចបញ្ឈប់ការទិញ ឬការវិនិយោគ ដោយរំពឹងថាតម្លៃនឹងធ្លាក់ចុះបន្ថែមទៀត។ លើសពីនេះ វាអាចធ្វើឲ្យសេដ្ឋកិច្ចកាន់តែយឺត និងបង្កើតជាវិបត្តិដ៏កាចសាហាវមួយ។ អតិផរណាអ្នកប្រើប្រាស់បានចាប់ផ្តើមធ្លាក់ចុះក្នុងខែកុម្ភៈ ប៉ុន្តែប្រែទៅជាអវិជ្ជមានក្នុងខែកក្កដាជាលើកដំបូងក្នុងរយៈពេលជាងពីរឆ្នាំ។ ក្រោយមក​ វា​បាន​ត្រឡប់​ទៅ​ជា​វិជ្ជមាន​វិញ​ក្នុង​ខែ​សីហា ហើយ​មាន​លំនឹង​នៅ​ខែ​កញ្ញា ប៉ុន្តែ​បាន​ធ្លាក់​ចុះ​មក​ក្រោម​សូន្យ​វិញ​ក្នុង​ខែ​តុលា។

កាលពីថ្ងៃអាទិត្យ អ្នកវិភាគមកពី Citi និយាយនៅក្នុងរបាយការណ៍មួយថា ស្ថានភាពបរិត្តផរណារបស់ចិនកំពុងកាន់តែស៊ីជម្រៅជាមួយនឹងបញ្ហាតម្លៃម្ហូបអាហារក្នុងស្រុកធ្លាក់ថ្លៃបីដង ភាពប្រែប្រួលនៃតម្លៃប្រេងអន្តរជាតិ និងតម្រូវការក្នុងស្រុកចុះខ្សោយ។ ឥឡូវនេះ សញ្ញា​នៃ​ភាព​ទន់ខ្សោយ​នៃ​តម្លៃ​កំពុង​រាលដាល​ពី​ទំនិញ​ទៅ​សេវាកម្ម​​។ តម្លៃម្ហូបអាហារជាពិសេសសាច់ជ្រូក គឺជាការអូសទាញឲ្យសន្ទស្សន៍តម្លៃទំនិញប្រើប្រាស់ CPI ធ្លាក់ចុះ ៤,២ ភាគរយនៅក្នុងខែវិច្ឆិកា បើធៀបនឹងឆ្នាំមុន។ បន្ទាប់ពីតម្លៃប្រេងអន្តរជាតិធ្លាក់ដល់កម្រិតទាបបំផុតក្នុងខែវិច្ឆិកា តម្លៃប្រេងសាំងរបស់ចិនក៏បានធ្លាក់ចុះផងដែរ។  

ស្របពេលនេះដែរ សម្ពាធ​បរិត្តផរណា​កាន់តែ​អាក្រក់​ទៅៗអាចប៉ះពាល់​បន្ថែម​ទៀត​លើ​ការ​ស្ទុះ​ងើបឡើងវិញរបស់​សេដ្ឋកិច្ច​​ចិន។ កាលពីខែមុន លោក Pan Gongsheng ទេសាភិបាលនៃធនាគារកណ្តាលចិន បាននិយាយថា ចិននឹងរក្សាគោលនយោបាយរូបិយវត្ថុ ដើម្បីគាំទ្រសេដ្ឋកិច្ច ហើយរំពឹងថាតម្លៃទំនិញប្រើប្រាស់នឹងកើនឡើងនៅក្នុងប៉ុន្មានខែខាងមុខនេះ។

កាលពីថ្ងៃសុក្រ មន្ត្រីកំពូលរបស់ចិនបានកោះប្រជុំការិយាល័យនយោបាយ ហើយបានប្តេជ្ញាថានឹងអនុវត្តបន្ថែមទៀតដើម្បីពង្រីកតម្រូវការក្នុងស្រុក និងជំរុញការចំណាយរបស់អ្នកប្រើប្រាស់។ កិច្ចប្រជុំការិយាល័យនយោបាយ រួមជាមួយនឹងសន្និសីទការងារសេដ្ឋកិច្ចកណ្តាលប្រចាំឆ្នាំ (CEWC) ដែលត្រូវបានរំពឹងទុកនៅចុងខែនេះ គឺជាកំណត់គោលនយោបាយសេដ្ឋកិច្ចសម្រាប់ឆ្នាំខាងមុខនេះ។ ទន្ទឹមនឹងនេះ វិនិយោគិនកំពុងរង់ចាំព័ត៌មានលម្អិតពី CEWC អំពីគោលនយោបាយសេដ្ឋកិច្ចសម្រាប់ឆ្នាំក្រោយ ហើយពួកគេរំពឹងថា សមាមាត្រតម្រូវការបំរុង (ចំនួនប្រាក់ដែលធនាគារត្រូវតែរក្សានៅក្នុងទុនបម្រុង) និងអត្រាការប្រាក់នឹងត្រូវបានកាត់បន្ថយ៕