ភ្នំពេញ ៖ សម្តេចមហាបវរធិបតី​ ​ហ៊ុន​ ​ម៉ា​ណែ​ត​ ​នាយករដ្ឋមន្ត្រីនៃ​កម្ពុជា​ និង​លោកជំទាវបណ្ឌិត​ ​បានចាកចេញ​ពី​ទី​ក្រុងភ្នំពេញ​នៅ​ថ្ងៃសុក្រនេះ​ ដើម្បី​ចូលរួម​កិច្ចប្រជុំ​កំពូល​រំលឹក​ខួប​លើក​ទី​ ​៥​០​ ​នៃ​មិត្តភាព​ ​និង​សហប្រតិបត្តិការ​អា​ស៊ាន​-​ជប៉ុន​ ​ ចាប់ពី​ថ្ងៃ​ទី​១​៦​ ​ដល់​ថ្ងៃ​ទី​១​៨​ ​ខែ​ធ្នូ​ ​ឆ្នាំ​២​០​២​៣ នៅប្រទេសជប៉ុន​។​

​មេដឹកនាំ​នៃ​បណ្តា​ប្រទេស​អា​ស៊ាន​ ​រួម​ទាំងសម្តេចធិបតី ហ៊ុន ម៉ាណែត​ ​ ​នឹង​ធ្វើ​ទស្សនកិច្ច​នៅ​ប្រទេស​ជប៉ុន​ ​ដើម្បី​ចូលរួម​ព្រឹត្តិការណ៍កិច្ចប្រជុំកំពូលពិសេស ដើម្បីរំលឹកខួបលើកទី៥០ នៃមិត្ត ភាព និងកិច្ចសហប្រតិបត្តិការរវាងជប៉ុន-អាស៊ាន​។​ សម្តេច​តេ​ជោ នឹង​ជួប​ពិភាក្សា​ការងារ​ទ្វេភាគី​ជាមួយ​ឯកឧត្តម. Kishida Fumio នាយករដ្ឋមន្ត្រីជប៉ុន នៅខាងក្រៅកិច្ចប្រជុំកំពូលរំលឹកខួបលើកទី៥០ នៃមិត្តភាព និងសហប្រតិបត្តិការអាស៊ាន-ជប៉ុន និងកម្មវិធីពាក់ព័ន្ធនៅទីក្រុងតូក្យូ។

ក្នុង​អំឡុង​កិច្ចប្រជុំ​កំពូល​រំលឹក​ខួប​ជា​ប្រវត្តិសាស្ត្រ​នេះ នាយករដ្ឋមន្ត្រី​ជប៉ុន ឯកឧត្តម​ K​i​s​h​i​d​a​ ​F​u​m​i​o ​នឹង​ធ្វើជា​ស​ហ​​ប្រធាន​នៃ​កិច្ចប្រជុំ​កំពូល​រំលឹក​ខួប​អនុ​ស្សា​វ​រី​យ៍​ជា​មួយឯកឧត្តម​ Joko ​W​i​do​do​ ​ប្រធានាធិបតី​នៃ​សាធារណរដ្ឋ​ឥណ្ឌូ​នេ​ស៊ី​ ​និង​ជា​ប្រធាន​អា​ស៊ាន​សម្រាប់​ឆ្នាំ​២​០​២​៣​។​ ​

​សេចក្តីថ្លែង​ការណ៍​រួម​ដែល​នឹង​កំណត់​ចក្ខុវិស័យ​ថ្មី​សម្រាប់​ពេល​អនាគត​ ​ហើយ​ផែនការ​អនុវត្ត​របស់​ខ្លួន​ ​រួម​ទាំង​កិច្ច​សហប្រតិបត្តិការ​ជាក់ស្តែង​ជាច្រើន​នឹង​ត្រូវ​បាន​អនុម័ត​ជា​ឯកសារ​លទ្ធផល​របស់​ខ្លួន​ ​ដោយ​ផ្អែកលើ​ទំនាក់ទំនង​ “​ចិត្ត និងចិត្ត​” ​ដែល​មានការ​ជឿជាក់​គ្នា​ដែល​ត្រូវ​បាន​កសាង​ឡើង​អស់​រយៈពេល​ជាច្រើន​ឆ្នាំ​មក​ហើយ​ ​ដើម្បី​ពង្រឹង​ទំនាក់ទំនង​ជប៉ុន​-​អា​ស៊ាន​បន្ថែម​ទៀត​។​

នាយករដ្ឋមន្ត្រី​ជប៉ុន​ ​ឯកឧត្តម​ K​i​s​h​i​d​a​ ​F​u​m​i​o ក៏បានលើកឡើងក្នុងសារនៃកិច្ចប្រជុំ ដោយបញ្ជាក់ថា ឯកឧត្តម នឹង​សរុប​សកម្មភាព​នៃ​ទំនាក់ទំនង​ជប៉ុន​-​អា​ស៊ាន​ ​ក្នុងរយៈពេល​ពាក់​កណ្តាល​សតវត្ស​រ៍កន្លងមក​នេះ​ ​និង​ស្នើ​ឡើង​នូវ​ចក្ខុវិស័យ​ថ្មី​ ​ព្រមទាំង​កិច្ច​សហប្រតិបត្តិការ​ជាក់ស្តែង​សម្រាប់​អនាគត។

សាររបស់ ឯកឧត្តម​ K​i​s​h​i​d​a​ ​F​u​m​i​o បានបញ្ជាក់ថា ឆ្នាំនេះ គឺខួបលើកទី៥០នៃមិត្តភាព និងកិច្ចសហប្រតិបត្តិការរវាងជប៉ុន-អាស៊ាន ដែលជាព្រឹត្តិការណ៍ប្រវត្តិសាស្រ្ត។ ចាប់តាំងពីប្រទេសជប៉ុនបានចាប់ផ្តើមកិច្ចសន្ទនាជាលើកដំបូងជាមួយអាស៊ានក្នុងឆ្នាំ១៩៧៣ មុនប្រទេសដទៃទៀតនៃពិភពលោក ប្រទេសជប៉ុនបានដើរជាមួយអាស៊ានលើមាគ៌ាឆ្ពោះទៅរកការអភិវឌ្ឍ និងសមាហរណកម្មរួមគ្នា។ ជប៉ុនបានគាំទ្រដល់ការអភិវឌ្ឍតំបន់អាស៊ានតាមរយៈកិច្ចសហប្រតិបត្តិការអភិវឌ្ឍក្នុងវិស័យផ្សេងៗ។

លើសពីនេះទៀត ជប៉ុន និងអាស៊ាន គឺជាដៃគូពាណិជ្ជកម្មដ៏សំខាន់របស់គ្នាទៅវិញទៅមក ហើយទំហំពាណិជ្ជកម្មជាមួយកម្ពុជាបានកើនឡើង១០ដង ពីចំនួនសរុបប្រមាណ ២២០លានដុល្លារក្នុងឆ្នាំ២០០៥ ដល់ប្រមាណ ២.២ប៊ីលានដុល្លារក្នុងឆ្នាំ២០២២។

ប្រទេសជប៉ុន គឺជាអ្នកវិនិយោគផ្ទាល់ធំទីពីរនៅក្នុងអាស៊ានបន្ទាប់ពីសហរដ្ឋអាមេរិក ហើយក្នុងរយៈពេលប៉ុន្មានឆ្នាំចុងក្រោយនេះ ការវិនិយោគផ្ទាល់របស់ប្រទេសជប៉ុននៅបណ្តាប្រទេសអាស៊ានជាមធ្យម គឺប្រមាណ ២.៣ទ្រីលានយ៉េន(ស្មើនឹងប្រមាណ ១៩.៣ ប៊ីលានដុល្លារអាមេរិក) ជារៀងរាល់ឆ្នាំ។

បច្ចុប្បន្ន ចំនួនក្រុមហ៊ុនជប៉ុននៅអាស៊ានមានប្រមាណ ១៥ ០០០ ក្រុមហ៊ុន ហើយពួកគេកំពុងរួមចំណែកដល់ការអភិវឌ្ឍសេដ្ឋកិច្ចរបស់អាស៊ាន ដោយបញ្ចូលនូវភាពរស់រវើកនៃតំបន់អាស៊ានដែលកំពុងរីកចម្រើនយ៉ាងឆាប់រហ័ស ទៅក្នុងសេដ្ឋកិច្ចរបស់ជប៉ុន ជាមួយនឹងការបង្កើតផលិតផល សេវាកម្ម និងការងារនៅក្នុងប្រទេសអាស៊ាននីមួយៗ។

ប្រទេស​ជប៉ុន​ ​និង​អា​ស៊ាន ក៏​បាន​ឆ្លង​កាត់​បញ្ហា​ប្រឈម​ជាច្រើន​ ​រួម​ទាំង​វិបត្តិរូបិយប័ណ្ណ​អាស៊ី​ឆ្នាំ​១​៩​៩​៧​ ​ការ​រញ្ជួយ​ដី​ដ៏​ធំ​នៅ​ស៊ូ​ម៉ា​ត្រា​ ​និង​រលក​យក្ស​ស៊ូ​ណា​មិ ​នៅ​មហាសមុទ្រ​ឥណ្ឌា​ឆ្នាំ​២​០​០​៤​ ​ការ​រញ្ជួយ​ដី​ដ៏​ខ្លាំង​នៅ​ប្រ​ទេស​ជប៉ុន​ឆ្នាំ​២​០​១​១​ ​និង​វិបត្តិ​ជំងឺ​កូ​វីដ-១៩​ ដែល​បាន​ចាប់ផ្តើម​នៅ​ឆ្នាំ​២​០​១​៩​ជាដើម​ ​ដែល​យើង​បាន​ឈោង​ចាប់​ដៃ​ទៅ​រក​គ្នា​ ​ហើយ​បង្ហាញ​ខ្លួន​យើង​ថា​ជា​ ​«​ដៃគូ​ដែល​គួរ​ឱ្យ​ទុក​ចិត្ត​»​៕