សេដ្ឋកិច្ច
ហិរញ្ញវត្ថុ
អចលនទ្រព្យ
ជំនួញ
អត្ថបទពាណិជ្ជកម្ម
អាជីវកម្មថ្មី និងនវានុវត្ត
មាតិកាឌីជីថល
Khmer Insider
មរតកគំនិត
កម្ពុជា 360°
វិថីហិរញ្ញវត្ថុ
ភ្នំពេញ ៖ ក្នុងឆ្នាំ២០២៥ កន្លងទៅនេះ កម្ពុជាទទួលបានលំហូរវិនិយោគផ្ទាល់ពីបរទេសក្នុងទំហំទឹកប្រាក់ ៥,១ពាន់លានដុល្លារអាមេរិក មានកំណើនប្រមាណ ១៦ភាគរយ ធៀបនឹងឆ្នាំ២០២៥កន្លងទៅ ខណៈលំហូរវិនិយោគផ្ទាល់ពីប្រទេសចិនមានទំហំ ៣,៧៦ពាន់លានដុល្លារអាមេរិក ឬស្មើនឹង ៧៣,៧ភាគរយ ។ នេះបើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជាចេញផ្សាយកាលពីពេលថ្មីៗនេះ ។
បើតាមរបាយការណ៍បានបង្ហាញផងដែរថា វិស័យកម្មន្តសាល បានស្រូបទាញទុនវិនិយោគផ្ទាល់ពីបរទេសច្រើនជាងគេ ដែលមានរហូតដល់៦៨,១ភាគរយ បន្ទាប់គឺ វិស័យហិរញ្ញវត្ថុ មាន១១,៩ភាគរយ វិស័យសំណង់ ៦,១ភាគរយ និងថាមពល ៣,៥ភាគរយ ។ ក្រៅពីនេះមានវិស័យអចលនទ្រព្យ កសិកម្ម សណ្ឋាគារ និងការកម្សាន្តជាដើម ។
សម្រាប់ការវិនិយោគរបស់ចិននៅកម្ពុជា ត្រូវបានកត់សម្គាល់ឃើញថាមានរោងចក្រដំឡើងរថយន្ត រោងចក្រផលិតសំបកកង់រថយន្ត តំបន់សេដ្ឋកិច្ច វិស័យថាមពល ក្នុងនោះក៏មានគម្រោងវិនិយោគជាប្រវត្តិសាស្តរលើថាមពលអគ្គិសនី ដើរដោយកម្លាំងខ្យល់នៅខេត្តមណ្ឌលគិរី ។
អ្នកជំនាញអលចនទ្រព្យបានមើលឃើញថាការវិនិយោគរបស់វិនិយោគិនចិននៅតែមានសារសំខាន់ក្នុងសេដ្ឋកិច្ចរបស់កម្ពុជា ដោយការវិនិយោគ និងលំហូរទុនវិនិយោគមកពីប្រទេសចិនបានផ្ដល់ឱកាសការងារដល់ពលរដ្ឋ និងធ្វើឱ្យការនាំចេញរបស់កម្ពុជាទៅកាន់ទីផ្សារអន្តរជាតិមានកំណើនឡើងមួយកម្រិត ។
ឯកឧត្តមបណ្ឌិតសភាចារ្យផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍លើកឡើងកាលពីពេលថ្មីៗនេះថា ថ្វីត្បិតតែឆ្នាំ២០២៥កន្លងទៅនេះ កម្ពុជាបានជួបប្រទះនឹងបញ្ហាមួយចំនួន ទាំងកត្តាខាងក្នុងនិងក្រៅ ប៉ុន្តែកម្ពុជាបានសម្រេចនូវកំណើនសេដ្ឋកិច្ច៥,២ភាគរយ ។ អ្វីដែលពិសេសនោះ ក្នុងឆ្នាំ២០២៥ កម្ពុជាបានអនុម័តគម្រោងវិនិយោគរហូតដល់ ៦៣០គម្រោងជាមួយនឹងទុនវិនិយោគ រហូតដល់១០ពាន់លានដុល្លារអាមេរិក ។
ឯកឧត្តមបណ្ឌិតបន្តថា លំហូរវិនិយោគផ្ទាល់ពីបរទេសក្នុងឆ្នាំ ២០២៥ក៏មានកំណើនខ្ពស់ ហើយវិនិយោគិនបរទេសដែលកំពុងបណ្ដាក់ទុនវិនិយោគស្រាប់នៅកម្ពុជាក៏បានពង្រីកការវិនិយោគរបស់ខ្លួនបន្ថែម ធ្វើឱ្យសកម្មភាពវិនិយោគនៅតែមានភាពទាក់ទាញ ។
ជាកត់សម្គាល់ថា ថ្វីត្បិតតែចិនបានឈរលំដាប់កំពូលទាំងការវិនិយោគ និងទេសចរក៏ដោយ កម្ពុជានៅតែបន្តទាក់ទាញវិនិយោគិន និងទេសចរចិនចូលមកបណ្ដាក់ទុននិងទស្សនានៅកម្ពុជា ដោយរាជរដ្ឋាភិបាលប្រកាសលើកលែងទិដ្ឋាការសម្រាប់ជនជាតិចិន សាកល្បងរយៈពេល៤ខែ ចាប់ពី មិថុនា ដល់ខែតុលា ឆ្នាំ ២០២៦ ។ តាមរយៈការលើកលែងទិដ្ឋាការដល់ជនជាតិចិននេះ រំពឹងថានឹងធ្វើឱ្យទេសចរនិងវិនិយោគិនចិនចូលមកកម្ពុជាកាន់តែច្រើនឡើងបន្ថែម ។
ទន្ទឹមនឹងនេះ រដ្ឋាភិបាលចិន ក៏បានជួយជំរុញវិនិយោគិនរបស់ខ្លួនមកបណ្ដាក់ទុនវិនិយោគនៅកម្ពុជាបន្ថែមផងដែរ ជាក់ស្ដែងអភិបាលខេត្តជាំងស៊ូដែលបានមកទស្សនកិច្ចនៅកម្ពុជាកន្លងមក បានប្រាប់ថា នឹងជំរុញឱ្យវិនិយោគិនមកពីជាំងស៊ូមកបណ្ដាក់ទុនវិនិយោគនៅកម្ពុជាបន្ថែមទៀត ពីព្រោះនៅកម្ពុជាមានតំបន់សេដ្ឋកិច្ចពិសេសរបស់ចិន ដែលងាយស្រួលសម្រាប់ការវិនិយោគរបស់វិនិយោគិនចិន ជាពិសេសការបណ្ដាក់ទុនវិនិយោគនៅខេត្តព្រះសីហនុ ៕
Account
Security
Favourite Content