ភ្នំពេញ៖ អ្នកឧកញ៉ា​ ​គិត​ ​ម៉េង​ ​ប្រធាន​សភា​ពាណិជ្ជកម្ម​កម្ពុជា​បាន​លើកឡើង​ថា​ ​កិច្ចព្រមព្រៀង​ភាពជា​ដៃគូ​​សេដ្ឋកិច្ចគ្រប់ជ្រុងជ្រោយក្នុង​តំបន់ RC​E​P​ ​និង​ ​កិច្ចព្រមព្រៀង​ទ្វេភាគី​(​F​T​As​) ​ជាមួយ​ចិន​ ​និង​កូរ៉េ​ ​បាន​បង្កើត​ទី​ផ្សារ​ដ៏​ធំ​សម្រាប់​កម្ពុជា​ ​និង​ការ​វិនិយោគ​។​

អ្នកឧកញ៉ា ​បាន​លើកឡើង​បែប​នេះ​ នៅ​ក្នុង​វេទិកា​ធុរកិច្ច​កម្ពុជា​-​បារាំង​ ​ដោយ​បានកត់សម្គាល់ថា ​បណ្តាញ​ដ៏​ធំ​ទូលាយ​របស់គម្ពុជា គឺ​កិច្ចព្រមព្រៀង​ភាពជា​ដៃគូ​​សេដ្ឋកិច្ចគ្រប់ជ្រុងជ្រោយ​ក្នុង​តំបន់​ ​ដូចជា​បណ្តាប្រទេសអា​ស៊ាន​ ​ប្រទេសសមាជិក​ RC​E​P​ ​និង​កិច្ចព្រមព្រៀង​ទ្វេភាគី​ជាមួយ​ប្រទេស​ចិន​ ​និង​កូរ៉េ​ ​ក៏ដូចជា​កិច្ចព្រមព្រៀង​ភាពជា​ដៃគូ​សេដ្ឋកិច្ច​ទូលំទូលាយ​ជាមួយ​អេ​មី​រ៉ា​ត​អា​រ៉ាប់​រួម ​ធានាបាន​នូវ​លទ្ធភាព​ចូល​ទៅកាន់​ទី​ផ្សារ​អាស៊ី​សំខាន់​ៗ​ ​។​

អ្នកឧកញ៉ា​ គិត ម៉េង បាន​គូសបញ្ជាក់​ថា​ ​កម្ពុជា​ ជា​ប្រទេស​មួយ​ក្នុងចំណោម​ប្រទេសដទៃទៀត​ដែល​មាន​សេដ្ឋកិច្ច​លូតលាស់​លឿន​បំផុត​ក្នុង​តំបន់​ ​ហើយ​ត្រូវ​បាន​គេ​រំពឹង​ថា​នឹង​បន្ត​រីក​ចម្រើន​ក្នុងនាម​ជា​ប្រទេស​មួយ​ដែល​ចង់​សហការ​ជាមួយ​អ្នក​វិនិយោគ​ក្នុង​ដំណើរ​ឆ្ពោះទៅ​រក​វិបុលភាព​រួម​។​

ដោយសំដៅទៅដល់ធុរកិច្ចជន និងអ្នកវិនិយោគិនបារាំង អ្នកឧកញ៉ា​បាន​បន្ថែម​ថា​ ​គួបផ្សំ​ជាមួយនឹង​ការ​ប្តេជ្ញា​ចិត្ត​យ៉ាង​មុតមាំ​របស់​រដ្ឋាភិបាល​ចំពោះ​តម្លា​ភាព​ ​និង​ប្រសិទ្ធ​ភាព​ ​កម្ពុជា​ផ្តល់​នូវ​បរិយាកាស​ធុរកិច្ច​ដែល​មាន​ស្ថិរភាព​ ​និង​អាច​ព្យាករណ៍​បាន​សម្រាប់​ការ​វិនិយោគ​​។​

អ្នកឧកញ៉ា ​បាន​គូស​បញ្ជាក់​ថា​ ​កម្ពុជា​មិន​ត្រឹមតែ​ជា​មជ្ឈមណ្ឌល​ផលិតកម្ម ​ដែល​ផ្តោត​លើ​ការនាំចេញ​ជា​យុទ្ធសាស្ត្រ​ប៉ុណ្ណោះ​ទេ​ ​ប៉ុន្តែ​ក៏​ជា​ប្រទេស​ដែល​ប្តេជ្ញា​ចិត្ត​ចំពោះ​បរិយាកាស​អាជីវកម្ម​ ​គោល​នយោបាយ​ដែល​ងាយស្រួល​ក្នុង​ការ​វិនិយោគ​ ​និង​គោលការណ៍​វិនិយោគ​ ​អនុវត្ត​តាម​នីតិ​រដ្ឋ​ ​និង​ការ​អភិវឌ្ឍន៍​កម្លាំង​ពលកម្ម​ជំនាញ​។​

អ្នកឧកញ៉ា ​បាន​មានប្រសាសន៍​​ថា​ ៖

«យើង​ផ្តល់​តម្លៃ​ ​និង​ផ្តល់​អាទិភាព​ដល់​វិនិ​យោគិន ​ដែល​មានស្រាប់​របស់យើង​ ​ខណៈ​ដែល​ទាក់ទាញ​អ្នក​វិនិយោគ​ថ្មី​ ​ធានា​បាន​នូវ​ប្រព័ន្ធ​អេកូ​ឡូ​ស៊ី​អាជីវកម្ម​ដែល​រីក​ចម្រើន​ ​និង​គាំទ្រ​សម្រាប់​ទាំងអស់គ្នា​»។​

ជាមួយនឹង​ការ​ចូលជាធរមាន​នៃ​កិច្ចព្រមព្រៀង​ RC​E​P​ ​និង​ ​F​T​As​ ​កម្ពុជា​មើលឃើញ​ពី​ការ​កើន​ឡើង​គួរ​ឱ្យ​កត់​សម្គាល់​ក្នុង​ការ​វិនិយោគ​ពី​បរទេស​ ​ដែល​ជំរុញ​កំណើន​សេដ្ឋកិច្ច​ ​និង​ការ​ធ្វើ​ពិពិធ​កម្ម​របស់​ប្រទេស​។​

​​ក្នុងឆមាសទី១ ឆ្នាំ២០២៤ កម្ពុជាសម្រេច បានសន្ទុះនៃរំហូរវិនិយោគផ្ទាល់ពីបរទេសកាន់តែខ្លាំង ដោយក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគសរុបចំនួន១៩០ ដែលមានតម្លៃ ៣,២ពាន់លានដុល្លារអាមេរិក កើនឡើង៣ដង បើធៀបនឹងរយៈពេលដូចគ្នា ក្នុងឆ្នាំ២០២៣។

ដោយឡែកបើតាមប្រសាសន៍ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាក់ថា បារាំងនៅតែជាដៃគូពាណិជ្ជកម្ម និងវិនិយោគធំជាងគេមួយនៅកម្ពុជា ក្នុងចំណោមប្រទេសអឺរ៉ុប ពាណិជ្ជកម្មទ្វេភាគី កម្ពុជា-បារាំង បានកើនឡើងជាលំដាប់ ដែលមានទំហំទឹកប្រាក់ ៥១៥,២១ លានដុល្លារអាមេរិក ក្នុងឆ្នាំ២០២៣ និង ២០៦,៤១ លានដុល្លារអាមេរិក ក្នុងរយៈពេល៥ខែដំបូងនៃឆ្នាំ២០២៤។

ទន្ទឹមនេះ ក្រុមហ៊ុនបារាំងជាច្រើន ដោយរាប់ចាប់ពីសហគ្រាសពហុជាតិ (MNEs) រហូតដល់សហគ្រាសធុនតូច និងមធ្យម (SMEs) បានបង្កើតមូលដ្ឋាននៅកម្ពុជា ដូចជា Vinci, Total Energies, Accor, BRED Bank, និងសហគ្រាសធុនតូច និងមធ្យមជាច្រើនទៀត ដែលគ្រប់គ្រងដោយធុរជនបារាំង។

សម្តេចធិបតី ហ៊ុន ម៉ាណែត បានលើកឡើងដែរថា ការវិនិយោគពីបារាំង បានរួមចំណែកដល់ការបង្កើតការងារ ការផ្ទេរជំនាញ និងការអភិវឌ្ឍហេដ្ឋារចនាសម្ព័ន្ធ ដែលបង្កើតជាមូលដ្ឋានគ្រឹះសម្រាប់កំណើនសេដ្ឋកិច្ចប្រកបដោយចីរភាពនៅកម្ពុជា៕