សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
បរទេស៖ យោងតាមប្រភពពី Forbes បានលើកឡើងថា អាល្លឺម៉ង់ដែលត្រូវបានគេស្គាល់ថាជាក្បាលម៉ាស៊ីនសេដ្ឋកិច្ចរបស់សហភាពអឺរ៉ុបកំពុងជួបប្រទះនឹងការធ្លាក់ចុះសេដ្ឋកិច្ចធ្ងន់ធ្ងរ ជាពិសេសវិស័យយានយន្តដែលធ្លាប់តែជាកម្លាំងជំរុញសេដ្ឋកិច្ចប្រទេសដ៏រឹងមាំ។
ឧស្សាហកម្មយានយន្តគឺជាកម្លាំងជំរុញដ៏សំខាន់មួយសម្រាប់សេដ្ឋកិច្ចអាល្លឺំម៉ង់ ហើយរថយន្តរបស់អាល្លឺម៉ង់ត្រូវបានចាត់ទុកថាមានគុណភាពល្អបំផុតមួយនៅក្នុងពិភពលោក។ ដូច្នោះហើយ វិស័យយានយន្តចាំបាច់ត្រូវមានការកែសម្រួលដើម្បីរីកចម្រើនបន្ថែមទៀត ប៉ុន្តែការធ្លាក់ចុះសេដ្ឋកិច្ចបានបង្ខំឲ្យម្ចាស់ក្រុមហ៊ុន ឬ អាជីវកម្មបញ្ឈប់ការចំណាយ និងការបិទទ្វាររោងចក្រ។ ក្រុមហ៊ុនផលិតរថយន្តធំជាងគេរបស់អាល្លឺម៉ង់ Volkswagen បានប្រកាសពីការបញ្ឈប់បុគ្គលិកម៉ឺននាក់ ហើយកំពុងពិចារណាពីការបិទទ្វាររោងចក្រដែលមិនធ្លាប់មានពីមុនមក។ ក្រុមហ៊ុនអាល្លឺម៉ង់ Bosch ដែលជាអ្នកផ្គត់ផ្គង់គ្រឿងបន្លាស់រថយន្តធំជាងគេលើពិភពលោកក៏មានគម្រោងកាត់បន្ថយទាំងម៉ោង និងប្រាក់សម្រាប់បុគ្គលិកប្រហែល ១០ ០០០ នាក់។ លើសពីនេះ ក្រុមហ៊ុនរថយន្តមកពីប្រទេសផ្សេងដូចជា Mercedes Benz, BMW, Ford និងក្រុមហ៊ុនផ្សេងទៀតកំពុងកាត់បន្ថយការចំណាយ និងបុគ្គលិកផងដែរ។ ការធ្លាក់ចុះសេដ្ឋកិច្ចអាល្លឺម៉ង់បានរីករាលដាលដល់វិស័យជាច្រើន ខណៈដែលក្រុមហ៊ុនសាងសង់នាវាអាល្លឺម៉ង់ Meyer Werft ត្រូវការថវិកាសង្គ្រោះចំនួន ៤២៣ លានដុល្លារ ដើម្បីជៀសវាងការក្ស័យធន។
ក្នុងឆ្នាំ ២០២៣ ឧស្សាហកម្មរថយន្តមានចំណែក ១៧ ភាគរយនៃការនាំចេញរបស់អាល្លឺម៉ង់ ខណៈដែលមានបុគ្គលិកសរុបជាង ៧៥០ ០០០ នាក់ ប៉ុន្តែតួរលេខស្ថិតនៅក្រោមកម្រិតមុនពេលមានការរាតត្បាត។ យោងតាមប្រភពមួយបានលើកឡើងថា គំរូសេដ្ឋកិច្ចអាល្លឺម៉ង់គឺហួសសម័យហើយ ដោយសារកាលពីប៉ុន្មានឆ្នាំមុន សេដ្ឋកិច្ចជាតិអាល្លឺម៉ង់ត្រូវបានជំរុញដោយការផ្គត់ផ្គង់ថាមពលពីរុស្ស៊ីមានតម្លៃថោក និងការផ្គត់ផ្គង់ភាគច្រើនទៅកាន់ប្រទេសចិន ប៉ុន្តែអាជីវកម្មជាមួយប្រទេសទាំងពីរកំពុងមានភាពរកាំរកូស។ លើសសពីនេះ អាល្លឺម៉ង់ពឹងផ្អែកលើទីក្រុងមូស្គូ និងទីក្រុងប៉េកាំងច្រើនជាងបណ្តាប្រទេសសហភាពអឺរ៉ុបដទៃទៀត ដែលមានផលវិបាកយ៉ាងធំធេង ចំពេលមានភាពតានតឹងភូមិសាស្ត្រនយោបាយបច្ចុប្បន្ន។ មិនត្រឹមតែប៉ុណ្ណោះ រថយន្តអគ្គិសនី EV លក់ដាច់បំផុតទាំង ១០ នៅលើពិភពលោក មិនមានរថយន្តត្រូវបានផលិតនៅក្នុងប្រទេសអាល្លឺម៉ង់នោះទេ។
ជាមួយនឹងការផ្លាស់ប្តូរអេកូឡូស៊ី និងសង្រ្គាមរុស្សី-អ៊ុយក្រែន គឺលែងមានថាមពលតម្លៃថោកសម្រាប់អាល្លឺម៉ង់ទៀតហើយ ខណៈដែលការធ្វើសមាហរណកម្មពាណិជ្ជកម្មពិភពលោកកំពុងរារាំងការនាំចេញរបស់អាល្លឺម៉ង់។ តួនាទីរបស់ចិននៅក្នុងសេដ្ឋកិច្ចពិភពលោកបានផ្លាស់ប្តូរពីដៃគូពាណិជ្ជកម្មទៅជាសត្រូវជាប្រព័ន្ធ ដោយសារការរឹតបន្តឹង បញ្ហាពន្ធគយ និងភាពតានតឹងនៃភូមិសាស្រ្តនយោបាយ ដែលមានន័យថាគំរូសេដ្ឋកិច្ចទាំងមូលលែងដំណើរការ។ លើសពីនេះ ការធ្លាក់ចុះសេដ្ឋកិច្ច និងការបញ្ឈប់បុគ្គលិកនៅក្នុងប្រទេសអាល្លឺម៉ង់ អាចនាំឱ្យមានផលប៉ះពាល់ទាំងអាល្លឺម៉ង់ និងពិភពលោកដូចជា ការរំខាននៃខ្សែសង្វាក់ផ្គត់ផ្គង់ ការឡើងថ្លៃនៃតម្លៃយានយន្ត និងការផ្លាស់ប្តូរការវិនិយោគ។
ទន្ទឹមនឹង ការតស៊ូនឹងបញ្ហាសេដ្ឋកិច្ចរបស់អាល្លឺង់មិនគ្រាន់តែជាបញ្ហានៅអឺរ៉ុបទេ ប៉ុន្តែវាជាសញ្ញាព្រមានមួយសម្រាប់សេដ្ឋកិច្ចពិភពលោកដែលពឹងផ្អែកខ្លាំងលើឧស្សាហកម្មសកលភាវូបនីយកម្មរួមបញ្ចូលគ្នាជាសកល។ ការផ្លាស់ប្តូរទៅជាថាមពលស្អាត គួបផ្សំនឹងអស្ថិរភាពភូមិសាស្ត្រនយោបាយ កំពុងរៀបចំឡើងវិញពីរបៀបដែលទំនិញត្រូវបានផលិត និងការប្រើប្រាស់ទូទាំងពិភពលោក។ នៅពេលដែលគំរូសេដ្ឋកិច្ចមួយបានផ្លាស់ប្តូរ អ្នកដឹកនាំទីផ្សារត្រូវតែសម្របខ្លួន។ ដូច្នោះហើយ បញ្ហាប្រឈមសម្រាប់សេដ្ឋកិច្ចអាល្លឺម៉ង់ គឺជារឿងគួរប្រុងប្រយ័ត្នសម្រាប់ក្រុមហ៊ុនណាមួយដែលពឹងផ្អែកលើអ្នកផ្គត់ផ្គង់ ក៏ដូចជាប្រភព និងអតិថិជនពីប្រទេសផ្សេងជាសកល។ យ៉ាងណាក៏ដោយ ទោះបីជាអាល្លឺម៉ង់ ជាប្រទេសសេដ្ឋកិច្ចដែលមានជាងគេបំផុតរបស់អឺរ៉ុប ប៉ុន្តែបញ្ហានៃការបញ្ឈប់បុគ្គលិក និងការបិទរោងចក្រគឺជាបញ្ហាដ៏ធ្ងន់ធ្ងរសម្រាប់សេដ្ឋកិច្ច។ នេះមានន័យថា សូម្បីតែម៉ាស៊ីនសេដ្ឋកិច្ចដ៏ខ្លាំងបំផុតក៏ងាយរងគ្រោះដែរ៕
Account
Security
Favourite Content