ភ្នំពេញ ៖ ប្រជាកសិករតាមបណ្តាខេត្តក្រុងមួយចំនួន បាន និងកំពុងប្រមូលផលស្រូវវស្សាប្រកបដោយទឹកចិត្តសប្បាយរីករាយ ព្រោះតែទទួលបានទិន្នផលល្អនៃផលស្រូវឆ្នាំនេះ ជាពិសសគឺតម្លៃស្រូវក៏ទទួលបានតម្លៃខ្ពស់ដែលពួកគាត់គិតថា​ ជាការយកចិត្តទុកដាក់ និងការលើកកម្ពស់វិស័យកសិកម្មពីសំណាក់រាជរដ្ឋាភិបាលអាណត្តិទី៧។

ឯកឧត្តម បណ្ឌិត យ៉ង សាំងកុមារ បានបញ្ជាក់ពីការដាក់ចេញនូវកម្មវិធីនយោបាយអាទិភាពចំនួន៦ របស់រាជរដ្ឋាភិបាល ដែលក្នុងនោះកម្មវិធីគោលនយោបាយទី៥ និងទី៦ ជាកម្មវិធីគោលនយោបាយអាទិភាពសម្រាប់វិស័យកសិកម្ម។

ឯកឧត្តមបណ្ឌិត បានបញ្ជាក់ថា ឯកឧត្តមរដ្ឋមន្ត្រី ឌិត ទីណា បានផ្តល់ការទុកចិត្តដល់រូបលោកក្នុងការដឹកនាំអនុវត្តគោលនយោបាយអាទិ​ភាព​ទី៥ ស្ដីពីយន្តការសម្របសម្រួល និងកម្មវិធីហិរញ្ញប្បទានសំដៅលើក​ស្ទួយផលិត​កម្មរកទីផ្សារ និងរក្សាលំនឹងផ្នែកសិផលសំខាន់ៗ ក្នុងកម្រិតសមរម្យ ដោយទទួលតួនាទីជាប្រធានក្រុមការងារចម្រុះសម្របសម្រួលខ្សែច្រវាក់តម្លៃផលិតផលកសិកម្ម និងទទួលខុសត្រូវក្នុងការដាក់ពង្រាយមន្ត្រីកសិកម្មឃុំ-សង្កាត់។

ឯកឧត្តមក៏បានបង្ហាញអំពីទិន្នផលស្រូវ ខណៈឯកឧត្តមបានចូលរួមគាំទ្រ និងលើកទឹកចិត្តដល់កសិករអ្នកផលិតគ្រាប់ពូជស្រូវផ្ការំដួលនៅភូមិអង្គបក្សី ឃុំជាងទង ស្រុកត្រាំកក់ ខេត្តតាកែវ កាលពីដំណាច់ខែវិច្ឆិកា ឆ្នាំ២០២៣កន្លងទៅ។ នៅភូមិអង្គបក្សីមានកសិករចំនួន ៣៣ នាក់​ចូលរួមផលិតពូជសុទ្ធផ្ការំដួល លើដី ៨,៥ហិកតា ទទួលបានផលសរុប ២៤តោន។ បើធៀបនឹងឆ្នាំ២០២២ មានកសិករ២១នាក់ ចូលរួមក្នុងការផលិតពូជ ​ដោយសម្រាប់ស្រូវពូជផ្ការំដួលនេះ សហគមន៍បានលក់ក្នុងតម្លៃជាង ១៧០០ រៀលមួយគីឡូក្រាម។

ដោយឡែក នៅឆ្នាំ២០២៤ ខាងមុខសហគមន៍រំពឹងថាចំនួនអ្នកចូលរួមនឹងកើនឡើងកាន់តែច្រើនថែមទៀតដោយសារការធ្វើស្រែផលិតពូជនាំមកនូវផលចំណេញខ្ពស់ គឺបានទិន្នផលខ្ពស់លក់បានថ្លៃ ។ សម្រាប់កសិករដែលមានដីតូច យើងក៏មានផែនការជ្រើសរើសសហគមន៍អង្គបក្សី ដើម្បីគាំទ្រឱ្យក្លាយជាសហគមន៍ឈានមុខគេមួយ ក្នុងការ    ផលិតគ្រាប់ពូជស្រូវផ្ការំដួល។ នេះបើតាមការបញ្ជាក់របស់ឯកឧត្តម បណ្ឌិត យ៉ង សាំងកុមារ។

សូមបញ្ជាក់ថា ក្រសួងកសិកម្ម រុក្ខាប្រមាញ់ និងនេសាទ កំពុងបង្កើនការគាំទ្រដល់កសិករ ធ្វើការផលិតគ្រាប់ពូជសុទ្ធផ្ការំដួល ដើម្បីឱ្យកសិករគ្រប់រូបទទួលបានពូជសុទ្ធល្អ សម្រាប់ផលិតស្រូវអង្ករ ប្រកបដោយគុណភាព​ ដែលជាកត្តាសំខាន់ក្នុងការបង្កើនប្រាក់ចំណូលរបស់កសិករ និងសមត្ថភាពប្រកួតប្រជែងរបស់អង្ករកម្ពុជានៅលើទីផ្សារ​។

តាមការវិវត្តចំពោះតម្លៃស្រូវឆ្នាំនេះ ក៏មានភាពល្អប្រសើរជាងឆ្នាំមុនៗ ដោយទិន្នផលស្រូវឆ្នាំនេះទទួលបានខ្ពស់ ហើយចំពោះតម្លៃស្រូវវិញ គឺស្រូវគ្រប់ប្រភេទទទួលបានតម្លៃខ្ពស់ជាងឆ្នាំមុនៗ ដែលពូជស្រូវខ្សាយធម្មតាដែលប្រជាកសិករនៅតាមស្រុកស្រែចំការ ទីជនបទតែងនិយមធ្វើជារៀងរាល់ឆ្នាំ បើប្រៀបធៀបតម្លៃឆ្នាំមុនៗ ស្រូវខ្សាយចម្រុះហាលស្ងួតបានតម្លៃត្រឹមតែ៨០០ទៅ៩០០រៀលក្នុងមួយគីឡូក្រាម តែឆ្នាំនេះស្រូវខ្សាយចម្រុះហាលស្ងួតបានតម្លៃ១,៣០០រៀលក្នុង១គីឡូក្រាម។

សម្រាប់ស្រូវរំដួល ឬផ្ការំដួល ខេត្តកំពង់ឆ្នាំង ឆ្នាំមុនៗស្រូវហាលស្ងួតបានតម្លៃត្រឹមតែមួយគីឡូ ១,១០០រៀល តែឆ្នាំនេះស្រូវរំដួល ហាលស្ងួតបានតម្លៃ១,៥០០រៀក្នុង១គីឡូក្រាម តម្លៃនេះធ្វើឱ្យប្រជាកសិករមានចិត្តសប្បាយរីករាយឥតឧបមា។

បើតាមលោក ប្រធានមន្ទីរកសិកម្មខេត្តកំពង់ឆ្នាំង ងិន ហ៊ុន បានឲ្យដឹងថា តម្លៃស្រូវក្នុងសប្តាហ៍នេះគឺស្រូវក្រអូប (ស្ងួត) តម្លៃ ១,៥៦០រៀលក្នុង១គីឡូ ក្រាមខ្ពស់ជាងឆ្នាំ២០២២ ចំនួន២២០រៀល ក្នុងមួយគីឡូក្រាម ស្រូវចម្រុះ (ស្ងួត)ជាមធ្យមតម្លៃ១,៣៥០រៀល ក្នុងមួយគីឡូក្រាម ខ្ពស់ជាងឆ្នាំ២០២២ ចំនួន១០០រៀល ក្នុងមួយគីឡូក្រាម ស្រូវ IR (សើម) តម្លៃ៩៩០រៀល ក្នុង១គីឡូក្រាម ខ្ពស់ជាងឆ្នាំ២០២២ ចំនួន១៨០រៀលក្នុង១គីឡូក្រាម។

ដោយឡែកបើតាមប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រៃវែង លោក អ៊ុក សំណាង បានឱ្យដឹងថា ឆ្នាំ២០២៣នេះ បរិមាណនាំស្រូវចេញក្រៅផ្លូវការទៅប្រទេសវៀតណាមមានចំនួនប្រមាណ ១,៩១៥,៦២៩តោន ចំណូលសរុប ៤៩៣,១៣៨,​៤០៤ដុល្លារ។ ផលិតកម្មដំណាំស្រូវរដូវវស្សា គិតត្រឹមថ្ងៃទី១៥ ខែវិច្ឆិកា ឆ្នាំ២០២៣ អនុវត្តបានលើផ្ទៃដីព្រោះសរុប ២៨៥,០៤៤ហិកតា ធៀបនឹងឆ្នាំមុន ខ្ពស់ជាង ៨,២២៥ហិកតា ។ ប្រមូលផលស្រូវរដូវវស្សាសម្រេចបាន ១៤៤,​៣៤៦ហិកតា ស្មើនឹង៥០.៦៤% នៃផ្ទៃដីអនុវត្តបានសរុប ២៨៥,​០៤៤ហិកតា បរិមាណផលសរុប ៥៥៨,៦៥២តោន។ ចំណែកតម្លៃស្រូវជាមធ្យម ស្រូវ IR504-04 តម្លៃ ១,២២​០រៀល ក្នុង១គីឡូក្រាម ស្រូវ OM5451តម្លៃ១២០០រៀល ក្នុង១គីឡូក្រាម និងស្រូវក្រអូបតម្លៃ ១,៣២០រៀល ក្នុង១គីឡូក្រាម។

ចំពោះស្រូវបានតម្លៃខ្ពស់ជាបន្តបន្ទាប់ដូចសព្វថ្ងៃនេះ ប្រជាកសិករទាំងអស់ មិនភ្លេចការថ្លែងដឹងគុណដល់រាជរដ្ឋាភិបាល ដែលបានលើកកម្ពស់វិស័យកសិកម្មជាចម្បង ធ្វើឱ្យតម្លៃស្រូវឆ្នាំនេះឡើងថ្លៃខ្ពស់ និង​អាចឡើង​ថ្លៃជាបន្តបន្ទាប់ពីមួយឆ្នាំទៅមួយឆ្នាំ ធ្វើឱ្យកែប្រែជីវភាពប្រជាកសិករឱ្យមានជីវភាពធូរធារចាប់ពីពេលនេះតទៅ ហើយជីវភាពប្រជាកសិករ នឹងកែប្រែយ៉ាងឆាប់រហ័ស ៕