ជារៀងរាល់ឆ្នាំ នៅពេលជិតចូលដល់រដូវបុណ្យចូលឆ្នាំថ្មីប្រពៃណីជនជាតិចិន-វៀតណាម មិនថាជនជាតិខ្មែរដែលជាប់សែស្រឡាយចិន ជនជាតិវៀតណាម ឬជនជាតិចិននោះទេ ពួកគេភាគច្រើនតែងតែយកចិត្តទុកដាក់ទៅលើការតុបតែងលម្អលំនៅដ្ឋាន ជាពិសេសការដាក់តាំងដើមរុក្ខជាតិស្រស់ ក៏ដូចជាដើមផ្កាមួយចំនួនដែលគេមានជំនឿថា អាចនាំលាភនាំសំណាង ជួយលើករាសីខ្ពស់ និងអាចសម្រេចបាននូវជោគជ័យទាំងការរកស៊ីទទួលទាន ក៏ដូចជាការប្រកបកិច្ចការងារផ្សេងៗ ដូចជា ដើមផ្កាអង្គាសីល ដើមក្រូចឃ្វិច ដែលមានផ្លែស្រោចមែក ដើម​ផ្កាស្បៃរឿង រួមជាមួយនឹងដើមផ្កាចម្រុះច្រើនប្រភេទផ្សេងៗទៀត។

ក្នុងចំណោមដើមផ្កាចម្រុះ ដែលបានរៀបរាប់ខាងលើ បើគេងាកមកមើលទីផ្សារនៃរុក្ខជាតិ-និងដើមផ្កាដែលមានតម្រូវការខ្លាំងជាងគេ និងមិនអាចខ្វះបាននោះ គឺដើមផ្កាអង្គាសីល ដើមក្រូចឃ្វិចមានផ្លែស្រោចមែក និងដើមផ្កាស្បៃរឿង។​

យោង​តាម​ការ​ពន្យល់​ប្រាប់​របស់​លោក​ព្រឹទ្ធាចារ្យ​ ​កុក​ ​ឡុង​ ​ហោរា​ចិនសែ​ជើងចាស់​ល្បីឈ្មោះ​ មួយ​រូប​រស់នៅ​ទី​ក្រុងភ្នំពេញបានឱ្យដឹងថា​ ​មូល​ហេ​តុ​ដែលគេ​មាន​ជំនឿ​យក​ដើមផ្កា​អង្គាសីល​មក​តុបតែង​លម្អ​ក្នុង​ពិធី​បុណ្យចូលឆ្នាំ​ថ្មី​ប្រពៃណី​ចិន ​ព្រោះថា​ ​តាំងពីបុរាណកាលមក​ ​នៅ​ពេល​ចូលដល់រដូវ​ត្រជាក់ខ្លាំង​​ចូល​មកដល់​ ដើម​​អង្គាសីល​នៅតែ​បន្ត​រីក​ចេញផ្កា​ស្គុសស្គាយ​ខុសប្លែក​ពី​ប្រភេទ​ផ្កា​ដទៃទៀត​ដែល​ចាញ់​នឹង​អាកាសធាតុ​ត្រជាក់ ​ហើយជ្រុះ​ស្លឹក ​ឬ​ងាប់​ដើមតែម្ដង​។

នៅ​ក្នុង​វប្បធម៌​ជនជាតិ​ចិន​ ​ផ្កា​ប្រភេទ​នេះ​មាន​អត្ថន័យ​បង្កប់​ជា​ច្រើនលើស​ពី​អ្វី​ដែល​​ក្មេងៗ​ជំនាន់​ក្រោយ​ ​ឬ​​ប្រជាជន​ខ្មែរ​ដែល​ជាប់សែស្រឡាយចិន​តិចតួច​បាន​ដឹង​ ​ពោល​គឺ​​វា​មិន​ត្រឹមតែ​ជា​និមិត្តរូប​ផ្កា​​នាំ​លាភ​សំណាង​ ​ឬ​សេចក្តី​សុខសប្បា​យ​ឆ្នាំ​ថ្មី​នោះ​ទេ ​ជនជាតិ​ចិន​ក៏មាន​ជំនឿ​ថា​ ​សន្លឹក​ផ្កា​ពណ៌​លឿង​ឆ្អិនឆ្អៅ​នៃ​ផ្កា​អង្គាសីល​តំណាងឱ្យ​សន្លឹក​មាស​ ​ដែល​នៅ​ពេល​ផ្កា​នោះ​ជ្រុះ​តំណាង​​ឱ្យ​មាស​សម្បូរហូរហៀរ​ដែល​ជ្រុះ​ពេញ​លើ​ផ្ទៃផែនដី​។

អតិថិជនម្នាក់ដែលមកទិញដើមផ្កាអង្គាសីលបាននិយាយប្រាប់ក្នុងលក្ខខណ្ឌសុំមិនបង្ហាញរូបភាពឱ្យដឹងថា បើគេទិញផ្កានេះនៅពេលដែលផ្កាកំពុងនុបល្អ(ចេញពន្លកពុំទាន់រីក)ហើយដាក់ក្នុងថូ រួចបាញ់ស្រោចទឹករាល់ថ្ងៃ រហូតទៅដល់ថ្ងៃចូលឆ្នាំចិន គឺទាន់ពេលវេលា  ហើយការដែលផ្កានេះរីកល្អ គេកំណត់ និងសម្គាល់ថា វានឹងត្រជាក់ត្រជុំ សុខសប្បាយរីករាយក្នុងក្រុមគ្រួសារ។

លោកបញ្ជាក់ថា ជាទូទៅផ្កាអង្គាសីលនៅតែមានតម្លៃជាងផ្កាដទៃ ដោយសារតែនៅក្នុងរដូវបុណ្យចូលឆ្នាំចិនគេមានតម្រូវការច្រើន ហើយវាមានសំបូរទៅតាមតំបន់ប៉ុណ្ណោះ មិនមានគ្រប់តំបន់នោះទេ។

លោក ស្រ៊ុន ស្រៀង ដែលជាអ្នកលក់ផ្កាជម្រុះគ្រប់មុខនៅតាមបណ្ដោយផ្លូវ 6A បានប្រាប់ AMS ECONOMY ថា បើតាមចំណាំដែលធ្លាប់លក់ផ្កាកន្លងមក នៅឆ្នាំនេះ (ឆ្នាំ២០២៤) ផ្កាចម្រុះបានលក់ដាច់ច្រើនជាងធម្មតា ហើយផ្កាដែលមានតម្រូវការនៅពេលចូលឆ្នាំចិន គឺផ្កាអង្គាសីល និងផ្កាស្បៃរឿង។

លោកបានបញ្ជាក់ថាទៀតថា ៖ ប៉ុន្មានថ្ងៃចុងក្រោយនេះ នៅទីតាំងរបស់លោកបានបន្តលក់ដាច់ជាបន្តបន្ទាប់ ហើយរហូតទៅដល់ថ្ងៃចូលឆ្នាំចិនក៏នៅតែអាចលក់បានថែមទៀត ព្រោះឆ្នាំនេះ ការសែនមិនសូវប្រកាន់ពណ៌ផ្កាដូចឆ្នាំមុនៗនោះទេ ទោះជាផ្កាពណ៌ក្រហម លឿង ស ខៀវ ក៏ដោយ មិនសូវពិបាកលក់នោះទេ។

ដោយឡែក អាជីវករលក់ផ្កាចម្រុះម្នាក់ទៀតនៅហាង សុទ្ធា លីដា ម្ដុំផ្សារទឹកថ្លាបានឱ្យដឹងដែរថា ឆ្នាំនេះផ្កាសម្រាប់តាំង ដែលជាប្រភេទធម្មតា ឬផ្កាចម្រុះ មានតម្រូវការ និងងាយស្រួលលក់ជាងធម្មតា ព្រោះឆ្នាំនេះមិនប្រកាន់ពណ៌ដូចឆ្នាំទៅទេ។ ផ្កា​ពណ៌ស ក្រហមខៀវ លឿង ពណ៌ចម្រុះ គឺលក់បានច្រើនជាងផ្កាអង្គាសីល និងដើមក្រូចទៅទៀតផង។

គួរបញ្ជាក់ដែរថា ចំពោះតម្លៃដើមរុក្ខជាតិស្រស់ និងដើមផ្កាសដែលត្រូវបានដាក់លក់ គឺមានភាពប្រហាក់ប្រហែលគ្នា ដោយសម្រាប់ផ្កាស្បៃរឿងមួយគុម្ព(មួយផើងតូច)តម្លៃ ៦០០០ ទៅ ៧០០០ រៀល។ ចំណែកការអង្គារសីល លក់ជាផើង ឬពាង(មួយដើមធំ)មានផ្កាគ្រប់មែកតម្លៃ ២៥០ ដុល្លារទៅ ៣៥០ ដុល្លារ។ តែបើជាដើមតូច(ដាក់នៅក្នុងពាងតូច)តម្លៃមួយដើមតម្លៃ ៧៥ ដុល្លារ ឬរហូតដល់ជាង១០០ដុល្លារ ចំណែកឯដើមតូចបំផុត តម្លៃ២៥ ទៅ៣០ដុល្លារ។ ចំពោះតម្លៃដើមក្រូចដែលមានផ្លែពេញដើមមួយពាងតម្លៃ ៧០ ទៅ ១០០ដុល្លារ និងពាងធំតម្លៃពី២៥០ ទៅ ៣០០ដុល្លារ៕