សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ខេត្តបាត់ដំបង៖ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងស្ថានទូតឥណ្ឌាប្រចាំកម្ពុជា កាលពីថ្ងៃចុងសប្ដាហ៍កន្លងទៅនេះ បានសម្ពោធដាក់ឱ្យប្រើប្រាស់ បណ្ណាល័យវិទ្យាសាស្ត្រ នៅក្នុងវិទ្យាល័យ ហ៊ុន សែន ត្រែង ក្នុងស្រុករតនមណ្ឌល ខេត្តបាត់ដំបង ដើម្បីរួមចំណែកដល់ចក្ខុវិស័យនៃការអភិវឌ្ឍន៍ដល់ផ្អែកបច្ចេកវិទ្យា។ បណ្ណាល័យវិទ្យាសាស្ត្រនេះត្រូវបានកសាងឡើងក្រោមជំនួយឥតសំណងរបស់រដ្ឋាភិបាលនៃសាធារណរដ្ឋឥណ្ឌា តាមរយៈគម្រោងឆ្លើយតបលឿន (Quick Impact Project) នៃក្របខ័ណ្ឌកិច្ចសហប្រតិបត្តិការមេគង្គ-ហ្កានហ្កា ដើម្បីជំរុញការអប់រំផ្នែកវិទ្យាសាស្ត្រ បច្ចេកវិទ្យា វិស្វកម្ម និងគណិតវិទ្យា (ស្ទែម) សម្រាប់សិស្សានុសិស្សនៅក្នុងតំបន់ដាច់ស្រយាល។
ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានមានប្រសាសន៍សង្កត់ធ្ងន់លើសារសំខាន់នៃបណ្ណាល័យវិទ្យាសាស្ត្រនេះ ក្នុងការរួមចំណែកកសាងមូលធនមនុស្សនៅក្នុងមូលដ្ឋាន។
ឯកឧត្តមបានលើកឡើងថា៖
«មូលធនមនុស្ស គឺជាគន្លឹះសម្រាប់លើកកម្ពស់សមត្ថភាពប្រកួតប្រជែងរបស់កម្ពុជា ក្នុងយុគសម័យឌីជីថល។ យើងខ្ញុំសង្ឃឹមយ៉ាងមុតមាំថា បណ្ណាល័យវិទ្យាសាស្ត្រនេះ នឹងក្លាយជាផ្ទះ ទីពីរដ៏កក់ក្តៅសម្រាប់សិស្សានុសិស្សដែលស្រឡាញ់ការសិក្សា និងមានស្មារតីចង់ចេះចង់ដឹង»។
ឯកឧត្តមបានលើកទឹកចិត្តដល់សិស្សានុសិស្សទាំងអស់ឱ្យខិតខំក្រេបជញ្ជក់ចំណេះដឹងពីធនធានទាំងនេះ ដើម្បីបណ្តុះបណ្តាលខ្លួនឱ្យក្លាយជាគ្រាប់ពេជ្រជំនាន់ថ្មីដ៏មានតម្លៃសម្រាប់អនាគតកម្ពុជា។
បណ្ណាល័យវិទ្យាសាស្ត្រនេះត្រូវបានបំពាក់ដោយបរិក្ខារ រួមមានប្រព័ន្ធម៉ាស៊ីនត្រជាក់ដើរដោយថាមពលព្រះអាទិត្យ ឧបរកណ៍វិទ្យាសាស្ត្រ និងប្រព័ន្ធចម្រោះទឹកស្អាត ដែលឧបត្ថម្ភដោយរដ្ឋាករទឹកស្វយ័តក្រុងភ្នំពេញ។
ឯកឧត្តម Shri Vanlalvawna Bawitlung ឯកអគ្គរដ្ឋទូតឥណ្ឌាប្រចាំកម្ពុជា បានលើកឡើងថា គម្រោងនេះគឺជាសក្ខីភាពដែលឆ្លុះបញ្ចាំងពីជំនឿចិត្តរួមគ្នារវាងប្រទេសទាំងពីរ ដែលចាត់ទុកការអប់រំផ្នែកវិទ្យាសាស្ត្រ ជាកត្តាចាំបាច់មិនអាចខ្វះបានសម្រាប់ការអភិវឌ្ឍប្រកបដោយចីរភាព។ បណ្ណាល័យនេះនឹងជំរុញឱ្យអ្នកសិក្សាវ័យក្មេង មិនត្រឹមតែចំណាយពេលអានប៉ុណ្ណោះទេ ប៉ុន្តែថែមទាំងអាចអនុវត្តការពិសោធន៍ ចេះចោទសួរ និងមានភាពច្នៃប្រឌិតខ្ពស់។
ទន្ទឹមនឹងការសម្ពោធសមិទ្ធផលថ្មីនេះ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងស្ថានទូតឥណ្ឌាប្រចាំកម្ពុជា ក៏បានចុះអនុស្សរណៈនៃការយោគយល់ ដើម្បីសាងសង់បណ្ណាល័យវិទ្យាសាស្ត្រទីពីរក្នុងស្រុកសង្កែ។ ក្នុងក្របខ័ណ្ឌនៃគោលនយោបាយ “Act East” របស់ឥណ្ឌា កម្ពុជាបានទទួលការគាំទ្រលើគម្រោង QIP សរុបចំនួន ៦៦ គម្រោង រួមទាំងគំនិតផ្តួចផ្តើមសាងសង់បណ្ណាល័យវិទ្យាសាស្ត្រទាំងពីរ ដែលក្នុងនោះគម្រោង ៤៧ ត្រូវបានបញ្ចប់។
តាមការរំពឹងទុក គំនិតផ្ដួចផ្ដើមនេះនឹងផ្តល់អត្ថប្រយោជន៍ដោយផ្ទាល់ដល់សិស្សានុសិស្សប្រមាណ ១.៥០០ នាក់ព្រមទាំងរួមចំណែកគាំទ្រចក្ខុវិស័យកម្ពុជាឆ្នាំ២០៥០ ដែលបានកំណត់ យកវិស័យស្ទែមជាកាតាលីករគន្លឹះ ក្នុងការជំរុញកំណើនសេដ្ឋកិច្ចក្នុងបរិបទនៃបដិវត្តន៍ឧស្សាហកម្ម ៤.០៕
Account
Security
Favourite Content