បរទេស ៖ យោងទៅតាមប្រភពព័ត៌មានពី CNN បានដកស្រង់ការលើកឡើងរបស់មូលនិធិរូបិយវត្ថុអន្តរជាតិ IMF ថា សេដ្ឋកិច្ចពិភពលោកកំពុងបង្ហាញពីភាពធន់ល្អជាងមុនដោយសារហានិភ័យមួយចំនួនបានថយចុះ ប៉ុន្តែបញ្ហាអតិផរណានៅតែជាបញ្ហាប្រឈម។

កាលពីខែមេសាកន្លងទៅនេះ IMF បានបន្ទាបការព្យាករណ៍សេដ្ឋកិច្ចពិភពលោកមកត្រឹម ២,៨ ភាគរយ ដោយសារភាពច្របូកច្របល់ក្នុងវិស័យធនាគារ និងការកើនឡើងបំណុលសាធារណៈរបស់សហរដ្ឋអាមេរិក។ ដោយឡែក នៅខែកក្កដានេះ IMF បាននិយាយថា សេដ្ឋកិច្ចបានរីកចម្រើនបន្តិច ដោយសារខ្សែសង្វាក់ផ្គត់ផ្គង់កំពុងដំណើរការកាន់តែរលូន ហើយសកម្មភាពសេដ្ឋកិច្ចនៅតែមានស្ថិរភាពចំពេលមានទីផ្សារការងារមានភាពប្រសើរជាងមុន ខណៈដែលកូវីដ-១៩ មិនត្រូវបានចាត់ទុកជាវិបត្តិសុខភាពពិភពលោកទៀតទេ។ IMF បានបង្កើនការព្យាករណ៍របស់ខ្លួនលើកំណើនសេដ្ឋកិច្ចពី ២,៨ ភាគរយមកដល់ ៣ ភាគរយសម្រាប់ឆ្នាំនេះ និងរក្សាការព្យារករណ៍នៅឆ្នាំ ២០២៤ ដដែល។

លោក Pierre-Olivier Gourinchas ប្រធានសេដ្ឋវិទូរបស់ IMF បាននិយាយនៅក្នុងសេចក្តីថ្លែងការណ៍មួយថា សកម្មភាពសេដ្ឋកិច្ចសកលបានបង្ហាញឱ្យឃើញពីភាពធន់នៅក្នុងត្រីមាសទីមួយនៃឆ្នាំ២០២៣ នេះ ដែលនាំឱ្យការកើនឡើងតិចតួចសម្រាប់កំណើនពិភពលោកនៅឆ្នាំនេះ។ ទោះជាយ៉ាងណាក្តី អតិផរណាអាចនៅតែកើនឡើង ដោយសារសង្គ្រាមរវាងរុស្ស៊ី-អ៊ុយក្រែន ព្រឹត្តិការណ៍ដែលទាក់ទងនឹងបញ្ហាបម្រែបម្រួលអាកាសធាតុការរឹតបន្តឹងបន្ថែមទៀតនៃគោលនយោបាយរូបិយវត្ថុ និងភាពប្រែប្រួលនៃទីផ្សារហិរញ្ញវត្ថុ។ លើសពីនេះ ការព្យាករណ៍កំណើនបច្ចុប្បន្ន ៣ ភាគរយនៅតែទាបជាងអ្វីដែលសម្រេចបានមុនការរាតត្បាតកូវីដ-១៩ ដោយកំណើនសេដ្ឋកិច្ចពិភពលោកប្រចាំឆ្នាំជាមធ្យមមាន ៣,៨ ភាគរយ ។

លោក Gourinchas បានបន្ថែមថា ៖ ការយកឈ្នះអតិផរណា គឺជាដំណោះស្រាយចម្បងសម្រាប់សេដ្ឋកិច្ច ដែល​ត្រូវ​ការ​គោល​នយោបាយ​រូបិយវត្ថុ​ដើម្បី​រក្សា​ការ​រឹតបន្តឹង​រហូត​ដល់​មាន​សញ្ញា​ច្បាស់លាស់​ថា​អតិផរណា​​កំពុង​ថយ​ចុះ។ ជាមួយគ្នានេះ នៅក្នុងប្រទេសជាច្រើន គោលនយោបាយសារពើពន្ធគួរតែរឹតបន្តឹង ដើម្បីពង្រឹងលើយុទ្ធសាស្រ្តយកឈ្នះអតិផរណា ហើយសកម្មភាពបន្ទាន់គឺត្រូវការជាចាំបាច់ដើម្បីពង្រឹងកិច្ចសហប្រតិបត្តិការជាសកលលើគោលនយោបាយអាកាសធាតុ ពាណិជ្ជកម្មអន្តរជាតិ ឬ ការរៀបចំរចនាសម្ព័ន្ធបំណុល ដើម្បីដោះស្រាយបញ្ហាប្រឈមរួម។

យោងតាមរបាយការណ៍ដដែលបានឱ្យដឹងថា ប្រទេសសេដ្ឋកិច្ចជឿនលឿននៅតែមានចំណែកធំបំផុតក្នុងការជំរុញកំណើនសេដ្ឋកិច្ច ដោយសេដ្ឋកិច្ចអាមេរិកត្រូវបានព្យាករណ៍ថានឹងកើនឡើង ១,៨ ភាគរយ ចក្រភពអង់គ្លេសកើនឡើង ០,៤ ភាគរយ និងអាល្លឺម៉ង់អាចនឹងធ្លាក់ចុះ ០,៣ ភាគរយ។ ស្របពេលនេះដែរ គេមានការព្រួយបារម្ភថា ការស្ទុះងើបឡើងវិញរបស់ចិនអាចនឹងយឺតជាងការរំពឹងទុក ដោយសារមានបញ្ហាក្នុងវិស័យអចលនទ្រព្យ ភូមិសាស្ត្រនយោបាយ និងការចៀសឆ្ងាយពីប្រាក់ដុល្លារ ដែលអាចរំខានដល់ពាណិជ្ជកម្ម លំហូរប្រាក់ឆ្លងដែន និង តម្លៃទំនិញ៕