ភ្នំពេញ ៖ថ្នាក់ដឹកនាំផ្នែកវិទ្យាសាស្ត្រ បច្ចេកវិទ្យា និងនវានុវត្តន៍ (វ.ប.ន.)របស់កម្ពុជា បានពិនិត្យវឌ្ឍនភាព និងជំរុញកិច្ចសហប្រតិបត្តិការ ដើម្បីតម្រង់ទិសអាទិភាពជាតិឱ្យស្របតាមផែនការ សកម្មភាពថ្មីរបស់អាស៊ាន ឆ្ពោះទៅចក្ខុវិស័យអាស៊ានឆ្នាំ២០៣៥។ ក្នុងកិច្ចប្រជុំលើកទី៧ ដែលរៀបចំឡើងនៅថ្ងៃទី៩ ខែតុលា ឆ្នាំ២០២៥ គណៈកម្មាធិការជាតិវិទ្យាសាស្ត្រ បច្ចេកវិទ្យា និងនវានុវត្តន៍ (COSTI) បានបញ្ជាក់ជាថ្មីថា វិស័យ វ.ប.ន. គឺជាសសរស្តម្ភគន្លឹះសម្រាប់ការរីកចម្រើនរបស់ប្រទេសនិងតំបន់។

ឯកឧត្តមបណ្ឌិត ហ៊ុល សៀងហេង អនុរដ្ឋលេខាធិការក្រសួង ឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាប្រធាន COSTI កម្ពុជា បានសង្កត់ធ្ងន់​លើការប្តេជ្ញា​ចិត្តរួម​របស់កម្ពុជាជាមួយអាស៊ាន “កិច្ចប្រជុំលើកទី៧នេះបង្ហាញយ៉ាងច្បាស់អំពីការប្តេជ្ញាចិត្តរួមរបស់កម្ពុជា និងការចូលរួមយ៉ាងសកម្មក្នុងការជំរុញវិទ្យាសាស្ត្រ បច្ចេកវិទ្យា និងនវានុវត្តន៍ ដែលជាមូលដ្ឋានគ្រឹះសម្រាប់ការអភិវឌ្ឍសហគមន៍សេដ្ឋកិច្ចអាស៊ាន។

ឯកឧត្តមបានលើកឡើងថា៖ កិច្ចប្រជុំនេះផ្តោតលើការផ្សព្វផ្សាយ និងជំរុញការអនុវត្តផែនការសកម្មភាពអាស៊ានស្ដីពីវិទ្យាសាស្ត្រ បច្ចេកវិទ្យា និងនវានុវត្តន៍ (APASTI) ឆ្នាំ២០២៦-២០៣៥ ដែលទើបត្រូវបានអនុម័តនៅក្នុងកិច្ចប្រជុំរដ្ឋមន្ត្រីអាស៊ានផ្នែកវិទ្យាសាស្ត្រ បច្ចេកវិទ្យា និងនវានុវត្តន៍លើកទី២១ នៅទីក្រុងហ្សាកាតា។ ផែនការសកម្មភាពរយៈពេល១០ឆ្នាំថ្មីនេះកំណត់ទិសដៅជាយុទ្ធសាស្ត្រសម្រាប់តំបន់ ដោយមានមូលដ្ឋានលើចក្ខុវិស័យ «អាស៊ានប្រកបដោយសមាហរណកម្ម និងជំរុញដោយវិទ្យាសាស្ត្រ បច្ចេកវិទ្យា និងនវានុវត្តន៍ លើកកម្ពស់កិច្ចសហប្រតិបត្តិការដោយរលូន និងភាពប្រកួតប្រជែងជាសាកល»។

នៅក្នុងផែនការ APASTI ២០២៦-២០៣៥ កម្ពុជាក៏បានបញ្ជាក់ការប្តេជ្ញាចិត្តអនុវត្តគំនិតផ្តួចផ្តើមថ្នាក់ជាតិនានា ដើម្បីកសាងប្រព័ន្ធអេកូឡូស៊ី វ.ប.ន. ដែលមានភាពធន់។ ការរួមចំណែករបស់កម្ពុជានឹងជំរុញវិស័យយុទ្ធសាស្ត្រ ដូចជាសុខាភិបាល អាហារ ថាមពល បញ្ញាសិប្បនិម្មិត និងការផ្ទេរបច្ចេកវិទ្យា ដើម្បីលើកកម្ពស់ភាព ប្រកួត​ប្រជែង​ក្នុង​តំបន់។

កិច្ចប្រជុំនេះក៏បានបង្ហាញលទ្ធផលនៃកិច្ចប្រជុំរដ្ឋមន្ត្រីអាស៊ានផ្នែក វ.ប.ន. លើកទី២១ និងកិច្ចប្រជុំ COSTI លើកទី៨៧ វឌ្ឍនភាពនិងសំណើគម្រោង​របស់អនុគណៈ​កម្មាធិការ​ទាំង​៩ព្រមទាំងនីតិវិធីនិងយន្តការគ្រប់គ្រងមូលនិធិវិទ្យាសាស្ត្រ បច្ចេកវិទ្យា និងនវានុវត្តន៍អាស៊ាន (ASTIF) ផងដែរ។

ឯកឧត្តមបណ្ឌិត ហ៊ុល សៀងហេង បានស្នើឱ្យសមាជិកគណៈកម្មាធិការ អនុគណៈកម្មាធិការ និងក្រុមការងារទាំងអស់ ជំរុញកិច្ចខិតខំប្រឹងប្រែងថ្នាក់ជាតិឱ្យមាន​ភាពស៊ី​សង្វាក់​ និងឆ្លើយតបតាមតម្រូវការសម្រាប់ការចូលរួមសកម្ម នៅក្នុងការសម្រេចគោលដៅរួមផ្នែកវិទ្យាសាស្ត្រ បច្ចេកវិទ្យា និងនវានុវត្តន៍៕