សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានទទួលជួបតំណាងទីភ្នាក់ងារអភិវឌ្ឍន៍បារាំង (AFD) និងសហភាពអឺរ៉ុប ដើម្បីពិនិត្យវឌ្ឍនភាពគម្រោង និងពិភាក្សាអំពីជំហានបន្ទាប់ក្នុងការពង្រឹងអភិបាលកិច្ច កសាងសមត្ថភាព និងកែទម្រង់វិស័យទឹកស្អាតនៅកម្ពុជា។ ក្នុងកិច្ចពិភាក្សានេះ ក្រុមបេសកកម្មវាយតម្លៃ និងត្រួតពិនិត្យគម្រោងរបស់ AFD បានធ្វើបទបង្ហាញអំពីវឌ្ឍនភាពនៃគម្រោងសំខាន់ៗ រួមទាំងគម្រោងសាងសង់រោងចក្រប្រព្រឹត្តិកម្មទឹកស្អាតបាខែង ជំហានទី៣ និងគម្រោងពង្រីកការផ្គត់ផ្គង់ទឹកស្អាតក្នុងខេត្តសៀមរាប។
ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានជម្រាបជូនអំពីកិច្ចខិតខំប្រឹងប្រែងរបស់កម្ពុជាក្នុងការពង្រឹងអភិបាលកិច្ច និងលើកកម្ពស់ការផ្តល់សេវាផ្គត់ផ្គង់ទឹកស្អាត ទាំងវិស័យរដ្ឋ ទាំងតាមរយៈការរៀបចំបង្កើតនិយតករទឹកស្អាតជាតិនាពេលខាងមុខ។
ឯកឧត្តមបានលើកឡើងថា៖
«យើងមិនអាចចម្លងគំរូនិយតកររបស់យើងពីប្រទេសផ្សេងបានទេ។ កម្ពុជាត្រូវតែអភិវឌ្ឍគំរូផ្ទាល់ខ្លួន ដែលមានលក្ខណៈសមស្រប និងប្រព័ន្ធអភិបាលកិច្ច ព្រមទាំងស្ថានភាពជាក់ស្តែងក្នុងប្រទេស។ ទឹកស្អាតត្រូវតែក្លាយជាសរសៃឈាមបម្រើសេដ្ឋកិច្ច និងសុខភាពសាធារណៈរបស់ប្រជាជនយើង»។
ឯកឧត្តមរដ្ឋមន្ត្រីបានគូសបញ្ជាក់បន្ថែមអំពីតម្រូវការក្របខ័ណ្ឌយុទ្ធសាស្ត្រគ្រប់ជ្រុងជ្រោយមួយសម្រាប់វិស័យនេះ និងភាពចាំបាច់ក្នុងការគាំទ្ររដ្ឋាករទឹកដែលទើបង្កើតថ្មី ក៏ដូចជាប្រតិបត្តិករទឹកស្អាតឯកជន ដែលត្រូវពង្រឹងប្រសិទ្ធភាព និងកែលម្អសេវា។
ឯកឧត្តមបានបន្ថែមថា ៖
«យើងត្រូវផ្តល់ពេលវេលា និងការគាំទ្រដល់រដ្ឋាករទឹកថ្មី។ ជំហានបន្ទាប់គឺការពង្រឹងអភិបាលកិច្ច និងប្រសិទ្ធភាព ដើម្បីរដ្ឋាករទឹកទាំងនោះអាចទាក់ទាញការវិនិយោគបន្ថែម និងអាចក្លាយជាស្ថាប័នដ៏រឹងមាំ និងមាននិរន្តរភាព»។
លោកស្រី Sandrine Boucher នាយកប្រចាំប្រទេសរបស់ AFD បានបញ្ជាក់ពីការប្តេជ្ញាចិត្តរយៈពេលវែងចំពោះការអភិវឌ្ឍវិស័យទឹកស្អាតនៅកម្ពុជា ដោយសង្កត់ធ្ងន់ថា កិច្ចសហការលើការកែទម្រង់គោលនយោបាយ ការបណ្តុះបណ្តាល និងការវិនិយោគលើហេដ្ឋារចនាសម្ព័ន្ធទឹកស្អាត គឺជាគន្លឹះសម្រាប់ការពង្រីកលទ្ធភាពទទួលសេវា។
លោកស្រីបានបញ្ជាក់ថា ជាផ្នែកមួយនៃកិច្ចសហការអភិវឌ្ឍធនធានមនុស្ស ទីភ្នាក់ងារ AFD និងសហភាពអឺរ៉ុប នឹងចាប់ផ្តើមផ្តល់អាហារូបករណ៍ក្រោមកម្មវិធី European Global Gateway Scholarships ពីខែកញ្ញា ឆ្នាំ២០២៦តទៅ ដោយជ្រើសរើសនិស្សិតកម្ពុជាក្រុមទី១ ចំនួន ៣០នាក់ ឱ្យទៅបន្តការសិក្សាជំនាញពាក់ព័ន្ធនឹងវិស័យទឹកស្អាតនៅទ្វីបអឺរ៉ុប។ ភាគីទាំងអស់បានប្តេជ្ញាសហការលើការកែទម្រង់វិស័យ និងអភិវឌ្ឍធនធានមនុស្ស ដើម្បីគាំទ្រដល់ចក្ខុវិស័យកម្ពុជាក្នុងការសម្រេចគោដៅអភិវឌ្ឍន៍ប្រកបដោយចីរភាពទី ៦.១ ដែលកំណត់ថាប្រជាពលរដ្ឋទាំងអស់នឹងមានទឹកស្អាតប្រើប្រាស់ត្រឹមឆ្នាំ២០៣០៕
Account
Security
Favourite Content