សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ៖ ក្រុមហ៊ុន Danong Agricultural Development Group ដែលឈានមុខផ្នែកកសិកម្មរបស់ប្រទេសចិន បានបង្ហាញគំនិតផ្តួចផ្តើមវិនិយោគទ្រង់ទ្រាយធំមួយ ដោយគ្រោងនឹងវិនិយោគចំនួន ថវិកាដ៏ធំ ប្រមាណជាង ១២,៧ ពាន់លានដុល្លារអាមេរិក ដើម្បីធ្វើកសិកម្មឆ្លាតវៃ លើខេត្តយុទ្ធសាស្រ្ត ចំនួនប្រាំមួយ។
តាមរយៈសន្និសីទសារព័ត៌មានរួមគ្នា ជាមួយមន្ត្រីជាន់ខ្ពស់រាជរដ្ឋាភិបាលកម្ពុជាកាលពីថ្ងៃទី ១៤ ខែសីហា ឆ្នាំ ២០២៣ ថ្នាក់ដឹកនាំក្រុមហ៊ុនកសិកម្មរបស់ចិននេះ បានប្រកាសវិនិយោគលើវិស័យកសិកម្មនៅក្នុងខេត្តចំនួន៤ ជាប់បឹងទន្លេសាបរបស់កម្ពុជា ក្នុងនោះមានខេត្តបាត់ដំបង ពោធិ៍សាត់ សៀមរាប និងខេត្តកំពង់ធំ រួមទាំងខេត្តពីរផ្សេងទៀត គឺខេត្តព្រះសីហនុ និងខេត្តកំពត។
លោក(Zhao Shujie) ប្រធានក្រុមហ៊ុនតាណុង (Danong Agricultural Development Group)បានថ្លែងថា៖
«គម្រោងវិនិយោគកសិកម្មបែបទំនើបនៅកម្ពុជា គឺគម្រោងឧស្សាហូបនីយកម្មកសិកម្ម ដែលក្រុមហ៊ុនគ្រោងនឹងបោះទុនវិនិយោគចំនួនទឹកប្រាក់ប្រមាណ ១២,៧ពាន់លានដុល្លារ លើផ្ទៃដី៧៥ម៉ឺនហិកតានឹងផ្តោតលើការសាងសង់ និងគ្រប់គ្រងហេដ្ឋារចនាសម្ព័ន្ធកសិកម្ម គ្រប់គ្រង និងប្រតិបត្តិការងារឧស្សាហកម្ម កសិកម្ម និងបង្កើតធនាគារកសិកម្ម»។
លោក Zhao Shujie បានអះអាងថា ក្រុមហ៊ុន Danong Development Group ត្រៀមខ្លួនជាស្រេចក្នុងការជំរុញឱ្យមានបដិវត្តន៍ក្នុងវិស័យកសិកម្ម ពង្រឹងជំហររបស់ប្រទេសកម្ពុជា នៅលើឆាកកសិ ពាណិជ្ជកម្មពិភពលោក។ គម្រោងកសិកម្មឆ្លាតវៃ ដែលនឹងចាប់ផ្តើមអនុវត្តនាពេលឆាប់ៗខាងមុខនេះ គឺនឹងរំពឹងថា នឹងផ្តល់អត្ថប្រយោជន៍យ៉ាងជ្រាលជ្រៅចំពោះរាជរដ្ឋាភិបាលកម្ពុជា និងប្រជាជនកម្ពុជា។
បើតាមប្រធានក្រុមហ៊ុនតាណុង (Danong Agricultural Development Group)ក្រុមហ៊ុនក៏មានទិសដៅបង្កើតមជ្ឈមណ្ឌលសេវាកម្មចម្រុះដ៏ធំមួយនៅខេត្តព្រះសីហនុ និងបង្កើតធនាគារកសិកម្មដ៏ធំមួយ ដើម្បីផ្តល់ទុនជាសាច់ប្រាក់ជួយដល់កសិករយកទៅពង្រីកមុខរបរ ក្នុងនោះផលិតផលដែលផលិតបាននៅកម្ពុជាភាគច្រើន គឺសម្រាប់នាំចេញទៅកាន់ប្រទេសចិន។
កាលពីដើមខែសីហា ឆ្នាំ២០២៣នេះ ក្រុមហ៊ុននេះក៏បានដឹកនាំក្រុមការងារវិនិយោគ និងអ្នកបច្ចេកទេសកសិកម្មចំនួន ១៣នាក់ ជួបពិភាក្សាពីការងារវិនិយោគជាមួយរដ្ឋមន្រ្តីក្រសួងអភិវឌ្ឍន៍ជនបទ រដ្ឋមន្រ្តីក្រសួងកសិកម្មផងដែរ។
ក្នុងនោះ លោក ZHAO SHUJE បានលើកឡើងពីយុទ្ធសាស្រ្តវិនិយោគដ៏ទូលំទូលាយ ដោយសង្កត់ធ្ងន់ថា៖
«ក្រុមហ៊ុនយើងនឹងធ្វើការវិនិយោគលើវិស័យបសុសត្វ និងផលិតផលកសិកម្ម៤ប្រភេទ រួមមាន (១) ការដាំស្មៅសម្រាប់ការចិញ្ចឹមសត្វ (២) ការបង្កាត់ពូជនិងដាំពោត (៣) ការដាំដុះដំឡូងមី និងទី៤គឺការចិញ្ចឹមជ្រូក និងគោ។
ឯកឧត្តម ដួង តារា រដ្ឋលេខាធិការទីស្តីការគណៈរដ្ឋមន្ត្រី បានកោតសរសើរចំពោះកិច្ចសហការជាយុទ្ធសាស្ត្រនេះ ដោយលោកមានប្រសាសន៍ថា៖
«ក្រុមហ៊ុន Danong Development Group ជាក្រុមហ៊ុនមានបទពិសោធន៍ និងជំនាញច្បាស់លាស់ក្នុងវិស័យកសិ-ឧស្សាហកម្មបែបទំនើប និងឆ្លាតវៃ ដែលមានមូលដ្ឋាននៅខេត្តសាន់តុងរបស់ចិន។ ខ្ញុំគិតថាបើបានក្រុមហ៊ុននេះមកចូលរួមជាមួយយើង នោះវិស័យកសិកម្មនៅស្រុកយើងនឹងរីកចម្រើនបានលឿនយ៉ាងពិតប្រាកដ ហើយប្រទេសកម្ពុជានឹងក្លាយជាគំរូនៃការអភិវឌ្ឍកសិ-ឧស្សាហកម្ម»។
ឯកឧត្តម បានបង្ហាញពីការរំពឹងថា តាមរយៈការវិនិយោគរបស់ក្រុមហ៊ុននេះ នឹងជួយឱ្យប្រទេសកម្ពុជា ក្លាយជាប្រទេសគំរូមួយ ក្នុងវិស័យកសិកម្ម នៅពេលអនាគត ហើយនឹងផ្តល់អត្ថប្រយោជន៍ដល់ប្រជាកសិករ និងជួយទប់ស្កាត់ការចំណាកស្រុក របស់ប្រជាជនកម្ពុជាទៀតផង៕
Account
Security
Favourite Content