បរទេស ៖ បញ្ហាកាកសំណល់ដែលបន្សល់ពីម្ហូបអាហារបានបង្កឲ្យមានផលប៉ះពាល់យ៉ាងខ្លាំងដល់បរិស្ថាន និងសេដ្ឋកិច្ច ខណៈដែលការស្រាវជ្រាវបានរកឃើញថា សំណល់អាហារដល់ទៅ ១,៣ពាន់លានត្រូវបានបោះចោលជារៀងរាល់ឆ្នាំនោះអង្គការសុខភាពពិភពលោក WHO ក៏បានរកឃើញដែរថា មនុស្សចន្លោះពី ២០ ទៅ ៣០ភាគរយមកពីតំបន់ជាច្រើនជុំវិញពិភពលោកបែរជាមិនមានលទ្ធភាពក្នុងការទទួលបានអាហារសមរម្យ និងជាប្រចាំថ្ងៃទៅវិញ។

ដោយសារមើលឃើញបញ្ហានេះអាជីវកម្មកើតថ្មី (Startup) មួយដែលមានឈ្មោះថា Nilus ត្រូវបានបង្កើតឡើង និងកំពុងបន្តប្រតិបតិ្តការអស់រយៈពេល៦ឆ្នាំមកហើយបានដាក់ការប្តេជ្ញាចិត្តក្នុងការកែប្រែស្ថានភាពវិបត្តិចំណីអាហារនេះឲ្យប្រសើរឡើងវិញ។ បច្ចុប្បន្ន Nilus កំពុងធ្វើអាជីវកម្មរបស់ខ្លួននៅតាមប្រទេសចំនួន៣នៅឡើយ ដូចជានៅអេស្ប៉ាញ មិកស៊ិកូ និងប៉េរូ ។

កិច្ចការងារស្នូលរបស់ Nilus គឺដើម្បីជួយដល់គ្រួសារដែលមានប្រាក់ចំណូលទាបដើម្បីអាចទទួលបានអាហារ និងដំណាំកសិផលចេញពីកសិករដែលនៅទីតាំងក្បែរគេបំផុតតាមរយៈ
ការបង្កើតជាសហគមទិញ និងលក់បែបអនឡាញមួយតភ្ជាប់រវាងក្រុមមនុស្សទាំងក្រុមនេះពីព្រោះ Nilus ជឿជាក់ថា ដំណើរការនេះវាបានជួយកាត់បន្ថយថ្លៃដើមនៃទំនិញកសិផលដល់ទៅ២៥ភាគរយធៀបទៅនឹងតម្លៃនៅលើទីផ្សារធម្មតា។

ការទិញដោយផ្ទាល់ពីកសិករបានជួយសន្សំសំចៃដល់ពលរដ្ឋប្រាក់ចំណូលទាបដែលជាអតិថិជនផង និងជួយបង្កើនប្រតិបត្តិការលក់ជូនកសិករក្នុងតំបន់ផងដោយគ្រាន់តែការប្រើប្រាស់កម្មវិធីរបស់ Nilus ហើយក្នុងនោះកសិករនឹងត្រូវប្រើប្រាស់ទីតាំងរបស់គេជាទីតាំងនៃការដឹកជញ្ជូនទំនិញចេញតែម្តងដោយមិនមានការស្តុកទុកនៅទីកន្លែងផ្សេង ឬឈ្មួញកណ្តាលនោះឡើយ។

ប្រធានប្រតិបត្តិ និងជាសហស្ថាបនិក Nilus លោក Ady Beitler បាននិយាយថា ៖

«ពួកយើងបានបម្រើអតិថិជនដែលមានជីវភាពចំណូលទាបប្រមាណជា៥០ម៉ឺននាក់មកហើយក្រោយកិច្ចដំណើរការអាជីវកម្មបាន៦ឆ្នាំកន្លងមកនេះ ហើយគិតត្រឹមឆ្នាំនេះយើងបានបម្រើអតិថិជនសរុប១១០០០០នាក់រួចទៅហើយ។ យើងជឿជាក់ថា Nilus បានជួយកាត់បន្ថយតម្លៃថ្លៃដើមយ៉ាងច្រើនពីការចំណាយលើម្ហូបអាហាររបស់ពលរដ្ឋទាំងនោះ ហើយយើងបានជួយកាត់បន្ថយការបញ្ចេញឧស្ម័នកាបូនិកដល់ទៅ៤៥០០តោនផងដែរ ដោយការកាត់បន្ថយនូវការបោះបង់ចំណីអាហារចោលទៅក្នុងមជ្ឈដ្ឋានរស់នៅរបស់យើង»។

ជាតួលេខសរុបមកទល់សព្វថ្ងៃនេះ Nilus បានដឹកជញ្ជូនដំណាំកសិផលនិងចំណីអាហារជូនទៅដល់អតិថិជនរបស់ខ្លួនប្រមាណជា៧លានតោនរួចមកហើយដោយសង្ឃឹមថាអាជីវកម្មនេះនឹងអាចពង្រីកខ្លួនបន្ថែមទៀតទៅកាន់គោលដៅបន្ទាប់និងប្រទេសជាច្រើនទៀតដែលកំពុងមានបញ្ហាអសន្តិសុខផ្នែកចំណីអាហារ៕