បរទេស៖ យោងតាមប្រភពព័ត៌មានពី South China Morning Post បានលើកឡើងថា ទោះបីជាការនាំចេញរបស់ចិនបានកើនឡើងដោយសារតែការកើនឡើងនៃតម្រូវការពីអាស៊ីអាគ្នេយ៍ក៏ដោយ ប៉ុន្តែវានៅតែស្ថិតក្រោមសម្ពាធដែលការកើតឡើងនៃពីការដំឡើងពន្ធពីសហរដ្ឋអាមេរិក និងសហភាពអឺរ៉ុប។

ការនាំចេញបានក្លាយទៅជាកត្តាជំរុញមួយដែលធ្វើឱ្យកំណើនសេដ្ឋកិច្ចរបស់ចិនមានស្ថិរភាពក្នុងឆ្នាំ២០២៤ ដែលត្រូវបានគាំទ្រដោយតម្រូវការសកលដ៏ខ្លាំងនៅក្នុងវិស័យអេឡិចត្រូនិក និងបច្ចេកវិទ្យាបៃតង។ ការស្ទុះងើបឡើងវិញបែបនេះនឹងបន្តកើតឡើងនៅក្នុងប៉ុន្មានខែខាងមុខ ដែលនាំមកនូវកំណើនការនាំចេញដល់ ៦ ភាគរយ ឬលើសពីនេះ។

យោងតាមទិន្នន័យគយចិនបានឲ្យដឹងថា កំណើននៃការនាំចេញលើសពីការរំពឹងទុកដោយបានកើនឡើង ៧,៦ ភាគរយពីឆ្នាំមុន ឬ ៣០២,៤ ពាន់លានដុល្លារក្នុងខែឧសភា ដែលជាតម្លៃនាំចេញប្រចាំខែខ្ពស់បំផុតចាប់តាំងពីខែកញ្ញា។ ទោះបីជាប្រទេសចិនបានរាយការណ៍ពីការធ្លាក់ចុះយ៉ាងខ្លាំងនៃការនាំចេញក្នុងអត្រា ៧,៥ ភាគរយក្នុងខែដូចគ្នាកាលពីឆ្នាំមុនក៏ដោយ ប៉ុន្តែការកើនឡើងយ៉ាងឆាប់រហ័សនៃកំណើននេះគឺបណ្តាលមកពីផ្នែកទាបនៃមូលដ្ឋាន។ មិនត្រឹមតែប៉ុណ្ណោះ ការនាំចេញទៅកាន់អាស៊ានបានកើនឡើងដល់ ២២,៥ ភាគរយនៅក្នុងខែឧសភា ដែលជាកំណើនប្រចាំខែខ្ពស់បំផុតចាប់តាំងពីខែមីនា ឆ្នាំ ២០២៣។

លោក Gary Ng សេដ្ឋវិទូជាន់ខ្ពស់នៅក្រុមហ៊ុន Natixis Corporate and Investment Bank លើកឡើងថា ទិន្នន័យនាំចេញក្នុងខែនេះបង្ហាញពីនិន្នាការនាំចេញដ៏រឹងមាំដែលបានឃើញក្នុងរយៈពេលប៉ុន្មានខែចុងក្រោយនេះ ហើយសេដ្ឋកិច្ចរបស់ចិនត្រូវបានជំរុញដោយការនាំចេញជាចម្បង។ កំណើនយ៉ាងឆាប់រហ័សនៃការនាំចេញទៅកាន់អាស៊ានគឺទទួលបានអត្ថប្រយោជន៍ ដោយសារការផ្លាស់ប្តូរនៅក្នុងសង្វាក់ឧស្សាហកម្ម ខណៈដែលផលិតផលទាំងនោះជាទូទៅកំណត់គោលដៅទៅកាន់សហរដ្ឋអាមេរិក។ នៅក្នុងទិន្នន័យនាំចេញសម្រាប់ខែឧសភា បានឲ្យដឹថា តម្លៃនៃការនាំចេញដឹកជញ្ជូនតាមរថយន្តបានកើនឡើងបានកើនឡើង ២៩,៩ ភាគរយ ខណៈដែលតម្លៃនៃការនាំចេញដឹកជញ្ជូនតាមកប៉ាល់កើនឡើង ៥៧,១ ភាគរយ។ លើសពីនេះ ការនាំចេញសៀគ្វីរួមបញ្ចូលគ្នាបានកើនឡើង ២៨,៤៧ ភាគរយដោយតម្លៃកាលពីខែមុនធៀបនឹងឆ្នាំមុន ខណៈដែលតម្លៃនៃការនាំចេញផលិតផលបច្ចេកវិទ្យាខ្ពស់បានកើនឡើង ៨,១ ភាគរយ។

យ៉ាងណាមិញការនាំចេញរបស់ប្រទេសចិនរងសម្ពាធមួយចំនួន ខណៈដែលទីក្រុងប៉េកាំងចង់ពង្រឹងការធ្លាក់ចុះនៃតម្រូវការក្នុងស្រុក បន្ទាប់ពីសហរដ្ឋអាមេរិកបានស្នើការដំឡើងពន្ធលើការនាំចូលទំនិញរបស់ចិនរួមមាន ឧបករណ៍អេឡិចត្រូនិក យានយន្តអគ្គិសនី ដែកថែប និងអាគុយ ដោយគ្រោងនឹងចូលជាធរមានចាប់ពីខែសីហា។ ទន្ទឹមនឹងនេះ សហភាពអឺរ៉ុបក៏គ្រោងនឹងចេញផ្សាយលទ្ធផលនៃការស៊ើបអង្កេតរបស់ខ្លួនលើការឧបត្ថម្ភធនរថយន្តអគ្គិសនីរបស់ប្រទេសចិន ដែលអាចបណ្តាលឱ្យមានការដំឡើងពន្ធ។ មិនត្រឹមតែប៉ុណ្ណោះ ការកើនឡើងនៃភាពតានតឹងនៃភូមិសាស្ត្រនយោបាយនាំមកនូវហានិភ័យបន្ថែមទៀតនៅឆ្នាំ ២០២៥។

លោក Ding Shuang ប្រធានសេដ្ឋវិទូចិននៅធនាគារ Standard Chartered Bank លើកឡើងដា ទោះបីជាការនាំចេញស្ថិតនៅក្រោមសម្ពាធ ប៉ុន្តែផលិតផលរបស់ប្រទេសចិននៅតែមានការប្រកួតប្រជែងខ្ពស់មិនថានៅក្នុងវិស័យបច្ចេកវិទ្យាខ្ពស់ ឬវិស័យដែលពឹងផ្អែកលើកម្លាំងពលកម្មនោះទេ។ ដូច្នោះហើយ ចិនគួរតែកែលម្អរចនាសម្ព័ន្ធនៃខ្សែសង្វាក់ឧស្សាហកម្មរបស់ខ្លួននៅក្នុងប្រទេសកំពុងអភិវឌ្ឍន៍បន្ថែម  និងគិតអំពីការផ្លាស់ប្តូរមួយចំនួនទៅកាន់សហរដ្ឋអាមេរិក ឬអឺរ៉ុបផងដែរ។ ទន្ទឹមនឹងនេះ ពាណិជ្ជកម្មអេឡិចត្រូនិក E-commerce ឆ្លងព្រំដែនរបស់ចិនក៏កំពុងដំណើរការល្អផងដែរ។ យ៉ាងណាមិញ គេកំពុងរង់ចាំមើលថា តើសហភាពអឺរ៉ុប និងអាម៉េរិកនឹងដាក់ពន្ធលើពួកគេនាពេលអនាគតដែរ ឬទេ?

ការ​នាំ​ចេញ​របស់ចិនទៅ​កាន់​សហរដ្ឋ​អាមេរិក​បាន​ការ​កើន​ឡើងក្នុងអត្រា​ប្រចាំ​ឆ្នាំ ដោយ​បាន​កើន​ឡើង ៣,៦ ភាគរយ​ក្នុង​ខែ​ឧសភា ​ដែលជាការកើនឡើងលើក​ដំបូង​ចាប់​តាំង​ពី​ខែ​មីនា យ៉ាងណាមិញ ការ​នាំ​ចេញ​ទៅសហភាំពអឺរ៉ុបបាន​ធ្លាក់​ចុះ ១ ភាគរយ​ក្នុង​ខែ​ឧសភា បើ​ធៀប​នឹង​ឆ្នាំ​មុន។ ​ការ​នាំ​ចេញ​រថយន្ត​របស់ចិននៅតែរឹងមាំ។ ការដំឡើងពន្ធរបស់សហរដ្ឋអាមេរិកលើយានយន្តអគ្គិសនីនឹងចូលជាធរមាននៅក្នុងខែសីហា ហើយរបាយការណ៍នៃពន្ធបណ្តោះអាសន្នរបស់សហភាពអឺរ៉ុបក៏នឹងចូលជាធរមាននៅក្នុងខែកក្កដាផងដែរ នោះចិនអាចជំរុញជាការនាំចេញនៅខែក្រោយ។ ប្រសិនបើការដំឡើងពន្ធគយទាំងនោះមានភាពខ្លាំងក្លា នោះការកើនឡើងនៃជម្លោះពាណិជ្ជកម្មនឹងកាន់តែក្តៅគគុក៕