បរទេស៖ យោងតាមប្រភពព័ត៌មានពី CNN បានរាយការណ៍័ថា ការធ្លាក់ចុះធ្ងន់ធ្ងរនៃសេដ្ឋកិច្ចបានបង្កឲ្យក្រុមហ៊ុនធំៗជាច្រើន ដូចជា Bosch Volkswagen និង Thyssenkrupp កាត់បន្ថយការងាររាប់ម៉ឺននាក់ជាបន្តបន្ទាប់។

ថ្មីៗនេះ អ្នកនាំពាក្យរបស់ក្រុមហ៊ុនបច្ចេកវិទ្យា Bosch  បានប្រកាសថា ខ្លួនគ្រោងនឹងកាត់បន្ថយការងារប្រហែល ៨ ២៥០ កន្លែងនៅទូទាំងពិភពលោកក្នុងរយៈពេលប៉ុន្មានឆ្នាំខាងមុខនេះ។ ក្នុងនាមជាអ្នកផ្គត់ផ្គង់គ្រឿងបន្លាស់ដល់ក្រុមហ៊ុនផលិតរថយន្តជុំវិញពិភពលោក Bosch បានជួបបញ្ហាដូចទៅនឹងក្រុមហ៊ុនអាល្លឺម៉ង់ផ្សេងទៀតដូចជា តម្រូវការធ្លាក់ចុះ ការចំណាយខ្ពស់ និងការប្រកួតប្រជែងកាន់តែខ្លាំង។ នៅក្នុងលក្ខខណ្ឌសេដ្ឋកិច្ចដ៏លំបាក និងការផ្លាស់ប្តូរដែលកំពុងបន្តនៅក្នុងឧស្សាហកម្មរថយន្ត វាជារឿងសំខាន់សម្រាប់ពួកគេក្នុងការរក្សាការប្រកួតប្រជែងនៅក្រោមលក្ខខណ្ឌដ៏លំបាកទាំងនេះ។  នេះមានន័យថា Bosch អាចទំនងជារៀបចំរចនាសម្ព័ន្ធឡើងវិញ វិធានការកាត់បន្ថយការចំណាយ ការកាត់បន្ថយការងារ ការផ្តោតជាយុទ្ធសាស្ត្រលើការច្នៃប្រឌិត និងការផ្តោតលើអនាគតទីផ្សារ។

គួរឲ្យបញ្ជាក់ដែរថា ក្រុមហ៊ុនបច្ចេកវិទ្យា Bosch ដែលមានអាយុ ១៣០ ឆ្នាំមួយនេះក៏មានការបង្កើតទំនិញប្រើប្រាស់ជាច្រើនផ្សេងទៀតក្រៅពីគ្រឿងបន្លាសរថយន្ត ដូចជា ទូទឹកកក ម៉ាស៊ីនកាហ្វេ និងគ្រឿងម៉ាស៊ីនសម្រាប់ចែកចាយទៅក្រុមហ៊ុនផ្សេងៗទៀត។ កាលពីដើមឆ្នាំ២០២៤នេះ ក្រុមហ៊ុន Bosch បានប្រកាសពីគម្រោងកាត់បន្ថយការងារយ៉ាងហោចណាស់ ៥ ០០០ កន្លែងនៅក្នុងប្រទេសអាល្លឺម៉ង់ ប៉ុន្តែក្រុមហ៊ុនជួបការលំបាកផ្នែកហិរញ្ញវត្ថុដែលធ្វើឲ្យកាត់បន្ថយការងារបន្ថែមទៀតនៅជុំវិញពិភពលោក។

ការប្រកាសពីការកាត់បន្ថយការងាររបស់ Bosch គឺជាដំណឹងអាក្រក់មួយទៀតសម្រាប់អាល្លឺម៉ង់ ដែលជាប្រទេសសេដ្ឋកិច្ចដ៏ធំបំផុតរបស់អឺរ៉ុប ខណៈដែលប្រទេសមួយនេះកំពុងជួបប្រទះនឹងភាពរង្គោះរង្គើរសេដ្ឋកិច្ចឥតឈប់ឈរ។ នេះមានន័យថា ក្រុមហ៊ុនផលិតជាច្រើនរបស់អាល្លឺម៉ង់កំពុងប្រឈមមុខនឹងការប្រកួតប្រជែងយ៉ាងខ្លាំងក្លាជាមួយចិន តម្លៃពលកម្មថ្លៃ ពន្ធខ្ពស់ និងតម្លៃថាមពលថ្លៃ។ ប្រសិនបើសម្ពាធសេដ្ឋកិច្ចបន្តកើនឡើង Bosch អាចនឹងកាត់បន្ថយការងារដល់ខ្ទង់ ១ ម៉ឹននាក់។

កាលពីសប្តាហ៍មុន កម្មកររាប់ម៉ឺននាក់នៅក្រុមហ៊ុន Volkswagen ដែលជាក្រុមហ៊ុនផលិតដ៏ធំបំផុតរបស់ប្រទេសអាល្លឺម៉ង់បានចូលរួមក្នុងកូដកម្មនៅរោងចក្រនានាទូទាំងប្រទេស។ សកម្មភាពកើតឡើងដោយសារក្រុមហ៊ុនផលិតរថយន្តដ៏ធំរបស់អាល្លឺម៉ង់ Volkswagen ប្រកាសពីការបញ្ឈប់បុគ្គលិករាប់ម៉ឺននាក់ និងការបិទរោងចក្រនៅក្នុងប្រទេសអាល្លឺម៉ង់។ កាលពីខែមុន ក្រុមហ៊ុនផលិតដែកដ៏ធំបំផុតរបស់អាល្លឺម៉ង់ Thyssenkrupp បានប្រកាសពីផែនការកាត់បន្ថយការងារចំនួន ១ ១០០០ នាក់នៅត្រឹមឆ្នាំ២០៣០ ដែលស្មើនឹងប្រហែល ៤០ ភាគរយនៃកម្លាំងការងារសរុបរបស់ខ្លួន។

ស្ថានភាព​នយោបាយ និង​សេដ្ឋកិច្ច​ក្នុង​​អាល្លឺម៉ង់​កាន់តែអាក្រក់ៗទៅ ខណៈដែលមានការអំពាវនាវឲ្យសមាជិកសភារៀបចំយុទ្ធសាស្រ្តប្រកបដោយប្រសិទ្ធភាព ដើម្បីជួយដល់ពលរដ្ឋដែលរងផលប៉ះពាល់ពីការបញ្ឈប់ការងារ និងជំរុញកំណើនសេដ្ឋកិច្ច។ ការបញ្ឈប់ការងារបង្កឲ្យមានភាពមិនច្បាស់លាស់អំពីអនាគតដល់បុគ្គលិកជាច្រើន និងប៉ះពាល់ដល់ភាពធន់នៃការងារនៅក្នុងក្រុមហ៊ុន។ ដូច្នោះហើយ បញ្ហាប្រឈមសម្រាប់សេដ្ឋកិច្ចអាល្លឺម៉ង់ គឺជារឿងគួរប្រុងប្រយ័ត្នសម្រាប់ក្រុមហ៊ុន ឬ ប្រទេសណាមួយដែលពឹងផ្អែកលើអ្នកផ្គត់ផ្គង់ និងប្រភពពីបរទេស។ ថ្វីត្បិតអាល្លឺម៉ង់ជាប្រទេសសេដ្ឋកិច្ចដែលមានជាងគេបំផុតរបស់អឺរ៉ុប ប៉ុន្តែបញ្ហានៃការបញ្ឈប់បុគ្គលិក និងការបិទរោងចក្រគឺជាបញ្ហាដ៏ធ្ងន់ធ្ងរសម្រាប់សេដ្ឋកិច្ច។ នេះមានន័យថា សូម្បីតែម៉ាស៊ីនសេដ្ឋកិច្ចដ៏ខ្លាំងបំផុតក៏ងាយរងគ្រោះដែរ៕