ភ្នំពេញ៖ វិស័យនាំចេញរបស់ប្រទេសកម្ពុជាត្រូវបានកត់ត្រានូវកំណើនមួយដ៏រឹងមាំ និងមានស្ថិរភាពក្នុងរយៈពេល ៥ឆ្នាំកន្លងមកនេះ ដោយបានឆ្លុះបញ្ចាំងពីការពង្រីកមូលដ្ឋានឧស្សាហកម្ម ការកែលម្អហេដ្ឋារចនាសម្ព័ន្ធ និងការធ្វើសមាហរណកម្មទៅក្នុងខ្សែសង្វាក់ផ្គត់ផ្គង់ក្នុងតំបន់ និងពិភពលោក។ យ៉ាងណាក៏ដោយ ទោះបីជាស្ថិតក្នុងភាពមិនប្រាកដប្រជាជាសកលក្នុងអំឡុងពេលនេះក៏ដោយ តម្លៃនាំចេញសរុបរបស់ប្រទេសកម្ពុជាបានកើនឡើងគួរឱ្យកត់សម្គាល់ ដោយបានឈានដល់ជាង ៣១ពាន់លាន ដុល្លារអាម៉េរិកនៅឆ្នាំ២០២៥ ខណៈដែលឆ្នាំ២០២១ សម្រេចបានត្រឹមជាង១៩ពាន់លានដុល្លារតែប៉ុណ្ណោះ។

ស្ថិតក្នុងស្ថានការដ៏វិជ្ជមានបែបនេះ សម្រាប់តែក្រុមហ៊ុន រ៉ូយ៉ាល់ គ្រុប ភ្នំពេញ អេសអ៊ីហ្សិត ម.ក ឬ Royal Group Phnom Penh SEZ Plc. (PPSP) ដែលជាអ្នកអភិវឌ្ឍតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ (RGPPSEZ) បានរួមចំណែកយ៉ាងសំខាន់ដល់លទ្ធផលនៃការនាំចេញរបស់ប្រទេសកម្ពុជា។

យោងតាមសេចក្តីប្រកាសព័ត៌មានរបស់តំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ បានបង្ហាញថា ការនាំចេញដែលបង្កើតឡើងដោយក្រុមហ៊ុនកម្មន្តសាលចំនួន ៩១ មកពី ១៥ ប្រទេស និងធ្វើប្រតិបត្តិការនៅក្នុង RGPPSEZ បានកើនឡើងយ៉ាងឆាប់រហ័ស ពោលគឺកើនឡើងជាង ៣ដង រវាងឆ្នាំ២០២១ ដល់ឆ្នាំ២០២៥ ខណៈមុខទំនិញ និងផលិតផលនៃក្រុមហ៊ុនទាំងនេះបានគ្របដណ្តប់លើវិស័យសំខាន់ៗ រួមមាន គ្រឿងអេឡិចត្រូនិក គ្រឿងបង្គុំរថយន្ត សម្លៀកបំពាក់ ស្បែកជើង និងឧស្សាហកម្មធន់ស្រាលផ្សេងៗទៀត។

ប្រភពដដែលនេះ បានឱ្យដឹងថា៖ សម្រាប់តែឆ្នាំ២០២៥ ការនាំចេញពី RGPPSEZ បានឈានដល់ ២,១៤ ពាន់លានដុល្លារអាម៉េរិក តំណាងឱ្យ ៧% នៃតម្លៃនាំចេញសរុបរបស់ប្រទេសកម្ពុជា ដែលរក្សាបានកិត្តិនាមជាមជ្ឈមណ្ឌលឧស្សាហកម្ម និងនាំចេញឈានមុខគេមួយក្នុងប្រទេសកម្ពុជា។ ក្រៅពីការចូលរួមចំណែកផ្នែកសេដ្ឋកិច្ចតាមរយៈពាណិជ្ជកម្ម តំបន់សេដ្ឋកិច្ចពិសេស RGPPSEZ ក៏នៅតែបន្តដើរតួនាទី យ៉ាងសំខាន់ក្នុងការបង្កើតឱកាសការងារផងដែរ ពោលគឺគិតត្រឹមខែធ្នូ ឆ្នាំ២០២៥ តំបន់សេដ្ឋកិច្ចពិសេសមួយនេះបានទទួលកម្មករជាង ៥៥ ០០០នាក់ បម្រើការក្នុងវិស័យកម្មន្តសាលនានា គាំទ្រដល់ប្រាក់ចំណូលគ្រួសារ ការអភិវឌ្ឍជំនាញ និងកំណើនសេដ្ឋកិច្ចប្រកបដោយបរិយាប័ន្ន។

អ្នកឧកញ៉ា គិត ម៉េង ប្រធានក្រុមប្រឹក្សាភិបាលនៃក្រុមហ៊ុន PPSP បានលើកឡើងតាមរយៈសារមួយឃ្លាដែលបង្កប់អត្ថន័យដ៏ជ្រាលជ្រៅថា៖

«ស្របពេលដែលយើងឈានចូលឆ្នាំថ្មីនេះ យើងគប្បីចងចាំថា ភាពរីកចម្រើនផ្ទាល់ខ្លួន និងភាពសុខដុមរបស់សហគមន៍ មានទំនាក់ទំនងគ្នាយ៉ាងជិតស្និទ្ធ។ ភាពខ្លាំងពិតប្រាកដមិនមែនត្រឹមតែធ្វើឱ្យខ្លួនឯងប្រសើរទ្បើងប៉ុណ្ណោះ​ទេ ប៉ុន្តែក៏រួមចំណែកដល់សន្តិភាព ឯកភាព និងស្ថិរភាពនៅជុំវិញខ្លួនយើង ជាពិសេសក្នុងគ្រាដ៏លំបាកនេះដែលប្រទេសកម្ពុជាយើងកំពុងប្រឈមមុខ។»

សារនេះបានឆ្លុះបញ្ចាំងពីការប្តេជ្ញាចិត្តរបស់ក្រុមហ៊ុន PPSP ចំពោះកិច្ចអភិវឌ្ឍរយៈពេលវែង និងប្រកបដោយចីរភាពក្នុងតំបន់សេដ្ឋកិច្ចពិសេស RGPPSEZ តាមរយៈការពង្រឹងគុណភាពហេដ្ឋារចនាសម្ព័ន្ធ សេវាកម្មគាំទ្រវិនិយោគិនប្រកបដោយប្រសិទ្ធភាព និងកិច្ចសហប្រតិបត្តិការយ៉ាងជិតស្និទ្ធជាមួយរាជរដ្ឋាភិបាលកម្ពុជា និងអាជ្ញាធរពាក់ព័ន្ធ។

ក្រោមផែនការដ៏ម៉ឺងម៉ាត់របស់អ្នកឧកញ៉ា គិត ម៉េង ចាប់តាំងពីឆ្នាំ២០២៦ តទៅ PPSP នឹងបន្តពង្រីកតំបន់សេដ្ឋកិច្ចពិសេសថ្មីៗរបស់ខ្លួននៅតាមបណ្តាខេត្តនានាទៀត។ កិច្ចខិតខំប្រឹងប្រែងទាំងនេះ មានគោលបំណងពង្រឹងបន្ថែមទៀតនូវភាពប្រកួតប្រជែងនៃការនាំចេញរបស់ប្រទេសកម្ពុជា ការអភិវឌ្ឍវិស័យឧស្សាហកម្ម និងការបង្កើតការងារសម្រាប់មនុស្សរាប់ពាន់ រាប់ម៉ឺននាក់ ដោយចូលរួមកាត់បន្ថយការធ្វើចំណាកស្រុក។

រ៉ូយ៉ាល់ គ្រុប គឺជាក្រុមហ៊ុនគ្រប់គ្រងការវិនិយោគជាយុទ្ធសាស្ត្ររបស់កម្ពុជា ដែលត្រូវបានទទួលស្គាល់ថា ជាក្រុមហ៊ុន អាជីវកម្ម ដែលមានថាមពល និងចម្រុះបំផុតរបស់ប្រទេស។ ជាមួយនឹងចំណាប់អារម្មណ៍នៅក្នុងឧស្សាហកម្មជាច្រើន រួមមាន ធនាគារ និងហិរញ្ញវត្ថុ ធានារ៉ាប់រង ការវិនិយោគ ទូរគមនាគមន៍ ថាមពល ការដឹកជញ្ជូន ប្រព័ន្ធផ្សព្វផ្សាយ ការកម្សាន្ត សណ្ឋាគារ និងរមណីយដ្ឋាន ការអប់រំ ការអភិវឌ្ឍអចលនទ្រព្យ ការជួញដូរនាំចេញនាំចូល និងតំបន់សេដ្ឋកិច្ចពិសេស៕