ភ្នំពេញ៖ ចំនួនភ្ញៀវទេសចរដែលបានមកដើរកម្សាន្តតាមរមណីយដ្ឋាននានាក្នុងខេត្តសៀមរាបនាឱកាសពិធីបុណ្យចូលឆ្នាំចិន-វៀតណាម ពីថ្ងៃទី៩-១១ ខែកុម្ភៈ ឆ្នាំ២០២៤ មានចំនួនប្រមាណ ១១៧ ៦៧៧ នាក់ កើន ១១.៥៦% បើប្រៀបធៀបនឹងឆ្នាំ២០២៣ ដែលមានទេសចរ ១០៥ ៤៨១នាក់។នេះបើយោងតាមមន្ទីរទេសចរណ៍ខេត្តសៀមរាប។

ក្នុងចំណោមទេសចរជាង១១ម៉ឺននាក់ ទេសចរជាតិ មានចំនួនប្រមាណ ៩៩ ៦០០នាក់ កើន ១០.៦៧% បើប្រៀបធៀបនឹងរយៈពេលដូចគ្នាឆ្នាំ២០២៣ មានចំនួនប្រមាណ ៩០ ០០០នាក់ ។ភ្ញៀវទេសចរអន្តរជាតិ មានចំនួន ១៨ ០៧៧នាក់ កើនឡើងចំនួន ១៦.៧៧% បើប្រៀបធៀបនឹងរយៈពេលដូចគ្នាឆ្នាំ២០២៣ មានចំនួន ១៥ ៤៨១នាក់។

ដោយឡែកក្នុងរយៈពេល ៣ថ្ងៃនៃពិធីបុណ្យចូលឆ្នាំប្រពៃណីជនជាតិចិន-វៀតណាម គិតចាប់ពីថ្ងៃទី៩ រហូតដល់ថ្ងៃទី១១ ខែកុម្ភៈ ឆ្នាំ២០២៤ ខេត្តកំពតទទួលបានភ្ញៀវទេសចរជាតិ និងអន្តរជាតិប្រមាណ ៦៤ ៥២៨នាក់ កើនឡើង ០.៤១% ធៀបនឹងរយៈពេលដូចគ្នាឆ្នាំ២០២៣ ដែលក្នុងនោះភ្ញៀវទេសចរជាតិចំនួន ៦២ ៩០៥នាក់ និងភ្ញៀវទេសចរណ៍អន្តរជាតិចំនួន ១ ៦២៣នាក់។ នេះបើតាមការឱ្យដឹងពីសំណាក់លោក សយ ស៊ីណុល ប្រធានមន្ទីរទេសចរណ៍ខេត្តកំពត។

ខេត្ត​កែប រយៈពេល ៣ថ្ងៃ នៃពិធីបុណ្យចូលឆ្នាំចិនទទួល​បាន​ភ្ញៀវ​ទេសចរ​ជាតិនិង​ភ្ញៀវ​ទេសចរ​អន្តរជាតិប្រមាណ​ ៧៣,១៤៥នាក់។ កើនឡើង ៨.៣៦% ធៀបនឹងរយៈពេលដូចគ្នា ក្នុងឆ្នាំ២០២៣ មានចំនួនតែ ៦៧,០៣០នាក់។

លោក តាំង សុចិត្រ​គ្រឹ​ស្នា ប្រធាន​មន្ទីរ​ទេសចរណ៍​ខេត្ត​ព្រះសីហនុ បាន​ឲ្យ​ដឹងថា ខេត្ត​ព្រះសីហនុ ទទួលបាន​ភ្ញៀវទេសចរ​ប្រមាណ ៨៨,០០០​នាក់ កើនឡើង ៦.៥០​ភាគរយ ធៀប​នឹង​ឆ្នាំ​២០១៧ ។ទេសចរជាតិមានចំនួន ២៨២,៣៩៦នាក់និងទេសចរបរទេស ១១,៩០៥នាក់។

ដោយឡែកខេត្តកោះកុង ក៏ទាក់ទាញបានភ្ញៀវទេសចរជាតិ និងអន្តរជាតិទៅកម្សាន្តយ៉ាងកុះករដែរ នាឱកាសបុណ្យចូលឆ្នាំចិន-វៀតណាមនេះ គឺប្រមាណ ៥៤,០០០នាក់។ នេះបើតាម លោក ប៊ុន បៀវ ប្រធានមន្ទីរទេសចរណ៍ខេត្តកោះកុង ។

ចំណែកខេត្តផ្សេងៗទៀត គឺខេត្តបាត់ដំបង មានទេសចរជាតិ៖ ៨៨,៥៧២នាក់ ទេសចរបរទេស៖ ៨៧៤នាក់។ប៉ៃលិនទេសចរជាតិ៖ ៧៩,៤២៥នាក់និងទេសចរបរទេស៖ ២៦៨នាក់។ចំណែកខេត្តក្រចេះ ភ្ញៀវទេសចរដែលទៅកម្សាន្តនៅរមណីយដ្ឋានទេសចរណ៍នានា មានចំនួនប្រមាណ ៣,៩ពាន់នាក់ហើយនៅខេត្តពោធិ៍សាត់មានចំនួនប្រមាណ៩ពាន់នាក់។ខេត្តស្ទឹងត្រែង មានទេសចរចំនួនប្រមាណ៩ពាន់នាក់។ ខេត្តរតនគិរី មានចំនួនប្រមាណ ៨,៣ ពាន់នាក់។ កំពង់ស្ពឺ មានចំនួនប្រមាណ ២,៦ ម៉ឺននាក់។

គួរជម្រាបថា៖រយៈពេល៣ថ្ងៃនៃឱកាសពិធីបុណ្យចូលឆ្នាំចិន ចាប់ពីថ្ងៃទី៩-១១ ខែកុម្ភៈ ឆ្នាំ២០២៤ ភ្ញៀវទេសចរដែលបានចេញដើរទស្សនាកម្សាន្តនៅទូទាំងប្រទេសមានចំនួនសរុប ១,០៥១,៤៧២នាក់ ក្នុងនោះទេសចរជាតិ ៩៩៣,៩៩១នាក់ ទេសចរបរទេស ៥៧,៤៨១នាក់។ នេះបើតាមរបាយការណ៍របស់ក្រសួងទេសចរណ៍៕