បរទេស៖ យោងតាមប្រភពពី UNEP លើកឡើងថា​ សេដ្ឋកិច្ចបៃតងនឹងធ្វើឱ្យសុខុមាលភាពរបស់មនុស្សប្រសើរឡើង និងមានសមធម៌សង្គម ខណៈពេលដែលបានចូលរួមកាត់បន្ថយហានិភ័យបរិស្ថាន និងកង្វះអេកូឡូស៊ី។

UNEP បានកំណត់ថា “សេដ្ឋកិច្ចបៃតង ឬ Green Economy” គឺជាដំណើរការនៃសេដ្ឋកិច្ចដែលប្រើកាបូនទាប ធនធានប្រកបដោយប្រសិទ្ធភាព និងការរួមបញ្ចូលទៅក្នុងសង្គម។ នៅក្នុងសេដ្ឋកិច្ចបៃតងត្រូវមានការចូលរួម និងសហការណ៍ពីធាតុផ្សំជាច្រើនដូចជា ការវិនិយោគសាធារណៈ និងឯកជនទៅក្នុងសកម្មភាពសេដ្ឋកិច្ចធ្វើណាបានជួយជំរុញកំណើនការងារ និងប្រាក់ចំណូល, ហេដ្ឋារចនាសម្ព័ន្ធដែលកាត់បន្ថយការបញ្ចេញកាបូន និងការបំពុល, ការបង្កើនប្រសិទ្ធភាពថាមពល និងធនធាន, និងការទប់ស្កាត់ការបាត់បង់ជីវចម្រុះ និងប្រព័ន្ធអេកូឡូស៊ី។

ការវិនិយោគបៃតងទាំងនេះចាំបាច់ត្រូវគាំទ្រយ៉ាងទូលំទូលាយតាមរយៈការចំណាយសាធារណៈ កំណែទម្រង់គោលនយោបាយ ការផ្លាស់ប្តូរពន្ធដារ និងការរៀបចំបទប្បញ្ញត្តិ។ លើសពីនេះ UN Environment គាំទ្រលើការអភិវឌ្ឍន៍ដែលចាត់ទុកមូលធនធម្មជាតិជាទ្រព្យសម្បត្តិសេដ្ឋកិច្ចដ៏សំខាន់ និងជាប្រភពនៃផលប្រយោជន៍សាធារណៈ ជាពិសេសសម្រាប់ប្រជាជនក្រីក្រដែលជីវភាពរស់នៅពឹងផ្អែកលើធនធានធម្មជាតិ។ មិនត្រឹមតែប៉ុណ្ណោះ លក្ខណៈនៃសេដ្ឋកិច្ចបៃតងមិនជំនួសលើការអភិវឌ្ឍប្រកបដោយចីរភាពនោះទេ ប៉ុន្តែបង្កើតការយកចិត្តទុកដាក់ថ្មីមួយលើសេដ្ឋកិច្ច ការវិនិយោគ មូលធនហេដ្ឋារចនាសម្ព័ន្ធ ការងារ ជំនាញ សង្គម និងបរិស្ថានជាវិជ្ជមាននៅទូទាំងអាស៊ី និងប៉ាស៊ីហ្វិក។

ដើម្បីការអភិវឌ្ឍន៍ប្រកបដោយចីរភាព តួនាទីនៃសេដ្ឋកិច្ចបៃតងមានដូចជា៖ ការប្រើប្រាស់ និងផលិតកម្មប្រកបដោយនិរន្តរភាព និងការអភិរក្សធនធានប្រកបដោយប្រសិទ្ធភាព។ គោលបំណងនៃការប្រើប្រាស់ និងផលិតកម្មប្រកបដោយនិរន្តរភាព គឺដើម្បីកាត់បន្ថយការប្រើប្រាស់ធនធាន, កាត់បន្ថយកាកសំណល់ និងការបំភាយឧស្ម័ន។ ការអភិរក្សធនធានប្រកបដោយប្រសិទ្ធភាពទាក់ទងនឹងរបៀបដែលធនធានត្រូវបានប្រើប្រាស់ដើម្បីផ្តល់តម្លៃដល់សង្គម ដោយមានគោលដៅកាត់បន្ថយបរិមាណធនធាន, កាត់បន្ថយការបំភាយឧស្ម័ន និងកាកសំណល់នៅក្នុងឯកតានៃផលិតផល ឬសេវាកម្ម។ ទន្ទឹមនឹងនេះ សេដ្ឋកិច្ចបៃតង គឺជាយុទ្ធសាស្ត្រម៉ាក្រូសេដ្ឋកិច្ចសម្រាប់កំណើនសេដ្ឋកិច្ចរយៈពេលវែង ដែលផ្តោតលើការវិនិយោគ ការងារ និងជំនាញ។

ជាមួយគ្នានេះ ដើម្បីអាចសម្រេចបាននូវសេដ្ឋកិច្ចបៃតង បច្ចុប្បន្នមានវិធីសាស្រ្តសំខាន់ៗចំនួន ៣ ដូចជា ៖

១. ការតស៊ូមតិនៃម៉ាក្រូសេដ្ឋកិច្ចចំពោះកំណើនសេដ្ឋកិច្ចប្រកបដោយនិរន្តរភាព តាមរយៈវេទិកាតំបន់ អនុតំបន់ និងថ្នាក់ជាតិ។

២. ការបង្ហាញអំពីសេដ្ឋកិច្ចបៃតង ដោយផ្តោតលើការទទួលយកហិរញ្ញវត្ថុ បច្ចេកវិទ្យា និងការវិនិយោគបែបបៃតង។

៣. គាំទ្រដល់ប្រទេសនានាទាក់ទងនឹងការអភិវឌ្ឍន៍ និងការបញ្ជ្រាបគោលនយោបាយម៉ាក្រូសេដ្ឋកិច្ច ដើម្បីគាំទ្រដល់ការផ្លាស់ប្តូរទៅជាសេដ្ឋកិច្ចបៃតង។

មិនត្រឹមតែប៉ុណ្ណោះ សេដ្ឋកិច្ចបៃតងក៏ត្រូវការភាពជាដៃគូជាចាំបាច់ផងដែរ ដោយភាពជាដៃគូនៃពហុភាគីសម្រាប់ការលើកកម្ពស់សេដ្ឋកិច្ចបៃតងត្រូវបានគាំទ្រដើម្បីពន្លឿន បង្រួបបង្រួមការផ្លាស់ប្តូរប្រកបដោយនិរន្តរភាព ទាំងការប្រើប្រាស់ និងគំរូផលិតកម្ម។ បន្ថែមពីនេះ រដ្ឋាភិបាល អង្គការមិនស្វែងរកប្រាក់ចំណេញ និង UN Environment បានបង្កើនការចូលរួមរបស់ខ្លួនជាមួយវិស័យឯកជន ដែលជាតួអង្គសំខាន់ក្នុងការលើកកម្ពស់ប្រសិទ្ធភាពធនធាន និងសេដ្ឋកិច្ចបៃតងផងដែរ។

ស្របពេលនេះដែរ UN Environment កំពុងគាំទ្រម៉ុងហ្គោលីក្នុងការអនុវត្តគោលនយោបាយជាតិនៃការអភិវឌ្ឍន៍បៃតង ការធ្វើសមាហរណកម្មសេដ្ឋកិច្ចបៃតងទៅក្នុងផែនការអភិវឌ្ឍន៍កម្រិតមូលដ្ឋាន សូចនាករគោលដៅអភិវឌ្ឍន៍ប្រកបដោយចីរភាព និងការធ្វើឱ្យបៃតងនៃវិស័យសំខាន់ៗ៕