សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពព័ត៌មានពីរ៉យទ័រ បានលើកឡើងថា សហភាពអឺរ៉ុបនឹងអនុញ្ញាតឱ្យរដ្ឋសមាជិកដែលឈរនៅកណ្តាលជម្លោះរុស្ស៊ី-អ៊ុយក្រែនអាចដកខ្លួនចេញពីផែនការរបស់ប្លុកអំពីការប្រើប្រាស់ប្រាក់ចំណូលដែលបានមកពីការបង្កកទុនបំរុងរបស់ធនាគារកណ្តាលរុស្ស៊ី ដើម្បីទិញអាវុធសម្រាប់ជួយអ៊ុយក្រែន។
កាលពីថ្ងៃដើមសប្ដាហ៍កន្លងទៅនេះ Politico បានដកស្រង់សម្តីអ្នកការទូតសហភាពអឺរ៉ុបម្នាក់ថា សំណើនេះកើតឡើងនៅពេលដែលប្លុកស្វែងរកមធ្យោបាយក្នុងការផ្តល់មូលនិធិសម្រាប់ទីក្រុងគីវ។ កាលពីដើមឆ្នាំនេះ ទីក្រុងប្រ៊ូសែលបានស្នើឱ្យប្រើប្រាស់ការប្រាក់ដែលរកបានពីទ្រព្យសម្បត្តិបង្កក ដើម្បីទិញអាវុធសម្រាប់ជួយអ៊ុយក្រែនជាជាងការប្រើប្រាស់មូលនិធិសម្រាប់ការកសាងប្រទេសឡើងវិញ។ យ៉ាងណាមិញ វិធានការដែលបានស្នើឡើងបានប្រឈមមុខនឹងការតស៊ូមតិពីរដ្ឋជាសមាជិកសហភាពអឺរ៉ុបមួយចំនួនដែលមិនមែនជាផ្នែករបស់ណាតូរួមមាន អូទ្រីស អៀរឡង់ ម៉ាល់តា និងស៊ីប។ ពួកគេបានទាមទារមិនឲ្យមានការទិញអាវុធសម្រាប់ជួយទីក្រុងគីវ ហើយអ្នកមិនពេញចិត្តចំពោះផែនការសហភាពអឺរ៉ុបផ្សេងទៀតរួមមានហុងគ្រី និងស្លូវ៉ាគី។ ដូច្នោះហើយ នៅក្រោមការប៉ុនប៉ងចុងក្រោយបំផុតរបស់សហភាពអឺរ៉ុបក្នុងការឈ្នះលើរដ្ឋជាសមាជិក ប្រទេសដែលប្រឆាំងនឹងផែនការនេះអាចដកខ្លួនពីការផ្តល់ជំនួយមនុស្សធម៌ដល់អ៊ុយក្រែន។
បច្ចុប្បន្ននេះ ទីក្រុងប្រ៊ូសែលកំពុងបន្តឆ្ពោះទៅមុខជាមួយនឹងគំនិតពីរផ្សេងគ្នារួមមាន ទីមួយ គឺប្រាក់ចំណេញនឹងត្រូវបានប្រើប្រាស់សម្រាប់ជំនួយមិនមែនយោធា និងទីពីរមានគោលបំណងទិញអាវុធ ហើយប្រទេសអព្យាក្រឹតក្នុងជម្លោះអាចដកខ្លួនចេញបាន។
ចាប់តាំងពីមានជម្លោះរុស្ស៊ី-អ៊ុយក្រែនមក បណ្តាប្រទេសលោកខាងលិចបានបង្កកប្រាក់របស់រុស្ស៊ីប្រហែល ៣០០ ពាន់លានដុល្លារ។ ការិយាល័យបោសសម្អាត Euroclear ដែលមានមូលដ្ឋាននៅទីក្រុងប្រ៊ូសែលបានកាន់កាប់មូលនិធិប្រហែល ១៩១ ពាន់លានអឺរ៉ូ (២០៥ ពាន់លានដុល្លារ) ហើយបានទទួលការប្រាក់ជិត ៤,៤ ពាន់លានអឺរ៉ូក្នុងរយៈពេលមួយឆ្នាំ។
កាលពីខែមីនា លោក Josep Borrell អ្នកតំណាងជាន់ខ្ពស់ទទួលបន្ទុកកិច្ចការបរទេស និងគោលនយោបាយសន្តិសុខរបស់សហភាពអឺរ៉ុប បានស្នើឱ្យយក ៩០ ភាគរយនៃប្រាក់ចំណូលពីទ្រព្យសម្បត្តិរបស់រុស្ស៊ីដែលបានបង្កកនៅក្នុងប្លុក ដោយផ្ទេរពួកវាទៅមូលនិធិដែលគ្រប់គ្រងដោយសហភាពអឺរ៉ុបសម្រាប់ផ្តល់ហិរញ្ញប្បទានអាវុធជួយអ៊ុយក្រែន។
សហភាពអឺរ៉ុបមានបំណងផ្តល់ឱ្យទីក្រុងកៀវពី ២ ទៅ ៣ ពាន់លានអឺរ៉ូពីការប្រាក់ដែលបង្កើតពីការបង្កកទ្រព្យសម្បត្តិនៅឆ្នាំនេះ។ ប្រសិនបើទីក្រុងប្រ៊ូសែលអាចធានាបាននូវការយល់ព្រមពីរដ្ឋជាសមាជិកទាំងអស់ នោះប្រាក់ជំនួយដំបូងអាចនឹងត្រូវបានបញ្ចេញនៅដើមខែកក្កដា ។ អ្នកការទូតសហភាពអឺរ៉ុបម្នាក់លើកឡើងថា យ៉ាងណាមិញ អាល្លឺម៉ង់ បារាំង និងអ៊ីតាលីនឹងមិនសប្បាយចិត្តចំពោះការដកខ្លួនចេញរបស់សមាជិកពីផែនការនោះទេ ដោយសារវាអាចបង្កគ្រោះថ្នាក់ផ្នែកហិរញ្ញវត្ថុ និងផ្លូវច្បាប់។ ទន្ទឹមនឹងនេះ រុស្ស៊ីបាននិយាយថា រាល់សកម្មភាពដែលធ្វើឡើងប៉ះពាល់នឹងទ្រព្យសម្បត្តិរបស់ខ្លួននឹងស្មើនឹងការលួច ដោយសង្កត់ធ្ងន់ថា ការរឹបអូសយកមូលនិធិ ឬសកម្មភាពស្រដៀងគ្នាណាមួយនឹងបំពានច្បាប់អន្តរជាតិ ព្រមទាំងធ្វើឱ្យខូចរូបិយប័ណ្ណលោកខាងលិច ប្រព័ន្ធហិរញ្ញវត្ថុសកល និងសេដ្ឋកិច្ចពិភពលោកថែមទៀតផង៕
Account
Security
Favourite Content