សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ទោះបីជាស្ថានភាពសេដ្ឋកិច្ចពិភពលោកនាពេលបច្ចុប្បន្ននេះ ហាក់នៅមិនទាន់ប្រសើរដូចមុនវិបត្តិកូវីដ១៩ក្ដី ប៉ុន្តែការវិនិយោគពីបរទេសចូលមកក្នុងប្រទេសកម្ពុជានៅតែមានជាហូរហែ ជាក់ស្ដែង ក្នុងឆមាសទី២ ឆ្នាំ២០២៤នេះ សកម្មភាពវិនិយោគពីបរទេសចូលមកកម្ពុជាចាប់ផ្ដើមមានសញ្ញាវិជ្ជមានរហូតដល់រាប់រយគម្រោង។
យោងតាមសេចក្ដីប្រកាសព័ត៌មានក្រោយជំនួបរវាងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងវិនិយោគិនចិនមួយក្រុម កាលពីថ្ងៃទី២០ ខែសីហា ឆ្នាំ២០២៤ បានឱ្យដឹងថា ក្រុមហ៊ុនធំៗរបស់ចិនរហូតដល់១២ក្រុមហ៊ុនផ្សេងទៀតបានបង្ហាញចំណាប់អារម្មណ៍វិនិយោគលើវិស័យមួយចំនួនដូចជា វិស័យថាមពលស្អាត និងបរិស្ថាន សុខាភិបាល កសិកម្ម ឧស្សាហកម្ម ហិរញ្ញវត្ថុ ហេដ្ឋារចនាសម្ព័ន្ធ និងសំណង់ រួមជាមួយនឹងអនុវិស័យមួយចំនួនទៀត ។
នៅក្នុងជំនួបនោះដែរ សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាបានបង្ហាញពីគោលនយោបាយយុទ្ធសាស្ត្ររបស់រាជរដ្ឋាភិបាលកម្ពុជាក្នុងការបង្កើតនូវក្របខណ្ឌសម្រាប់វិនិយោគិនបរទេស ដែលរួមមានដូចជា ការដាក់ចេញនូវច្បាប់ស្ដីពីការវិនិយោគនៃព្រះរាជាណាចក្រកម្ពុជា លិខិតបទដ្ឋានគតិយុត្តិ និងវិធានការចាំបាច់នានា ជាមួយនឹងកញ្ចប់វិធានការលើកទឹកចិត្តដែលបង្កើតនូវបរិយាកាសវិនិយោគមានលក្ខណៈអំណោយផល អាចប៉ាន់ប្រមាណបាន និងសម្បូរបែប។
គួររំលឹកថា កាលពីថ្ងៃទី២០ ខែសីហា ឆ្នាំ២០២៤ ថ្មីៗនេះដែរ ក្រុមហ៊ុនអចលនទ្រព្យដ៏ធំមួយនៅក្នុងប្រទេសកម្ពុជា WorldBridge Group បានចុះហត្ថលេខាជាមួយក្រុមហ៊ុន អភិវឌ្ឍន៍អចលនទ្រព្យល្បីឈ្មោះរបស់ប្រទេសឥណ្ឌូនេស៊ី ដោយកិច្ចសហការនេះ ក្រុមហ៊ុនទាំង ២ នឹងបង្កើតគម្រោងវិនិយោគនានាជាច្រើននៅក្នុងប្រទេសកម្ពុជា ដោយជាជំហានដំបូង ក្រុមហ៊ុនទាំង ២ បានសម្រេចបង្កើតគម្រោងនៅក្នុងខេត្តកំពត ហើយបន្ទាប់ពីនេះ នឹងសិក្សាលទ្ធភាពក្នុងការបង្កើតគម្រោងវិនិយោគថ្មីនៅតាមបណ្តាខេត្តសក្ដានុពលផ្សេងទៀតក្នុងប្រទេសកម្ពុជា ។
ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល ក្នុងពិធីបើកការដ្ឋានសាងសង់រោងចក្រដំឡើងរថយន្តអគ្គិសនីនៅក្នុងតំបន់សេដ្ឋកិច្ចពិសេសខេត្តពោធិ៍សាត់ កាលពីពេលថ្មីៗនេះបានលើកឡើងថា កត្តាសុខសន្តិភាព គឺជាកត្តាដ៏សំខាន់ក្នុងការទាក់ទាញវិនិយោគិនក្នុង និងក្រៅប្រទេសឱ្យបណ្ដាក់ទុនវិនិយោគនៅកម្ពុជា ហើយបើគ្មានសន្តិភាពទេ គ្មានឡើយការវិនិយោគដូចសព្វថ្ងៃនេះ ។
ឯកឧត្តមក៏បានបន្ថែមថា កាលពីមុន ការវិនិយោគនៅក្នុងប្រទេសកម្ពុជាភាគច្រើនផ្ដោតលើកម្លាំងពលកម្ម ហើយកម្មករ និយោជិតក៏ទទួលបានកម្រៃតិចតួច ប៉ុន្តែបច្ចុប្បន្នវិនិយោគិនដែលបណ្ដាក់ទុនវិនិយោគនៅកម្ពុជា ជាពិសេសនៅតាមតំបន់សេដ្ឋកិច្ចពិសេសនានាក្នុងប្រទេស បានផ្លាស់ប្តូរឧស្សាហកម្មដែលប្រើកម្លាំង មកជាឧស្សាហកម្មដោយប្រើចំណេះ និងជំនាញ ដូចជារោងចក្រដំឡើងរថយន្ត រោងចក្រផលិតបន្ទះសូឡា រោងចក្រផលិតសម្ភារៈអគ្គិសនីជាដើម ដែលការវិនិយោគលើរោងចក្រទាំងនេះ តម្រូវឱ្យកម្មករ និយោជិតមានចំណេះ មានជំនាញ និងឆ្លងកាត់ការបណ្ដុះបណ្ដាល ជាមួយនឹងការទទួលបានប្រាក់ខែខ្ពស់ជាងមុន។
ទន្ទឹមនឹងនេះដែរ រាជរដ្ឋាភិបាលកម្ពុជាក៏បានយកចិត្តទុកដាក់យ៉ាងខ្លាំងទៅលើការបណ្ដុះបណ្ដាលធនធានមនុស្ស ជំនាញ បច្ចេកទេស បន្ថែមរហូតដល់ ១,៥លាននាក់ ដើម្បីត្រៀមស្វាគមន៍ការវិនិយោគថ្មីៗ និងដើម្បីជំរុញឱ្យកម្ពុជាក្លាយជាប្រទេសមានប្រាក់ចំណូលមធ្យមមកម្រិតខ្ពស់ឆ្នាំ២០៣០ និងប្រទេសមានប្រាក់ចំណូលខ្ពស់នៅឆ្នាំ២០៥០ខាងមុខ ដោយតម្រូវឱ្យពលរដ្ឋមានជំនាញ មានចំណូលខ្ពស់តាមរយៈការងារដែលមានប្រាក់បៀវត្សរ៍ខ្ពស់ជាងមុន ៕
Account
Security
Favourite Content