បរទេស៖ យោងតាមប្រភពព័ត៌មានពីបរទេសបានរាយការណ៍ថា IMF បានបង្កើនការព្យាករណ៍កំណើនផលិតផលក្នុងស្រុកសរុប​ (GDP) របស់ចិនសម្រាប់ឆ្នាំនេះ ខណៈដែលព្យាករណ៍ពីកំណើនសេដ្ឋកិច្ចរបស់សហរដ្ឋអាមេរិកអាចធ្លាក់ចុះនៅឆ្នាំក្រោយ ហើយបានព្រមានអំពីអត្រាការប្រាក់ខ្ពស់អាចនឹងបន្តក្នុងរយៈពេលយូរ ដោយសារអតិផរណានៅតែខ្ពស់ដដែល។

មូលនិធិរូបិយវត្ថុអន្តរជាតិ (IMF) បានបង្កើនការព្យាករណ៍កំណើនផលិតផលក្នុងស្រុកសរុប​ (GDP) របស់ចិនដល់ ៥ ភាគរយសម្រាប់ឆ្នាំ២០២៤ ដែលកើនឡើងពីការព្យាកណ៍ក្នុងខែមេសាត្រឹម ៤,៦ ភាគរយ។ IMF បានបង្កើនការព្យាករណ៍លើសេដ្ឋកិច្ចចិននៅក្នុងទស្សនវិស័យសេដ្ឋកិច្ចពិភពលោកចុងក្រោយរបស់ខ្លួន (WEO) ដោយសារការស្ទុះងើបឡើងវិញជាលំដាប់នៃការប្រើប្រាស់ក្នុងស្រុក និងការកើនឡើងនៃការនាំចេញ។ ការកើនឡើងការព្យាករណ៍នេះក៏បង្ហាញពីការបង្កើនទំនុកចិត្តជាសាកលនៅក្នុងទស្សនវិស័យសម្រាប់សេដ្ឋកិច្ចធំទីពីរមួយនេះរបស់ពិភពលោកផងដែរ។

របាយការណ៍ WEO បានលើកឡើងថា ការកើនឡើងនៃការនាំចេញរយៈពេលខ្លីទំនងជាការឆ្លើយតបចំពោះការកើនឡើងយឺតនៃតម្រូវការពិភពលោកកាលពីឆ្នាំមុន និងបានជួយឱ្យការប្រើប្រាស់ក្នុងស្រុករបស់ប្រទេសចិនងើបឡើងវិញ ព្រមទាំងជំរុញកំណើនវិជ្ជមានរបស់ប្រទេសនៅក្នុងត្រីមាសទីមួយថែមទៀតផង។ សម្រាប់ទស្សនវិស័យនៅក្នុងឆមាសទីពីរ ទាំងទស្សនៈក្នុងស្រុក និងអន្តរជាតិមានទំនុកចិត្តយ៉ាងខ្លាំងអំពីកំណើនសេដ្ឋកិច្ចចិន ៥ ភាគរយ។ ការដំឡើងការព្យាករណ៍របស់ IMF បានកើតឡើងមួយថ្ងៃបន្ទាប់ពីទិន្នន័យផ្លូវការរបស់ចិនបានបង្ហាញថា GDP របស់ចិនបានកើនឡើង ៥ ភាគរយនៅក្នុងឆមាសទីមួយនៃឆ្នាំ ២០២៤ ឬ  ៦១,៦៨ ទ្រីលានយ័ន (៨,៤៩ ទ្រីលានដុល្លារ)។

អ្នក​ជំនាញ​បាន​និយាយ​ថា ​ចិនអាចយកឈ្នះកំណើន ៥ ភាគរយ ដែល​​ពិបាក​នឹងយក​ឈ្នះ​ ដោយ​សារ​សេដ្ឋកិច្ច​ពិភពលោក​ទាំងមូលជួបបញ្ហាប្រឈមជាញឺកញាប់។ ពួកគេបានកត់សម្គាល់ឃើញថា  កំណើនដ៏រឹងមាំក្នុងការនាំចេញកើនឡើង ៦,៩ ភាគរយនៅក្នុងឆមាសទីមួយនៃឆ្នាំនេះ បើប្រៀបធៀបនឹងរយៈពេលដូចគ្នាកាលពីឆ្នាំមុន។ ទោះបីជាបរិយាកាសខាងក្រៅមិនសូវមានសន្តិភាព និងការកើនឡើងលទ្ធិគាំពារនិយមផ្នែកពាណិជ្ជកម្ម ប៉ុន្តែពាណិជ្ជកម្មក្រៅប្រទេសរបស់ចិនសម្រេចបានលទ្ធផលល្អ ដែល​ជា​ប្រភព​នៃ​ការ​បង្កើន​ទំនុក​ចិត្ត​ក្នុង​សេដ្ឋកិច្ច​របស់​​ចិន​។ ទន្ទឹមនឹងនេះ កិច្ចប្រជុំពេញអង្គលើកទី ៣ នៃគណៈកម្មាធិការមជ្ឈិមទី ២០ របស់បក្សកុម្មុយនិស្តចិនត្រូវបានមនុស្សជាច្រើនរំពឹងថា នឹងមានគោលនយោបាយសេដ្ឋកិច្ចសកម្ម និងរៀបចំផែនការកំណែទម្រង់ដែលជំរុញការអភិវឌ្ឍន៍ប្រទេសចិនប្រកបដោយគុណភាពខ្ពស់។ សម័យប្រជុំនេះបានចាប់ផ្តើមនៅថ្ងៃចន្ទ និងបន្តដំណើរការរហូតដល់ថ្ងៃព្រហស្បតិ៍សប្តាហ៍នេះ ដែលដើរតួនាទីយ៉ាងសំខាន់ក្នុងកំណែទម្រង់របស់ចិន ហើយត្រូវបានគេរំពឹងថានឹងផ្តោតលើកំណែទម្រង់ស៊ីជម្រៅបន្ថែមទៀត ដើម្បីលើកកម្ពស់គុណភាពខ្ពស់ ការអភិវឌ្ឍន៍ និងជំរុញទំនើបកម្មរបស់ចិន។

ទោះបីជា IMF បានបង្កើនការព្យាករណ៍កំណើនរបស់ចិនក៏ដោយ ប៉ុន្តែខ្លួននៅតែរក្សាការព្យាករណ៍សម្រាប់កំណើនសេដ្ឋកិច្ចពិភពលោក ៣,២ ភាគរយមិនផ្លាស់ប្តូរ។ មិនត្រឹមតែប៉ុណ្ណោះ ទស្សនវិស័យរបស់ IMF កាន់តែអាប់អួរសម្រាប់សេដ្ឋកិច្ចធំៗ ដោយបានព្យាករណ៍ពីការធ្លាក់ចុះនៃកំណើនសេដ្ឋកិច្ចរបស់សហរដ្ឋអាម៉េរិកនៅឆ្នាំក្រោយ និងព្រមានអំពីអត្រាការប្រាក់ខ្ពស់អាចនឹងបន្តខ្ពស់ក្នុងរយៈពេលយូរ ដោយសារអតិផរណានៅតែខ្ពស់ដដែល។ នៅក្នុងទស្សនវិស័យចុងក្រោយបំផុតរបស់ IMF សម្រាប់សេដ្ឋកិច្ចពិភពលោក បានព្យាករណ៍ថា កំណើនសេដ្ឋកិច្ចរបស់សហរដ្ឋអាមេរិកនឹងកើនឡើង ២,៦ ភាគរយសម្រាប់ឆ្នាំនេះ និងធ្លាក់ចុះ ១,៩ ភាគរយនៅឆ្នាំក្រោយ ដោយសារការកើនឡើងនៃអត្រាអត់ការងារធ្វើ  និងការប្រើប្រាស់មានកម្រិតមធ្យម។ លើសពីនេះ អតិផរណាខ្ពស់នៅដដែលមានងាយធ្លាក់ចុះត្រូវបានជំរុញតម្លៃសេវាកម្មខ្ពស់ ប្រាក់ឈ្នួលខ្ពស់ និងភាពតានតឹងពាណិជ្ជកម្មភូមិសាស្ត្រនយោបាយ ដែលអាចធ្វើឲ្យអត្រាការប្រាក់ខ្ពស់មានរយៈពេលយូរ។ ប្រធានធនាគារកណ្តាលលោក Jerome Powell លើកឡើងថា ដើម្បីកំណត់គោលនយោបាយរូបិយវត្ថុរបស់សហរដ្ឋអាម៉េរិក ពួកគេត្រូវមានទំនុកចិត្តថាសម្ពាធតម្លៃត្រូវបានបន្ធូរបន្ថយ មុនពេលដែលធនាគារកណ្តាលអាម៉េរិកកាត់បន្ថយអត្រាការប្រាក់៕