សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងឆមាសទី១នៃឆ្នាំ២០២៤ កម្ពុជាបាននាំចេញកសិផលទៅក្រៅប្រទេសបានជាង ៦លានតោន កើនឡើងជិត ៦០ភាគរយ ធៀបនឹងឆមាសទី១ ក្នុងឆ្នាំ២០២៣។ នេះបើតាមរបាយការណ៍របស់ក្រសួងកសិកម្មដែលត្រូវបានកត់សម្គាល់ និងបង្ហោះដោយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជានៅលើបណ្តាញសង្គមផ្លូវការរបស់សម្តេច។
សម្តេចធិបតី ហ៊ុន ម៉ាណែត បានកត់សម្គាលថា ៖ «តួលេខនេះគឺជាកំណើនមិនធ្លាប់មានក្នុងរយៈពេល ៥ឆ្នាំចុងក្រោយ ។ កសិផលប្រមាណ៦លានតោន បាននាំចេញទៅកាន់ទីផ្សារ គោលដៅចំនួន៧៧ប្រទេសទូទាំងពិភពលោក។ របាយការណ៍បានបង្ហាញថា ៩៤% នៃកសិផលកម្ពុជា គឺឆ្ពោះទៅកាន់ទីផ្សារសំខាន់ៗដូចជា ប្រទេសចិន (ចេក អង្ករ ដំឡូងមី ស្វាយ និងមៀន) ប្រទេសរៀតណាម (ស្រូវ ចន្ទី ដំឡូងមី ស្វាយស្រស់) និងប្រទេសថៃ (ដំឡូងមី ស្វាយស្រស់ ម្ទេស កន្ទក់)»។
យោងតាមរបាយការណ៍របស់អគ្គនាយកដ្ឋានកសិកម្មបង្ហាញថា ប្រទេសកម្ពុជាបាននាំចេញកសិផលប្រមាណ ៦,១ លានតោន ក្នុងឆមាសទីមួយនៃឆ្នាំ២០២៤ កើនឡើងជិត៦០ ភាគរយធៀបនឹងរយៈពេលដូចគ្នាក្នុងឆ្នាំ២០២៣។ ការនាំចេញកសិផលមិនមែនអង្ករមានតម្លៃ ២,១៦៥ លានដុល្លារអាមេរិក ខណៈដែលការនាំចេញអង្ករមានទឹកប្រាក់ ២៨៧ លានដុល្លារ និងស្រូវមានទឹកប្រាក់ ៤០៥ លានដុល្លារអាមេរិក។
របាយការណ៍ដដែលបានឱ្យដឹងថា ប្រទេសចិន វៀតណាម ថៃ និងកូរ៉េជា អ្នកនាំចូលទំនិញកសិកម្មរបស់កម្ពុជា ហើយមុខទំនិញកសិកម្មសំខាន់ៗសម្រាប់នាំចេញរួមមាន អង្ករ កៅស៊ូ ដំឡូងមី ស្វាយ ចេកស្រស់ ម្រេច គ្រាប់ស្វាយចន្ទី វែង ពោត ដូងប្រេង ជាដើម។
ដោយឡែក ឯកឧត្តម វ៉ាង វិនពីន (Wang Wenbin) ឯកអគ្គរដ្ឋទូតនៃសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា បានវាយតម្លៃខ្ពស់ចំពោះផលិតផលកសិកម្មរបស់កម្ពុជា ជាពិសេសគ្រាប់ស្វាយចន្ទី បន្ទាប់ពីរូបលោកបានចូលផ្សារទិញទំនិញ និងផលិតផលកសិផលខ្មែរ និងភ្លក្សរសជាតិដោយផ្ទាល់កាលពីពេលកន្លងទៅថ្មីៗនេះ។
នៅលើទំព័រហ្វេសប៊ុកផ្លូវការរបស់ឯកឧត្តមកាលពីពេលថ្មីៗនេះ លោក Wang បាននិយាយថា ៖ «វាជាថ្ងៃចុងសប្តាហ៍ ដល់ម៉ោងដើរទិញឥវ៉ាន់។ ក្នុងនាមជាឯកអគ្គរដ្ឋទូត មានអ្វីច្រើនជាងការទិញទំនិញ វាគឺជាបទពិសោធដ៏ជក់ចិត្តលើជីវិតក្នុងតំបន់»។ នៅទីនេះ អ្នកអាចបង់ប្រាក់តាមរយៈ WeChat ងាយស្រួលណាស់ ហើយសុមអំពាវនាវឱ្យអ្នកផ្សេងទៀតសាកល្បងគ្រាប់ស្វាយចន្ទីខ្មែរ ដែលមានរសជាតិឆ្ងាញ់ណាស់»។
សូមជម្រាបថា រាជរដ្ឋាភិបាលបានប្រកាសអនុវត្តគោលនយោបាយយុទ្ធសាស្ត្រថ្មីសម្រាប់ការអភិវឌ្ឍវិស័យកសិកម្មក្នុងគោលបំណងប្តូរពីគ្រួសារមកធ្វើកសិកម្មបែបពាណិជ្ជកម្ម និងលើកកម្ពស់ចំណូលកសិករតាមរយៈផលិតផលតម្លៃបន្ថែម។ ជាមួយគ្នានេះដែរ កសិផលកម្ពុជា ដែលកំពុងមានកំណើនទីផ្សារក្រៅពីស្រូវ ស្វាយចន្ទី និងដំឡូងមី រួមមាន ស្វាយស្រស់ ដំណាប់ស្វាយ ទុរេន គ្រាប់ពោត មៀនស្រស់ ម្រេច និងម្ទេសស្រស់។
ទន្ទឹមនឹងនេះ គ្រាប់ស្វាយចន្ទីឆៅមានទំហំនាំចេញប្រមាណជាង ៨០០លានដុល្លារ ប្រហែល ១ភាគ៣ នៃតម្លៃនាំចេញកសិផលសរុបរបស់កម្ពុជា ។ សម្រាប់ប្រភេទកសិផលមាន កំណើនខ្ពស់ជាងគេទី១ ក្នុងចំណោមកសិផលសំខាន់ដទៃទៀត គឺប្រភេទដំឡូងមី ដែលមានបរិមាណជាង ២,៥០លានតោន ដែលទទួលបានទឹកប្រាក់ចំនួនជាង ៤៥០ លានដុល្លារអាមេរិក ៕
Account
Security
Favourite Content