សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពីរ៉យទ័របានរាយការណ៍ថា ចិនបានដាក់ពាក្យបណ្តឹងទៅអង្គការពាណិជ្ជកម្មពិភពលោក (WTO) ប្រឆាំងនឹងការយកពន្ធ និងការរឹតបន្តឹងពន្ធគយរបស់ Donald Trump មកលើការនាំចូលរបស់ចិនទៅក្នុងទឹកដីអាម៉េរិក។
កាលពីថ្ងៃពុធ ចិនបានដាក់ពាក្យបណ្តឹងទៅអង្គការពាណិជ្ជកម្មពិភពលោក (WTO) ប្រឆាំងនឹងការដាក់ពន្ធថ្មី ១០ ភាគរយរបស់ប្រធានាធិបតីសហរដ្ឋអាម៉េរិក Donald Trump លើការនាំចូលរបស់ចិន និងប្រឆាំងទៅនឹងការលុបចោលរបស់អាម៉េរិកលើការលើកលែងពន្ធសម្រាប់ទំនិញតម្លៃទាប។ នៅក្នុងពាក្តបណ្តឹង ចិនបានលើកហេតុផលថា សកម្មភាពនេះគឺជាការការពារនិយម និងបំពានច្បាប់របស់ WTO ។ ទីក្រុងប៉េកាំងបានដាក់សំណើសម្រាប់ការពិគ្រោះយោបល់ពាណិជ្ជកម្មជាមួយសហរដ្ឋអាមេរិកបន្ទាប់ពី Trump លុបចោលការលើកលែងពន្ធអប្បបរមាលើការនាំចូលកញ្ចប់ ‘de minimis’ ដែលមានតម្លៃក្រោម ៨០០ ដុល្លារ។ បញ្ហានេះកំពុងបង្កការព្រួយបារម្ភខាងផ្នែកដឹកជញ្ជូន និងអ្នកលក់រាយ ដោយសារភាគច្រើនវិធីសាស្ត្រនេះត្រូវបានប្រើប្រាស់យ៉ាងទូលំទូលាយដោយក្រុមហ៊ុនពាណិជ្ជកម្មអេឡិចត្រូនិក (e-commerce) រួមមាន៖ Shein, Temu, និង Amazon។ មន្ត្រីគយ និងការពារព្រំដែនអាម៉េរិក លើកឡើងថា កញ្ចប់តូចៗ ‘de minimis’ ទាំងអស់ពីប្រទេសចិន និងហុងកុងចាំបាច់ត្រូវមានឯកសារគយមុនពេលមកដល់ ហើយទំនិញដែលគ្មានឯកសារនេះនឹងត្រូវបញ្ជូនត្រឡប់ទៅវិញ។
រដ្ឋបាល Trump បានរិះគន់ថា ការលើកលែងពន្ធសម្រាប់កញ្ចប់ ‘de minimis’ ដែលជាដើមចមអនុញ្ញាតឱ្យមាន fentanyl និងសារធាតុគីមីចូលទៅក្នុងសហរដ្ឋអាម៉េរិកងាយស្រួលដោយមិនបានត្រួតពិនិត្យ។ សេវាប្រៃសណីយ៍សហរដ្ឋអាម៉េរិក (USPS) បាននិយាយនៅក្នុងសេចក្តីថ្លែងការណ៍មួយថា ខ្លួនកំពុងធ្វើការជាមួយទីភ្នាក់ងារគយ និងការពារព្រំដែនសហរដ្ឋអាមេរិកក្នុងការបង្កើតប្រព័ន្ធប្រមូលដ៏មានប្រសិទ្ធភាពសម្រាប់ពន្ធថ្មីដែលដាក់លើប្រទេសចិន ដើម្បីកាត់បន្ថយការរំខានដល់ការដឹកជញ្ជូន។ មនុស្សជាច្រើនបានរិះគន់ថា គ្មាននរណាម្នាក់បានត្រៀមខ្លួនសម្រាប់រឿងនេះទេ ដោយសារការសម្រេចចិត្តភ្លាមៗរបស់សេវាប្រៃសណីយ៍សហរដ្ឋអាម៉េរិក (USPS) ក្នុងការបញ្ឈប់ការទទួលយកកញ្ចប់ពីប្រទេសចិន និងហុងកុង មិនបានផ្តល់ការព្រមានជាមុន ឬ ការជូនដំណឹងឡើយ។ ជាទូទៅ កញ្ចប់ de minimis ត្រូវបានបង្រួបបង្រួមចូលគ្នា ដើម្បីខាងគយអាចបោសម្អាតកញ្ចប់រាប់ពាន់ក្នុងពេលតែមួយ ប៉ុន្តែការរឹតបន្តឹងថ្មីនេះនឹងតម្រូវអោយកញ្ចប់នីមួយៗមានការចែកដាច់ដោយឡែកគ្នា ហើយការងារនេះនឹងបង្កើនបន្ទុកយ៉ាងខ្លាំងសម្រាប់សេវាប្រៃសណីយ៍ ឈ្មួញកណ្តាល និងភ្នាក់ងារគយ។
ទន្ទឹមនឹងនេះ បញ្ហានេះនឹងប៉ះពាល់ដល់ពលរដ្ឋអាម៉េរិកជាច្រើនជាពិសេសអ្នកលក់រាយ ដែលទិញទំនិញពីចិនតាមរយៈពាណិជ្ជកម្មអេឡិចត្រូនិក (e-commerce)។ យោងតាមទិន្នន័យរបស់ទីភ្នាក់ងារគយ និងការពារព្រំដែនសហរដ្ឋអាម៉រិក (CBP) បានឲ្យដឹងថា ក្នុងឆ្នាំ ២០២៤ ការដឹកជញ្ជូនប្រហែល ១,៣៦ ពាន់លានបានចូលសហរដ្ឋអាម៉េរិកដោយប្រើវិធីសាស្ត្រ de minimis ដោយតួរលេខនេះកើនឡើង ៣៦ ភាគរយពីឆ្នាំ ២០២៣។
អង្គការពាណិជ្ជកម្មពិភពលោក (WTO) លើកឡើងថា ចិនបានដាក់សំណើរសុំការពិគ្រោះបញ្ហាពន្ធគយជាមួយសហរដ្ឋអាម៉េរិក ដោយអះអាងថា ការដាក់ពន្ធគយថ្មីរបស់ Trump ក្នុងគោលបំណងបញ្ឈប់លំហូរនៃសារធាតុ fentanyl និងសារធាតុគីមីទៅកាន់សហរដ្ឋអាម៉េរិកគឺជាការចោទប្រកាន់មិនពិត និងគ្មានមូលដ្ឋានមកលើចិន។ លើសពីនេះ ការដាក់ពន្ធគយនេះគឺមានភាពរើសអើង ដោយសារអាម៉េរិកអនុវត្តចំពោះតែទំនិញដែលមានដើមកំណើតពីប្រទេសចិន និងមិនស្របតាមច្បាប់របស់ WTO។ ទន្ទឹមនឹងនេះ ការដាក់សំណើសម្រាប់ការពិគ្រោះយោបល់គឺជាការចាប់ផ្តើមនៃដំណើរការជម្លោះដែលអាចនាំឱ្យមានសេចក្តីសម្រេចថា ការដាក់ពន្ធគយរបស់ Trump ពិតជារំលោភលើច្បាប់ពាណិជ្ជកម្មមែន។ ករណីនេះស្រដៀងទៅនឹងសេចក្តីសម្រេចរបស់ WTO ឆ្នាំ ២០២០ កំឡុងពេលអាណត្តិមុនរបស់ Trump បានរកឃើញថា ការដាក់ពន្ធគយរបស់គាត់មកលើប្រទេសចិនគឺជាការបំពានបទប្បញ្ញត្តិពាណិជ្ជកម្ម។ យ៉ាងណាមិញ ការទទួលជ័យជម្នះបែបនេះទំនងជាមិននាំមកនូវភាពធូរស្រាលដល់ទីក្រុងប៉េកាំងនោះទេ ដោយសារតែស្ថាប័នបណ្តឹងឧទ្ធរណ៍របស់ WTO អសកម្មជាច្រើនឆ្នាំមកហើយ ដោយសារសហរដ្ឋអាម៉េរិកបានរារាំងការតែងតាំងចៅក្រមសាលាឧទ្ធរណ៍។ សេចក្តីសម្រេចចុងក្រោយនៅក្នុងសំណុំរឿងឆ្នាំ ២០២០ ត្រូវបានរារាំងដោយសហរដ្ឋអាម៉េរិក៕
Account
Security
Favourite Content