សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្រុមអ្នកជំនាញសេដ្ឋកិច្ចបានជំរុញឱ្យពលរដ្ឋកម្ពុជាគួរចេះប្រុងប្រយ័ត្នខ្ពស់ចំពោះវិបត្តិសេដ្ឋកិច្ចសកលក្នុងឆ្នាំ២០២៦ និងឆ្នាំ២០២៧ ខាងមុខ ខណៈដែលសញ្ញាណនៃភាពមិនប្រាកដប្រជានៅតែបន្ត។
យោងរបាយការណ៍ទស្សនវិស័យសេដ្ឋកិច្ចសកលចុងក្រោយរបស់ធនាគារពិភពលោក ស្តីពី កំណើនសកល ចេញផ្សាយក្នុងខែមករា ឆ្នាំ២០២៦ បានព្យាករណ៍ថា កំណើនសេដ្ឋកិច្ចសកលនឹងធ្លាក់ចុះមកនៅត្រឹម ២.៦% នៅឆ្នាំ២០២៦ មុននឹងងើបឡើងដល់ ២.៧% ក្នុងឆ្នាំ២០២៧។ ជាមួយគ្នានេះ ប្រសិនបើការព្យាករទាំងនេះនៅរក្សាបានដដែល ទសវត្សរ៍ឆ្នាំ២០២០ នឹងត្រូវបានកត់ត្រាទុកថា ជាទសវត្សរ៍ដែលពិភពលោកមានកំណើនសេដ្ឋកិច្ចខ្សោយបំផុត គិតចាប់តាំងពីទសវត្សរ៍ឆ្នាំ១៩៦០។
ស្រដៀងគ្នានេះ របាយការណ៍ថវិកាសង្ខេបឆ្នាំ២០២៦ ក្រសួងសេដ្ឋកិច្ច និងហិរញ្ញវត្ថុ កាលពីពេលថ្មីៗនេះបានបង្ហាញថា ទោះបីជាសេដ្ឋកិច្ចកម្ពុជាមានកំណើនក្នុងរង្វង់ ៥ % ក៏ដោយ ប៉ុន្តែកម្ពុជានៅមានភាពប្រឈមចំពោះសេដ្ឋកិច្ចសកលនៅឡើយ។ ភាពប្រឈមទាំងនោះរួមមាន ការថមថយនៃសេដ្ឋកិច្ចសកល ភាពតានតឹងនៃភូមិសាស្រ្តនយោបាយ ដោយសារសង្គ្រាម កាបែកខ្ញែកភូមិសាស្រ្តសេដ្ឋកិច្ច ដែលបន្ទុចបង្អាក់ដល់ច្រវាក់ផ្គត់ផ្គង់សកល និងមានសម្ពាធបំណុលសាធារណៈ រួមជាមួយនឹងផលប៉ះពាល់ពីការប្រែប្រួលអាកាសធាតុ។
លោកបណ្ឌិត ឆេង គឹមឡុង អ្នកជំនាញផ្នែកសេដ្ឋកិច្ច និងជាប្រធានវិទ្យាស្ថានចក្ខុអាស៊ី បានមានប្រសាសន៍ថា ក្នុងអំឡុងពេលដែលសេដ្ឋកិច្ចពិភពលោកកំពុងតែត្រដាបត្រដួស ពលរដ្ឋកម្ពុជាត្រូវចេះចាយវាយដោយការសន្សំសំចៃ កាត់បន្ថយចំណាយមិនចាំបាច់ ពិសេសត្រូវពង្រីកអាជីវកម្ម និងចង្វាក់ផលិតកម្មរបស់ខ្លួនឱ្យកាន់តែរឹងមាំ។
លោកបញ្ជាក់ថា ៖
«កាត់បន្ថយចំណាយដែលមិនចាំបាច់ ដើម្បីធ្វើយ៉ាងណាឱ្យមានតុល្យភាពរវាងចំណូល និងចំណាយ ដែលគេហៅថាការគ្រប់គ្រងហិរញ្ញវត្ថុផ្ទាល់ខ្លួនខ្នាតគ្រួសារ ដើម្បីកុំឱ្យជាប់បំណុលគេច្រើនពេក ក្នុងពេលដែលសេដ្ឋកិច្ចពិភពលោកកំពុងត្រដាបត្រដួស» ។
លោក សេក ភារម្យ ប្រធានស្ថាប័នស្រាវជ្រាវ និងអភិវឌ្ឍន៍នៃក្រុមហ៊ុន BFX Capita ក៏បានជំរុញឱ្យពលរដ្ឋកម្ពុជាត្រូវចេះរក្សាប្រាក់បម្រុងទុកក្នុងគ្រួសារឱ្យបានច្រើន ដោយមិនត្រូវចាយខ្ជះខ្ជាយ ឬទិញសម្ភារៈនិយមដោយការបង់រំលស់ជាដើម។
លោកសង្កត់ធ្ងន់ថា ៖
«ដូច្នេះបងប្អូនដែលមានប្រាក់ចំណូលទាប គួរតែចាត់ចែងការចាយវាយប្រាក់កាសឱ្យបានត្រឹមត្រូវ ដូចជា ការចំណាយអាទិភាពលើចំណីអាហារ ផ្ទះសម្បែង សុខនិងភាពជាដើម»។
លោកបញ្ជាក់ថា សម្រាប់ប្រទេសដែលកំពុងអភិវឌ្ឍន៍ ត្រូវមានភាពបត់បែនក្នុងដំណើរការសេដ្ឋកិច្ចរបស់ខ្លួន ចៀសវាងពឹងផ្អែកលើប្រតិបត្តិការសេដ្ឋកិច្ចដដែលៗ ដែលអាចជួបបញ្ហាដោយប្រការណាមួយជាយថាហេតុ៕
Account
Security
Favourite Content